Read Makhuwa-Shirima Ezera 9 Bible Online

Ezera 9 - Makhuwa-Shirima bible

Ezera 9

¹Sipakiweene itthusene seiye, asitokweene yaakaattamela, enakeerela: “Atthu a oYixrayeli vamoha ni asaserdoti* ni aLeevi khaamwalamwanle ni miloko soowaattamana ni soopakasaya sa mwiikho — ntoko sa aKanaani, aHiti, aPerizi, aYebusi, awAmoni, aMowabe, awExipitu ni awAmori.

²Awosa ni anamwanaaya aathelana ni miloko iye enatakanserana ekhapira yootteela. Vano ahooleli ni asitokweene ti ari oopacera opaka ohiroromeleya iwo.”

³Kiiwakaru yeeyo, kaahaahula evestiduwaaka ni mukaandyowaaka, kinarosola mayihaaka ni irerusaka, kinakilaathi oothananaxeene.

⁴Vano ootheene yoova masu a Muluku a aYixrayeli, yaathukumana ekirukureenreene niwoko na ohiroromeleya iwe wa yaale yaahokolongwe wootthukiwani. Miyo kaakilaathiwo oothananaxeene mpaka ehuhu yooveleela ya ohiyu.

⁵Vanonto, mweehuhuni ya opaka sooveleela sa ohiyu, kaavenya moothanananimwaka, evestiduwaaka ni mukaandyowaaka woowaahuweene, kinakokhora, kinatheteela matata wa Yave Mulukwaaka,

⁶kinamvekela: “Ii Mulukwaaka! Kootepaxa wuulihiwa muru ni kooyevihiwa moota wooweera nkingwera woowehani Nyuwo, Mulukwaaka, niwoko sootthekasahu sookuttelela muruwaahu ni nthowanahu noophiya wiirimu.

⁷Okhuma mahuku a makholowaahu mpaka olelo nthowanahu nohunnuwaxa. Niwoko na sootthekasahu hiyo, mamwenaahu ni asaserdoti* nohinnyereriwa mmahooxoni a ekatana, wootthukiwani, moohuhuliwani ni oyevihiwa mmatatani mwa mamwene a ilapo sikina, ntoko eneereyaaya olelo.

⁸Vaheera nnaanaanoni, Yave Mulukwaahu oonoonihera murimaawe wooreera apakihaka weera akina akina a hiyo etapuxeye ephwanyaka nipuro noolipeene mpaanimwawe. Hiiho Mulukwaahu oomwaleela maithwaahu ni ookurunuxa opakiwawahu opottha.

⁹Hata nireene ipottha, Mulukwaahu khanihingye mpotthanimwahu. Owo oonoonihera murimaawe wooreera vamaithoni wa mamwene a oParesi: Oonivaha okumi munyowani weera nirasele Empa ya Mulukwaahu ni nivenyererihe mathalaaya, ananivaha exiri yoowiixaakiherano oYuda ni oYerusaleemu.

¹⁰Mene ii! Mulukwaahu, neereke hai mwaha wa itthusene seiye? Hiyo khaniiwelenle malamulo

¹¹munivanghaanyu mwa arumeiyaanyu maprofeeti, mweenraanyu: ‘Elapo muneeraanyu mwakuxe ti elapo yoosareya soohitteela sa amakaaya. Awosa aahiiriha elapo yootheene ni soopakasaya sa mwiikho.

¹²Tivawo asinamwaniinyu asithiyana muhaathelihe ni anamwanaaya asilopwana, hata muhiwaakhulele anamwaniinyu asilopwana waathela anamwanaaya asithiyana. Muhaasaase wiiraana ni yaawo hata okhalawaya nnene weera nyuwosa mukhale oolipeene ni mwakuxe soowiima sooreera sa mulaponi mwaahiyeraka anamwaniinyu ntoko yoohiyeriwa yoohimala.’

¹³Seiyo sinikhumelenle ti niwoko na soopakasahu soonanara ni nthowanahu ntokotoko. Hata hiiho, Mulukwaahu, moonittaruxa vakhaani, ohiphiyeraka naaphwanelaahu, munivahaka ahalahanle ala.

¹⁴Onoowereya hiyo ohokoleela orambura ikanosanyu ni waathela atthu ala a mwiikho? Napaka hiiho, munooninyoonyeriwa mpaka ophiyera oniphwata woomalela, muhinihiyerakaru mutthu.

¹⁵Ii! Yave, Muluku a aYixrayeli, Nyuwo ti oororomeleya. Hiyo ninkhala olelo ntoko atthu ahalahanle. Hiyo nri vamaithoniwanyu ni nthowanahu nroosuwelaru weera khawowo a hiyo ongwera okhala vamaithoniwanyu ni nthowa nna.”