Read Makhuwa-Shirima Nehemiya 13 Bible Online

Nehemiya 13 - Makhuwa-Shirima bible

Nehemiya 13

¹Nihuku nne elivuru ya Moisesi yaasommwa orumihiwaka ohoolo wa muloko ni mwemmwe waahooniwa woolempwa weera ahikhaleru ngwAmoni hoye hoye mMowabe aneera atthuniheriwe munlokoni wa Muluku,

²niwoko awosa ohiya waavaha aYixrayeli yooca ni maahi, yaamuliva Balaami weera aalaphe. Wa soothesene, Mulukwaahu nlapho aatatuxa mareeliho.

³Muloko wiiwakaru malamulo awo, waahiikhumiha mwa aYixrayeli yaawo yaari anamarwa.

⁴Ehinaaye yeeyo, musaserdoti*, Eliyaxibi, aari muhooleli a soosungiwa sa Empa ya Mulukwaahu. Vano owo aari mpatta wa emusi ya Tobiya.

⁵Eliyaxibi aamwinnyerera ekwartu etokotoko, khalayi yaavareliwa muteko woosunga sooveleela sa irooro, erubani*, ikaruma sa Empa ya Muluku, mpakatho sanaamuloko sa etrigu, eviinyu enyowani ni wa makhura, seiyo saari sa aLeevi, anamwiipa ni anamalipelela a milako, ohiya sooveleela wa asaserdoti*.

⁶Vaheera sootheene iyo seereyaaya, miyo nkaakhanle oYerusaleemu, niwoko muyaakhani miloko miraru ni piili, alamulaka Aritaxaxete, mwene a oBabiloniya, kaahokoleela wa mwene. Eviraka ehuhu ekina, kaavekela otthuniherawawe,

⁷kinahokoleela oYerusaleemu. Kihokoleelakaru, kaasuwela yoonanara Eliyaxibi aapankaawe woomwinnyerera ekwartu etokotoko Tobiya mmapuwani a Empa ya Muluku.

⁸Kaanyoonyiwa vancipale, kinavonyera vaate itthu sootheene sa Tobiya.

⁹Kaalamulela orapihiwa ikwartu ni kaahokoloxeramo ikaruma sa Empa ya Muluku ni sooveleela sa irooro ni erubani*.

¹⁰Kaasuwelatho weera aLeevi khayaakhenle mpatta waari wawayeene ni weera aLeevi ootheene ni anamwiipa ahooleli a soorumeela Mpaani mwa Muluku yaahokoleela mweelaponimwaya.

¹¹Tivawo kaahiihalaaka asitokweene, kinaakoha: “Ehinsamareliwa heeni Empa ya Muluku?” Vano kaahaalattula aLeevi ni anamwiipa, kinawiikaathi mmapuronimwaya.

¹²Atthu ootheene a oYuda yaaruuhela mwaasungiwamo sanaamuloko sa etrigu, eviinyu enyowani ni makhura.

¹³Kaamukhaliha musaserdoti* Xelemeya, namalepa Zadoki ni muLeevi mmoha iitthaniwa Pedaya ntoko anamawehaweha a soosungiwa kimukhalihaka Hanani, mwaana a Zakuri, mwaana a Mataneya namakhaviheraaya, niwoko asilopwana awo yaari oororomeleya. Awosa yaari ahooleli a soosungiwa yaakawelaka asikhwaaya.

¹⁴Mukuupuwelele miyo Mulukwaaka ni muhittiwale yeeyo kipakenlaaka Empa ya Mulukwaaka ni soorumeelasaya moota woororomeleyaxa.

¹⁵Mmahukuni ale kaahoona weera oYuda akina yaavara mmattankhini moowaama iwuuva* nihuku na eSaabadu ni yaathukumanya etrigu ettuuttaka mwaabuuruni vamoha ni eviinyu, iwuuva*, ifiigu ni moota wootheene wa mirindi. Sootheene iyo saaruuhiwa oYerusaleemu eSaabadu. Vano kaawoopererasa weera ehithumiheru etthu nihuku nenenenno.

