Read Makhuwa-Shirima Nehemiya 12 Bible Online

Nehemiya 12 - Makhuwa-Shirima bible

Nehemiya 12

¹Masina a asaserdoti* ni aLeevi yaahokolongwe ni Yexuwa vamoha ni Zerubabeli, mwaana mulopwana a Xeyaletiyeli, ti ala: Seraya, Yeremiya, Ezera,

²Amariya, Maluki, Hatuxi,

³Xekaniya, Rehumi, Meremoti,

⁴Ido, Gineto, Abiya

⁵Miyamini, Mowadeya, Bigela,

⁶Xemaya, Yoyaribi, Yedaya,

⁷Salu, Amoki, Hilikiya, Yedaya. Alasa yaari asitokweene a asaserdoti* ni asikhwaaya mmahukuni a Yexuwa.

⁸aLeevi: Yexuwa, Bavai, Kadamiyeli, Xerebiya, Yuda nitho Mataniya, mwa yoowo aalamuleliwa vamoha ni asikhwaawe oreherera icipo sa otthapela.

⁹Bakebukeya ni Uni, asikhwaaya, yaakhala ohoolowaya weera yiipaka, ewaakhuleleke.

¹⁰Yexuwa aari tiithi a Yoyakimi, Yoyakimi aari tiithi a Eliyaxibi, Eliyaxibi aari tiithi a Yoiyada,

¹¹Yoiyada aari tiithi a Yonatani, Yonatani aari tiithi a Yaduwa.

¹²Mmahukuni a Yoyakimi mapwattapwattha a imusi sa asaserdoti* yaari ti ala: Meraya a emusi ya Seraya; Hananiya a emusi ya Yeremiya;

¹³Mexulami a emusi ya Ezera; Yehokanani a emusi ya Amariya;

¹⁴Yonatani a emusi ya Maluki; Yoseefe a emusi ya Xekaniya;

¹⁵Adena a emusi ya Harimi; Helekai a emusi ya Meremoti;

¹⁶Zakariya a emusi ya Ido; Mexulami a emusi ya Gineto;

¹⁷Zikeri a emusi ya Abiya; Piletai a emusi ya Mineyamini ni Mowadeya;

¹⁸Xamuwa a emusi ya Bilega; Yehonatani a emusi ya Xemaya;

¹⁹Matenai a emusi ya Yoyaribi; Uzi a emusi ya Yedaya;

²⁰Kalai a emusi ya Salu; Heberi a emusi ya Amoki;

²¹Haxabiya a emusi ya Hilikiya; Netaneli a emusi ya Yedaya.

²²Mmahukuni a Eliyaxibi, Yoiyada, Yohanani ni Yaduwa mapwattapwattha a imusi sa aLeevi ni sa asaserdoti* yaalepelingwe alamulaka Dariyexi muParesi.

²³Mapwattapwattha a imusi sa ekhapira ya aLeevi mpaka ehuhu ya Yohanani, mwaana mulopwana a Eliyaxibi, yaalepelingwe mulivuruni ya inyaha sa aYixrayeli.

²⁴Asitokweene a aLeevi yaari Haxabiya, Xerebiya, Yexuwa, mwaana mulopwana a Kademiyeli ni asikhwaaya yaakhala ohoolowaya weera, mpatta mmoha wiipaka icipo sa olapa ni otthapela, mpatta mukina owaakhuleleke, ntoko Davide, mulopwana a Muluku aalamulenlaawe.

²⁵Mataneya, Bakebukeya, Obadiya, Mexulami, Talemoni ni Akubi yaari anamalipelela a milako yaawehaweha saasungiwa saari vamulako.

²⁶Yaarumeela mmahukuni a Yoiyakimi, mwaana mulopwana a Yexuwa, mwaana mulopwana a Yozadaki, ni mmahukuni a guvernadori, Nehemiya, ni musaserdoti* ni namalepa Ezera.

²⁷Wa efesta ya otteelihiwa wa ixiri sa oYerusaleemu, yaalattulana aLeevi a ilapo yaakhalasaaya weera erwe oYerusaleemu yeerelaka opaka efesta ya ixiri ni ohakalala, ni icipo sa otthapela siipeliwaka ikengere, amakita ni atthakare.

²⁸Anamwiipa yaaruuhiwe ilapo soowaattamana oYerusaleemu, sa mmittettheni sa aNetofati,

²⁹oBet-Giligali, ni mmiittetheni sa oGeba ni wAzemavete, niwoko anamwiipa awo yaahiitekela mittetthesaya mukerekhere oYerusaleemu.

