Read Makhuwa-Shirima Nehemiya 11 Bible Online

Nehemiya 11 - Makhuwa-Shirima bible

Nehemiya 11

¹Vano asitokweene a muloko yaakhala oYerusaleemu ni atthu akinaawo yaampaka mwaathanle emuthanlaka hiiho mutthu mmoha a khula muloko weera amakeke oYerusaleemu, esidade yootteela. Akina athannaaxexaawo waatthuneya okhala mmittetthenimwaya.

²Muloko waahaareeliha oottheene yiixinnyerenre otthunawaya weera ekhale oYerusaleemu.

³Akina a aYixrayeli, asaserdoti*, aLeevi, arumeiyi a Empa ya Muluku ni a ekhapira ya arumeiyi a Salomoni, yaakhala mmittettheni sa oYuda — khula mutthu yawaweene. Vaheera akina a oYuda ni a oBenyamini yaakhala oYerusaleemu. Vano masina a asitokweene a ilapo yaakhala oYerusaleemu ti ala: Yaale a ekhapira ya Yuda: Ataya, mwaana mulopwana a Uziya, mwaana mulopwana a Zakariya, mwaana mulopwana a Amariya, mwaana mulopwana a Xefateya, mwaana mulopwana a Mahalaleli, a ekhapira ya Perezi;

⁵ni Mahaseiya, mwaana mulopwana a Baruki, mwaana mulopwana a Koli-Hoze, mwaana mulopwana a Hazaya, mwaana mulopwana a Adaya, mwaana mulopwana a Yoyaribi, mwaana mulopwana a Zakariya, a ekhapira ya Xela.

⁶Yaale a ekhapira ya Perezi yaakhala oYerusaleemu ootheenaawo yaari macira maxexe ni miloko mithannamosa ni athannaararu.

⁷Yaale a ekhapira ya Benyamini: Salu, mwaana mulopwana a Mexulami, mwaana mulopwana a Yowedi, mwaana mulopwana a Pedaya, mwaana mulopwana a Kolaya, mwaana mulopwana a Mahaseiya, mwaana mulopwana a Itiyeli, mwaana mulopwana a Yexaya,

⁸ni vahoolowaya Gabai ni Salai, ootheenaawo yaari macira mathannamaxexe ni miloko miili ni athannaararu.

⁹Yoweli, mwaana mulopwana a Zikeri, aari mutokweene a asitokweene, aakhaviheriwa ni Yuda, mwaana mulopwana a Hasenuwa, mutokweene anaaveeli a esidade.

¹⁰Variyari wa asaserdoti*: Yedaya, mwaana mulopwana a Yoyaribi, Yakini,

¹¹Seraya, mwaana mulopwana a Hilikiya, mwaana mulopwana a Mexulami, mwaana mulopwana a Zadoki, mwaana mulopwana a Merayoti, mwaana mulopwana a Ahitube, aawehaweha Empa ya Muluku,

¹²ni asikhwaaya yaavara muteko Mpaani mwa Muluku, ootheenaawo yaari macira mathannamararu ni miloko miili neeli; Adaya mwaana mulopwana a Yerohami, mwaana mulopwana a Pelaleiya, mwaana mulopwana a Amezi, mwaana mulopwana a Zakariya, mwaana mulopwana a Paxuri, mwaana mulopwana a Malekiya,

¹³ni asikhwaaya yaari mapwattapwattha a imusi, ootheenaawo yaari macira meeli ni miloko mixexe neeli; Amaxesai, mwaana mulopwana a Azareli, mwaana mulopwana a Ahezai, mwaana mulopwana a Mexilemoti, mwaana mulopwana a Imeri,

¹⁴ni asikhwaaya yaari asilopwana ookupaleya, ootheenaawo yaari ncira ni miloko miili ni athannaararu. Vano mutokweenaaya aari Zabediyeli, mwaana mulopwana a Hagedolimi.

¹⁵Variyari wa aLeevi: Xemaya, mwaana mulopwana a Haxubi, mwaana mulopwana a Azerikami, mwaana mulopwana a Haxabaya, mwaana mulopwana a Buni;

¹⁶Xabetai ni Yozabade, eeli a asitokweene a aLeevi, yaawehaweha muteko wa omokoni wa Empa ya Muluku,

¹⁷Mataneya, mwaana mulopwana a Mika, mwaana mulopwana a Zabedi, mwaana mulopwana a Asafi, muhooleli aahoolela muloko moomutthapelani Muluku ni mmavekeloni, Bakebukeya, anaaveeli a axunnawe, Abeda, mwaana mulopwana a Xamuwa, mwaana mulopwana a Galali, mwaana mulopwana a Yedutuni.

¹⁸aLeevi ootheenaawo yaakhala esidade yootteela yaari macira meeli ni miloko mithannamiraru ni axexe.

¹⁹Anamalipelela a milako: Akubi, Talemoni ni asikhwaaya ootheenaawo yaari ncira ni miloko mithannamiili neeli.

²⁰aYixrayeli akinaawo, waatakansa ni asaserdoti* ni aLeevi, yaari mmittettheni sootheene sa oYuda, khula mutthu yoohiyeriwaawe.

²¹Arumeiyi a Empa ya Muluku yaakhala onttumuxani na wOfeli. Vano Ziha ni Gixepa yaari asitokweenaaya.

²²Mutokweene a aLeevi oYerusaleemu aari Uzi, mwaana mulopwana a Bani, mwaana mulopwana a Haxabeya, mwaana mulopwana a Mataneya, mwaana mulopwana a Mika. Uzi aari a ekhapira ya Asafi, mwa yeeyo yaari ahooleli a icipo Mpaani mwa Muluku.

²³Anamwiipa yaalamuleliwa ni mwene, mwa yoowo aareherera mitekosaya sa vanihukuni.

²⁴Petaheya, mwaana mulopwana a Mexezabeli, a ekhapira ya Zera, mwaana mulopwana a Yuda, aari mwaakhula a mwene onreherera makacamiho mmawani.

²⁵Akina a muloko wa oYuda yaarowa omaka oKiriyati-Arba ni mittetthesaya, oDiboni ni mittetthesaya ni oYekabezeheli ni mittetthesaya,

²⁶oYexuwa, oMoloda, oBet-Peleti,

²⁷oHazari-Xuwali, oBerxeba ni mittetthesaya,

²⁸oZikalagi, oMekona ni mittetthesaya,

²⁹wEni-Rimoni, oZora, oYaremuti,

³⁰oZanowa, wAdulami ni mittetthesaya, oLakixi ni mukerekheremwaya ni wAzeka ni mittetthesaya. Awosa yaahiitekiha okhuma oBerxeba mpaka nreyareya na oHinomi.

³¹Ekhapira ya aBenyamini yaarowa omaka oGeba, oMikemasi, wAya, oBeteli ni mittetthesaya,

³²wAnatoti, oNobi, wAnaneya,

³³oHazori, oRama, oGitayimi,

³⁴oHadidi, oZeboyimi, oNebalata,

³⁵oLodi, wOno ni oreyareyani wa Aneettottho.

³⁶Nakupa mukina a aLeevi yaari oYuda aahiitekiha oBenyamini.