¹⁶Yaakhala akina a esidade ya oTiro yaamanke oYerusaleemu yaaruuha ethumihaka ihopa ni moota wootheene wa maronda. Vano iyo yaathumihera muloko wa oYuda onkhala oYerusaleemu eSaabadu.

¹⁷Ohoolo wa yeeyo kaahaahiiha maneethi a oYuda kiweerelaka: “Ongwereya hai nyuwosa opaka etthu yoonanaraxa munanarihaka eSaabadu?

¹⁸Ti hiiho yaapankaaya makholowaanyu, tivawo Mulukwaahu aakuruxenlaawe esidade ela irisa iya. Nyuwosa mungwaandyeererela isara sa Muluku aYixrayeli munanarihaka eSaabadu.”

¹⁹Nyunttuusi sa oxekuwa siikitthaaya milako sa oYerusaleemu, ekhuveelaka eSaabadu, kaalamulela weera iyo siwaliweke sihuliweke paahi evinreene eSaabadu. Kaawiikaathi akina a atthwaaka oororomeleya mmilakoni weera ohikhaleru murindi weera ovolonghiwe nihuku na eSaabadu.

²⁰Imaara vakhaani anakeeni ni anamathumiha a moota wootheene wa maronda yaavirihasa ohiyu vaate wa oYerusaleemu.

²¹Vaheera miyo kaawooperera keeraka: “Mumvirihela heeni ohiyu muxirini? Mwapakatho yeeyo, kinimootthukihani.” Vahoolo wa yeeyo khayaarwiiyetho eSaabadu.

²²Vano kaahaalamulela aLeevi weera yiitteelihase ni erowe yawehawehase milako weera nihuku na eSaabadu nittittimihiwe ntoko nootteela. Mukuupuweleletho mwa yeeyo Mulukwaaka, mukimorele ikharari moosivelanimwanyu otokotoko.

²³Ohiya toko yeeyo, mmahukuni ale kaawoona aYuda akina yaathelanne ni asithiyana a wAxidoti, wAmoni ni oMowabe.

²⁴Mpatta wa anamwanaaya wuuluma nuulumo na wAxidoti hoye hoye na miloko sikina ohiweraka wuuluma nuulumo na oYuda.

²⁵Miyo kaawoopopihasa ni kaawiitthanelasa malaphwaaya. Kaahaamana akina a yaawo ni kaarosola mayihaaya. Kaahaalipeliha mwa Nsina na Muluku kiweerelaka: “Muhaathelihetho anamwaniinyu wa asinamwanaya, hata ehitheliwe anamwanaaya ni anamwaniinyu hoye hoye ni nyuwosa.

²⁶Naari niwoko na othelathela ntoko wu Salomoni, mwene a aYixrayeli, aatthenkaawe. Variyari wa miloko sincipale khaariworu mwene ntoko yoowo. Owo annasiveliwa ni Mulukwaawe, ni Muluku aamukhaliha mwene a aYixrayeli ootheene. Waarookhalaru hiiho, mpaka yooweene aatthekiheya niwoko na asithiyana anamarwa.

²⁷Yeeyo niiwalaahu kheenaakhuleleya. Mungwereya hai ottheka yootakhala yoowoopiha ele muhiroromeleyaka wa Mulukwaahu, muthelanaka ni asithiyana anamarwa?”

²⁸Mmoha a anamwane asilopwana aYoiyada, mwaana mulopwana a mutokweene a asaserdoti*, Eliyaxibi, aari mukamwene a Sanibalata, muGori. Kaamoomola mpaka ottaiwaka.

²⁹Ii! Mulukwaaka, muhaattiwalase, niwoko aananariha muteko wa esaseredoti ni wiiraana wa esaserdoti ni wa aLeevi.

³⁰Mooteene yoowo kaahaamwaramwaxa asaserdoti* ni aLeevi ootheene ni anamarwa. Kaahaathanlela yoovaraaya khula mutthu ni mutekwaawe.

³¹Kookhalihatho moota woovara miteko sa ikhuuni ni wooruuha soowiima soopacera kithalihaka ehuhuwaaya. Ii! Mulukwaaka, mukuupuwelele miyo mooreeranimwanyu murima!