Read Makhuwa-Shirima Ezera 7 Bible Online

Ezera 7 - Makhuwa-Shirima bible

Ezera 7

¹Siviraleene itthu iye, moolamulani mwa mwene Aritaxaxete, mwene a oParesi, aakhala mulopwana iitthaniwa Ezera. Aari mwaana mulopwana a Seraya, mwaana mulopwana a Azariya, mwaana mulopwana a Hilikiya

²mwaana mulopwana a Xalumi, mwaana mulopwana a Zadoki, mwaana mulopwana a Ahitube,

³mwaana mulopwana a Amariya, mwaana mulopwana a Azariya, mwaana mulopwana a Merayoti,

⁴mwaana mulopwana a Zerahiya, mwaana mulopwana a Uzi, mwaana mulopwana a Buki,

⁵mwaana mulopwana a Abixuwa, mwaana mulopwana a Pinehasi, mwaana mulopwana a Eleyazari, mwaana mulopwana a Aharoni, Musaserdoti* mutokweene.

⁶Vano Ezera owo aarweenle oBabiloniya. Aari namalepa aasuwelanxe nnenesene Nlamulo na Moisesi naavahiwe ni Yave, Muluku a aYixrayeli. Mwene aamvaha sootheene aavekenlaawe niwoko ntata na Yave Mulukwaawe naari mwa yoowo.

⁷Akina a aYixrayeli, mpaka asaserdoti*, aLeevi, anamwiipa, anamalipelela milako ni arumeiyi a Empa ya Yave yaarowatho oYerusaleemu muyaakhani yanaathannapiili ya olamula wa mwene Artaxaxete.

⁸Ezera aaphiyale oYerusaleemu mmweerini wanaathanu wa eyaakha yanaathannapiili ya olamula wa mwene.

⁹Munihukuni noopacera na mweeri woopacera owo aavenya oBabiloniya anaphiya oYerusaleemu vanihukuni noopacera mweeri wanaathanu niwoko ntata noosareya ikharari na Mulukwaawe naari ni yoowo.

¹⁰Vano Ezera aalakela okhalela nthiti osoma Nlamulo na Yave ni weettela aaxutihaka aYixrayeli ikanosaya ni soolamulasaya.

¹¹Vano ekaratta mwene Aritaxaxete aamwinnyerenraawe musaserdoti* Ezera, ni namalepa, mulopwana aaxuttihiwe munlamuloni ni mukanoni sa Yave a aYixrayeli, yeenre ha:

¹²Aritaxaxete, mwene a mamwene, wa Ezera, Musaserdoti* ni namahusiha a Nlamulo na Muluku a wiirimu — salaama ni murettele.

¹³Miyo kinlamulela weera akhalaru muYixrayeli a moomwenenimwaka, mpaka asaserdoti* ni aLeevi, anaatthune orowa oYerusaleemu ni nyuwo — khamwaha.

¹⁴Nyuwo munrumihiwa ni mwene ni anamalakaawe athanneeli weera mwakohakohe oYerusaleemu, elapo ya oYuda mwaha wa Nlamulo na Mulukwaanyu ori mmatatanimwanyu.

¹⁵Ohiya toko yeeyo, murowaneke eyuuma yoorikaxa ni eparatha* mwa yeeyo mwene ni anamalakaawe amvanghaaya ni otthunawaya Muluku a aYixrayeli, mwa Yoowo onkhala oYerusaleemu.

¹⁶Mukuxe vamoha ni eyuuma yoorikaxa ni eparatha* yootheene muneeraanyu mwaakhele mweelaponi mwa oBabiloniya nitho sooveleela sa otthunawaya sa muloko ni asaserdoti* wa Empa ya Mulukwaaya oYerusaleemu.

¹⁷Ni musurukhu owo mwathumele imombe ilopwana, anapunci ni ikhondoolo vamoha ni seiyo sineera sitthuneye wa sooveleelasanyu soowura ni sa etrigu ni mwapakelewo sooveleela seiyo valtaarini* a Empa ya Mulukwaanyu oYerusaleemu.

¹⁸Nyuwo ni axunninyu aYuda mwapakeke eniyooreereleni ni eparatha* ni eyuuma yoorikaxa eniihale eyo, muttharihaka otthuna wa Mulukwaanyu.

¹⁹Mwamvahe Muluku a oYerusaleemu ikaruma sootheene weera sirumeeliweno Mpaani mwa Mulukwaanyu.

²⁰Ni sootheene iyo sinisitthuneye wa Empa ya Mulukwaanyu sinooliviwano omuhakhuni wa emwene.

²¹Vano miyo, mwene Aritaxaxete kinaalamulela anamawehaweha ootheene a soosungiwa a ilapo sa okhopela mooloko Efratesi weera mwamvahe Ezera, musaserdoti* ni muhusiha a Nlamulo na Muluku a wiirimu, sootheene aneeraawe oovekeleni —

²²mpakatho ikiilu* 3 400 sa eparatha*; iliitru* 22 000 sa etrigu, iliitru* 2 200 sa eviinyu; iliitru* 2 200 sa sooliveira*, makhura, ni maakha ootheene eniitthuneye.

²³Sootheene Muluku a wiirimu onnyesererihaawe wa Empaawe sipakiweke ni nthiti weera ahirumihele isarasawe omwene wa mwene ni wa anamwanaawe asilopwana.

²⁴Musuwele nnenesene weera nyuwosa khamunono ikuru waanyesereriha misoko, micaango hoye hoye sooliviha sa akhalaru musaserdoti*, muLeevi, namwiipa, namalipelela, murumeiyi a Empa ya Muluku hoye hoye akhalaru namuteko mukina a Empeene yeeyo ya Muluku.

²⁵Vano nyuwo, Ezera, ni miruku oovanghaaweni Mulukwaanyu, mwaakhalihe anamalamula ni aphuki weera ekwanihere ekhaikhai wa atthu ootheene a ilapo sa okhopela mooloko Efratesi — ootheene ansuwela malamulo a Mulukwaanyu. Ni mwaaxuttihe yaale ahisuwenle malamulo ale.

²⁶Yaawo eneera ehiiwelele malamulo a Mulukwaanyu ni malamulo a mwene ethoriheliwe okhwa hoye hoye eronghiwe wootthukiwani, naari yaakhiwe sooreelasaya hoye hoye ewaleliwe.

²⁷Yave, Muluku a makholowaahu atthapeliwe, mwa Yoowo aamviriyenle mwene weera attittimihe moota ola Empa ya Yave oYerusaleemu.

²⁸Owo aakoonihera murima wooreera vamaithoni wa mwene, anamalakaawe ni asitokweenaawe ootheene ooweraxa. Neenre ntata na Yave Mulukwaaka naakhala ni miyo, kaalipiheya murima, kinaathukumanyiha asitokweene akina akina a aYixrayeli weera erowe ni miyo.