Read Makhuwa-Shirima Nehemiya 8 Bible Online

Nehemiya 8 - Makhuwa-Shirima bible

Nehemiya 8

¹Ophiyerakaru mweeri wanaathanamiili, atthu emankeene mmittetthenimwaya, ootheene yaathukumana ni murima mmoha vanipuwani ohoolo wa Mulako wa Maahi. Yaamvekela Ezera, namalepa, oruuha Elivuru ya Nlamulo na Moisesi, mwa yeeyo Yave aavanghaawe aYixrayeli.

²Vano vanihukuni noopacera na mweeri wanaathanamiili musaserdoti*, Ezera, aaruuha Nlamulo ohoolo wa muthukumano wootheene wa asilopwana, asithiyana ni ootheene yaawera wiiwexexa.

³Aasoma arumihaka okhuma oxeexelo mpaka othana eriyari vanipuwani ohoolo wa Mulako wa Maahi, vamaithoni wa asilopwana, asithiyana ni yaawo yaawera wiiwexexa. Atthu ootheene yaawiriyana nnenesene osommwa wa Elivuru ya Nlamulo.

⁴Namalepa, Ezera, aaheemela musulusulu waapakeleliwe ni itthaabwa wa ehuhuweene yeele. Mukhwipimwawe, moonowaawe mulopwana, eemenle Matiteya, Xema, Anaya, Uriya, Hilikiya ni Mahaseiya ni moonowaawe muthiyana Pedaya, Mixayeli, Malekiya, Hasumi, Haxebadana, Zakariya ni Mexulami.

⁵Ezera aakhunula elivuru. Vano aari oowooneya wa atthu ootheene, niwoko eemenle musulusulu. Vanonto, akhunulakaru elivuru, atthu ootheene yaaheemela.

⁶Ezera aamutthapela Yave, Muluku Mutokweene ni ootheene yaaheemexa matata yaakhulaka: “Ame*! Ame*!” Vahoolowaya yaamulapa Yave, yuuramihenleene ikhovesaya vathi.

⁷aLeevi Yexuwa, Bani, Xerebeya, Yamini, Akubi, Xabetai, Hodiya, Maseiya, Kelita, Azariya, Yozabade, Hanani ni Pelaya yaahaaxuttiha atthu munlamuloni, ootheene yeemenleene vaavaale.

⁸Yaasoma elivuru ya Nlamulo na Muluku yaataphulelaka ni yaathaliheraka weera atthu yiiwexexe yeeyo yaasommwa.

⁹Vano guvernadori, Nehemiya, musaserdoti*, Ezera, ni namalepa, ni aLeevi yaaxuttiha atthu, yaaweerela: “Nihuku nna nitteeliheriwe Yave Mulukwaahu. Muhithanane naari muhiinle.” Yeereenle yeeyo, niwoko atthu ootheene yaamwiinla yiiwaka masu a Nlamulo.

¹⁰Nehemiya aaweerela: “Mpwahaseke, mwaceeke ni mwawure sooreerela muraanyuno. Mwaameeleke yaawo ahireherenre etthu. Nihuku nna nitteeliheriwe Yave. Muhithanane niwoko ohakalala wa Yave ti ikurusanyu.”

¹¹aLeevi yaahaakurunuxa atthu ootheene yeeraka: “Mmaaleke, muhithanane, niwoko nihuku nna ti nihuku nootteela.”

¹²Atthu ootheene yaattimula weera yace ni yawure, yaameelaka yaawo yahaareherenre etthu. Yaapaka efesta ehakalalaxaka, niwoko vano yaahiiwexexa masu yaathaliheriwaaya.

¹³Vanihukuni nanaaveeli na mweeri ole mapwattapwattha a imusi sootheene vamoha ni asaserdoti* ni aLeevi yaathukumana ni namalepa Ezera, weera esomele masu a Nlamulo.

¹⁴Munlamuloni yaahoonelela weera Yave aalamula mwa Moisesi weera aYixrayeli ekhaleke mmikotthani mweehuhuni ya mweeri wanaathannamiili.

¹⁵Muluku aalamulatho weera elaleiyeke mmittettheni ni oYerusaleemu masu ala: “Murowe onyaakoni, mwaruuhase iphandi sa sooliveira* sa mmatta ni sa ntuphini, iphandi sa murta*, mavare ni sa nyiri sikina weera mpakase mikottha, ntoko elempwalaaya.”

¹⁶Atthu yaarowa, enaruuha iphandi, enateka mikottha mutaratonimwaya, mmapuwani a impasaya ni a Empa ya Muluku, vanipuwani na esidade, vakhiviru wa Mulako wa Maahi ni vanipuwani na Mulako wa Efrayimi.

¹⁷Ootheene yaahokolongwe woovariwani yaatekasa mikottha, enakhalamo. Okhuma mahuku a Yoxuwa, mwaana a Nuni, mpaka nihuku nenenenne aYixrayeli khaanapake efesta moota ole. Vano yaahakalalaxa.

¹⁸Khula nihuku, okhuma nihuku noopacera mpaka nookisera na efesta, Ezera aasoma elivuru ya Nlamulo na Muluku. Yaapaka efesta wa mahuku mathannameeli ni nihuku nanaathanaararu waakhala muthukumano, ntoko nlamulo ninnyesereraaya.