³⁰Asaserdoti* ni aLeevi yaahiitteeliha ntoko ekhovelelowaaya, enatteelihatho muloko, milako ni ixiri.

³¹Kaahaalamulela asitokweene a oYuda weera ewelase vasulu exiri. Kaamuthata nakupa miili a anamwiipa weera etthapelele. Mmoha aari vasulu exiri akelaka moono mulopwana mpatta wa Mulako wa Osalani.

³²Hoxayeya ni mpatta mukina wa asitokweene a oYuda yaahaattharasa,

³³vamoha ni Azeriya, Ezera ni Mexulami,

³⁴Yuda, Benyamini, Xemaya, Yeremiya

³⁵ni asaserdoti* akina ekunxeene mapalapatta omuhiya Zakariya, mwaana mulopwana a Yonatani, mwaana mulopwana a Xemaya, mwaana mulopwana a Mataneya, mwaana mulopwana a Mikaya, mwaana mulopwana a Zakuri, mwaana mulopwana a Asafi,

³⁶ni asikhwaaya: Xemaya, Azareli, Milalai, Gilalai, Mahaya, Nataneli, Yuda ni Hanani. Awosa yiipa ikaruma soowiinano saalamuleliwa ni Davide, mulopwana a Muluku, ni namalepa, Ezera, aakhala ohoolowayasa.

³⁷Vamulako wa Naattuuttu awosa yaawelasa ciireru ixikada sa esidade ya Davide, woowelela exiri, ni yaavirasa vaate wa Davide mpaka wa Mulako wa Maahi, mpatta wa ninkhuma nsuwa.

³⁸Nakupa anaaveeli aarowa moono muthiyana. Awosa ewelelaka exiri, miyo kaarowano kikuxaleene mpatta mukina wa muloko. Naavinre Etoore* ya Maikho mpaka Mulako Woothanuwa,

³⁹niviraka vamilako sa Efrayimi, Yexana ni sa Ihopa, itoore* sa Hananeli ni sa Ncira, nirowaka mpaka Mulako wa Ikhondoolo. Vano naaheemela vamulako wa anamalipelela.

⁴⁰Nakupa oomiili a anamwiipa aarowa mmapuronimwawe Mpaani mwa Muluku ni miyo kaarowatho vamoha ni mpatta wa asitokweene

⁴¹nitho wa asaserdoti*: Eleyakimi, Mahaseiya, Mineyamini, Mikaya, Eleyoyena, Zakariya ni Hananiya ni mapalapattaaya,

⁴²nitho Mahaseiya, Xemaya, Eleyazari, Uzi, Yehokanani, Malekiya, Elami ni Ezeri. Nakupa oomiili a anamwiipa aahooleliwa ni Yizeraheya.

⁴³Vano nihuku nne ereene oohakalaleene, yaavaha sooveleela sincipale, niwoko Muluku aahaasariha ohakalala otokotoko. Asithiyana ni asinamwanetho yaahakalalasa ni oruma wa ohakalala wa oYerusaleemu waamwiiwayeya ottai.

⁴⁴Ehuhuweene yeele yaathanliwa ahooleli akina a moosungamo sooveleela, soowiima soopacera ni sanaamuloko. Soolimmwa saari mukhwipi wa esidade awosa waatthuneyaaya oruuhela moosungamo mipatta soonyesereriwa ni Nlamulo waavaha asaserdoti* ni aLeevi. Vekhaikhai muloko wa oYuda waahaahakalalela asaserdoti* ni aLeevi yaahoolela Mpaani mwa Muluku.

⁴⁵Awosa yaakwanihera soorumeela sa Mulukwaaya saanyesereriwa Mpaani mwa Muluku nitho soorumeela sa otteeliha ni anamwiipa ni anamalipelela a milako yaarumeelano, ntoko Davide ni mwanawe mulopwana Salomoni yaalamulenlaaya.

⁴⁶Vano khalayeene vawo, mmahukuni a Davide ni Asafi, yaakhala ahooleli a anamwiipa ni atthu yaahoolela icipo sa omuttottopela ni omutthapela Muluku.

⁴⁷Hiiho mmahukuni a Zerubabeli ni Nehemiya, aYixrayeli ootheene yannacaanga khula nihuku wa anamwiipa ni anamalipelela a milako. Yaamukawanyihatho mpattaaya wa aLeevi akina ni aLeeveene yaale yaakawanyiha mpattaaya wa ekhapira ya Aharoni.