Read Makhuwa-Shirima Nehemiya 5 Bible Online

Nehemiya 5 - Makhuwa-Shirima bible

Nehemiya 5

¹Vano asilopwana ni axaaraya yaapacerasa waattaandawula axunnaya aYuda.

²Akina yeera: “Hiyo vamoha ni anamwanaahu asilopwana ni asithiyana nohaatta. Nintthuna etrigu weera nipwaherere ni okhumi.”

³Akina yeera: “Nneemexera imattasahu, imattasahu sa iwuuva* ni impasahu weera niphwanye etrigu yoowiivano etala.”

⁴Nlelo akina yeera: “Nnooliha musurukhu weera nilivele musoko wa mwene wa imattasahu ni imattasahu sa iwuuva*.

⁵Nrookhalaru emusi emohamoharu ni axunnihu, ni anamwanaahu asilopwana okhala ooreera antoko a yaawosa, nlelo hiiho, anamwanaahu asilopwana ni asithiyana naakhaliheke ipottha. Vekhaikhai akina a anamwanaahu asithiyana aakhalihiwa ipottha, mene khaningwera opaka etthu neenre niweemexerela imattasahu ni imattasahu sa iwuuva*.”

⁶Kiiwakaru otaandawulawaya ni soowoothera iye, kaanyoonyiwa vancipale.

⁷Kaaneelela sootheene ni kaahaahiiha maneethi ni asitokweene, kiweerelaka: “Nyuwosa munaakokoca axunninyu moota woohitthuneya!” Vano kaahaalattulela muthukumano mutokotoko.

⁸Kaaheera: “Moota naaweraahu, nohaathuma axunna aYuda wa amalapo. Vano nyuwo munoovira mwaathumihaka moota wooweera hiyo naathumetho!” Awo yaari emaalelo, niwoko khayaarino yoowaakhula.

⁹Kaapwaherera: “Yeeyo mumpakaanyu kheereenre. Nyuwo mweettaseke mmoovaka Mulukwaahu weera nihipuheriwe ni amalapo ari amwiittanaahu.

¹⁰Miyo, vamoha ni axunna ni atthwaaka oororomeleya nneera noolihaka musurukhu ni etrigu wa muloko. Vano mmaliheke okokoca musoko moota woohitthuneya!

¹¹Mwaahokoloxerase khuluwi imattasaya, imattasaya sa iwuuva* ni sooliveira*, impasaya nitho musoko mphwannyaanyu mwaakokocaka, mpatta wanaancira wa musurukhu, etrigu, eviinyu ni makhura.”

¹²Awo yaahaakhula: “Nnimwaahokoloxerasa sootheene muhimmaanyu ni khannaanyesereratho etthu. Nnoopaka yeeyo mumvekelaanyu.” Kaawiitthana asaserdoti* ni vamaithoniwaya kaahaalipeliha maneethi ni asitokweene weera anookwaniherasa yoororomeliha epakeiye.

¹³Kaatathatho mukaandyowaaka keeraka: “Muluku atatheke hiiho empa ni sooreela sa khula mutthu aneera ahikwanihere yoororomelihaawe. Mutthweene yoowo atathiwe ni ahale hiiho.” Wiiwaka yeeyo muthukumano wootheene waaheera: “Ame!*,” Waamvuwiha Yave. Vano atthu yaakwanihera yeeyo yaaroromelinghaaya.

¹⁴Ohiya toko yeeyo, wa iyaakha muloko ni piili, okhuma vayaakhani yanaamiloko miili ya mwene Aritaxaxete mpaka eyaakhaawe yanaamiloko miraru ni piili, miyo kaakhalihiwaaka ntoko guvernadori a elapo ya oYuda, vano hata miyo naari axunnaka khannace sooca soopakeliwa guvernadori.

¹⁵Maguvernadori a khalayi, yaale yaalamula kihinaaye miyo, yaalemelihaxa muloko yaakhelaka wa yoowo ixekeli* miloko mixexe sa eparatha* ohiya sooca ni eviinyu. Anamakhaviheraayatho yannahasula muloko. Vaheera kimoovaka Muluku, nkeettela yeeyo.

¹⁶Ohiyanawaya, miyo muneenaaka kaakhalela nthiti muteko wa exiri ela. Atthwaaka ootheene oororomeleya yaathukumanyihiwawo omutekoni. Hiyo khanaathummeru naari mwaamatta.

¹⁷Ohiya ikina iyo, atthu ncira ni miloko mithanu variyari wa aYuda ni asitokweenaaya yaaca vameesaniwaka, mpakatho atthu a miloko soowaattamana yaarweela onixekura.

¹⁸Khula nihuku yaarehereriwa yawaka emombe elopwana emoha, ikhondoolo ithannamosa sooreerela ni ilakhu sikina ni khula nihuku nanaamuloko miyo kannaakhela moota woohiyanahiyana wa eviinyu. Waarookhalaru hiiho, nkinanyeserere yooca yoopakeliwa guvernadori, niwoko muloko wannalemelihiwa ni miteko soolipaxa.

¹⁹Mukuupuwelele ni murima wooreera, Yave, niwoko na sootheene seiye kipakenlaaka muloko ola.