Read Makhuwa-Shirima Nehemiya 3 Bible Online

Nehemiya 3 - Makhuwa-Shirima bible

Nehemiya 3

¹Eliyaxibi, mutokweene a asaserdoti*, ni asaserdoti* asikhwaawe yaapacera ovara muteko eraselaka Mulako wa Ikhondoolo. Awo yaatteeliha owo yiikaathiki maselaaya mmapuronimwaya, eraselaka mpaka Etoore* ya Ncira ni Etoore* ya Hananeli.

²Asilopwana a oYeriko yaarasela mpatta waattharelana ni Zakuri, mwaana mulopwana a Imiri aarasela ciireru ohoolo.

³Mulako wa Ihopa waaraseliwe ni anamwane asilopwana a Hasenaha. Yaahelela isereemu yiikaatheraka maselaaya, etthaabwa yoowalela ni anampattika mmapuronimwaya.

⁴Meremoti, mwaana mulopwana a Uriya, mwaana mulopwana a Hakozi, aarasela mpatta waattharelana. Mukhwipimwawe Mexulami, mwaana mulopwana a Berekiya, mwaana mulopwana a Mexezabeli, aarasela ni mukhwipimwawe Zadoki, mwaana mulopwana a Bahana, aaraselatho.

⁵Mpatta woottharelana waaraseliwe ni asilopwana a oTekowa, mene maneethaaya khayaatthunne otakansana vamutekoni ekhoottaka elamulelo ya anamawehaweha.

⁶Mulako wa khalayi waaraseliwe ni Yoiyada, mwaana mulopwana a Paseiya ni Mexulami, mwaana mulopwana a Besodeya. Yaahelela isereemu yiikaatheraka maselaaya, etthaabwa yoowalela ni anampattika mmapuronimwaya.

⁷Mukhwipimwaya waaraseliwe ni Melatiya a oGibiyoni ni Yadoni a oMerenoti — asilopwana a oGibiyoni ni oMizepa, ilapo saalamuliwa ni guvernadori a okhopela wa Efratesi.

⁸Uziyeli, mwaana mulopwana a Harahaya, mmoha a anamahana a eyuuma yoorikaxa, aarasela mpatta onttharelana ni mukhwipimwawe Hananeya, mmoha a anamweeka a soowunkhela, aarasela. Awosa yaarasela oYerusaleemu mpaka Exiri Yoothanuwa.

⁹Refaya, mwaana mulopwana a Huri, namalamula a mpatta mmoha wa oYerusaleemu, aarasela mpatta waattharelana.

¹⁰Mukhwipimwawe Yedaya, mwaana mulopwana a Harumafi, aarasela ohoolo wa empaawe ni mukhwipimwawe Hatuxi, mwaana mulopwana a Haxabeneya aarasela.

¹¹Malekiya, mwaana mulopwana a Harimi, ni Paxubi, mwaana mulopwana a Pahati-Mowabe, yaaraselasa mpatta mukina ni Etoore* ya Maikho.

¹²Xalumi, mwaana mulopwana a Haloxexe, namalamula a mpatta mukina wa oYerusaleemu, aarasela mpatta waattharelana ni ekhavihero ya anamwanaawe asithiyana.

¹³Mulako wa Oreyareyani waaraseliwa ni Hanuni ni atthu a oZanowa. Yaahelela isereemu yiikaatheraka maselaaya, etthaabwa yoowalela ni anampattika mmapuronimwaya. Yaaraselasatho imeetru* macira maxexe ni miloko mithanu sa exiri mpaka Mulako wa Osalani.

¹⁴Mulako wa Osalani waaraseliwa ni Malekiya, mwaana mulopwana a Rekabi, namalamula a elapo ya oBet-Hakeremi. Aahelela isereemu iikaatheraka maselaaya, etthaabwa yoowalela ni anampattika mmapuronimwaya.

¹⁵Mulako wa Onaattuuttuni waaraseliwa ni Xaluni, mwaana mulopwana a Kol-Hoze, namalamula a elapo ya oMizepa. Aarasela, anathomeela nipatho, iikaatheraka maselaaya, etthaabwa yoowalela ni anampattika mmapuronimwaya. Aaraselatho exiri ya ntthiya na Silowami, vakhiviru wa nttimbe na mwene mpaka ixikada sinkhuruwela esidade ya Davide.

¹⁶Mukhwipimwawe Nehemiya, mwaana mulopwana a Azebuki, namalamula a mpatta mmoha wa elapo ya oBet-Zuri aarasela mpaka ohoolo wa mahiye a Davide, mpakatho ntthiya noothimpwa ni empa ya anakhotto oosuwanyeyaxa.

¹⁷Mukhwipimwawe aLeevi yaalamuliwa ni Rehumi, mwaana mulopwana a Bani, yaarasela ni mukhwipimwaya Haxabeya, namalamula a mpatta mmoha wa elapo ya oKeyila, aarasela mpattaawe.

¹⁸Mukhwipimwawe asikhwaawe yaalamuliwa ni Bavai, mwaana mulopwana a Henadadi, namalamula a mpatta mmoha wa elapo ya oKeyila yaarasela.

¹⁹Mukhwipimwawe Ezeri, mwaana mulopwana a Yexuwa, namalamula a oMizepa, aarasela mpatta mukina, apaceraka mpatta wa ottuttuwani awelelaka mpatta wa empa ya ikapwitthi, mpaka vanloothoni na exiri.

²⁰Mukhwipimwawe Baruki, mwaana mulopwana a Zabai, aarasela ni nthiti mpatta mukina, okhuma vanloothoni mpaka vamulako wa empa ya Eliyaxibi, mutokweene a asaserdoti*.

²¹Mukhwipimwawe Meremoti, mwaana mulopwana a Uriya, mwaana mulopwana a Hakozi, aarasela mpatta mukina, okhuma vamulako wa empa ya Eliyaxibi mpaka ommaleloniwaya.

²²Woottharelana asaserdoti* a ilapo sa mukhwipimwaya yaarasela.

²³Mukhwipimwaya Benyamini ni Haxubi yaarasela ohoolo wa impasaya, ni woottharelana Azariya, mwaana mulopwana a Mahaseiya, mwaana mulopwana a Ananiya, aarasela mpatta wa owannyawe.

²⁴Mukhwipimwawe Bavai, mwaana mulopwana a Henadadi aarasela mpatta mukina, okhuma empa ya Azariya mpaka vanloothoni na exiri.

²⁵Vano Palali, mwaana mulopwana a Uzai, aarasela ohoolo wa nlootho na exiri ni na etoore* ekhumme vanankatthani a empa ya mwene, vakhiviru wa nipuwa na namalipelela. Mukhwipimwawe Pedaya, mwaana mulopwana a Paroxi,

²⁶vamoha ni arumeiyi a Empa ya Muluku yaamanke vanttumuxani na Ofeli, yaarasela mpaka ohoolo wa Mulako wa Maahi mpatta wa ninkhuma nsuwa ni wa etoore* ekhumme weiwe.

²⁷Mukhwipimwaya asilopwana a oTekowa yaarasela mpatta mukina, okhuma etoore* etokotoko mpaka exiri ya Ofeli.

²⁸Vasulu wa Mulako wa Ekavalu* asaserdoti* yaarasela, khula musaserdoti* ohoolo wa empaawe.

²⁹Mukhwipimwaya, Zadoki, mwaana mulopwana a Imeri aarasela mpatta wa ohoolo wa empaawe. Woottharelana Xemaya, mwaana mulopwana a Xekaneya, namalipelela a mulako wa mpatta ninkhuma nsuwa aarasela.

³⁰Mukhwipimwawe Hananiya, mwaana mulopwana a Xelemiya, ni Hanuni, mwaana mulopwana anaathannamosa a Zalafi, yaarasela mpatta mukina. Mukhwipimwaya Mexulami, mwaana mulopwana a Berekiya, aarasela ohoolo wa aakonaawewo.

³¹Mukhwipimwawe Malekiya, mmoha a anamahana a eyuuma yoorikaxa, aarasela mpaka empa ya arumeiyi a Empa ya Muluku ni ananakoso, ohoolo wa Mulako wa Namalipelela mpaka ekwartu eri vasulu vanloothoni.

³²Vano anamahana ni ananakoso yaarasela okhuma ekwartu vasulu vanloothoni mpaka Mulako wa Ikhondoolo.