Read Makhuwa-Shirima Nehemiya 9 Bible Online

Nehemiya 9 - Makhuwa-Shirima bible

Nehemiya 9

¹Vanihukuni nanaamiloko miili ni maxexe na mweeri, aYixrayeli yaathukumana, etthukaka, ewaraka isaakho eniihelasa ettuura mmuru.

²Vano aYixrayeli yaamwalamwala ni anamarwa. Yaaheemela mmapuronimwaya elapaka sootthekasaya ni sootakhala sa makholowaaya.

³Yaaheemela mmapuronimwaya esomaka elivuru ya Nlamulo na Yave Mulukwaaya wookwana iwoora tthaaru ni yaavirihatho iwoora tthaaru elapaka sootthekasaya, emutthapelaka Yave Mulukwaaya.

⁴Yeemenleene musulusulu yaari aLeevi ala: Yexuwa, Kademiyeli, Xibaniya, Buni, Xerebiya, Bani ni Kenani, mwa yaawo yaamukhuwelela Yave Mulukwaaya.

⁵aLeevi Yexuwa, Kademiyeli, Haxabiniya, Xerebeya, Hodiya, Xibaniya ni Petahiya yaaheera: “Mweemele muntthapeleke Yave Mulukwaanyu ori oohimala.” Nsinananyu noovuwaxa nreelihiwe. Nivuwihiweke woopwahaxa mareeliho ni otthapela wootheene.

⁶Nyuwo paahi ti Yave. Moopattuxa erimu ya osulusulu ni ithenyeerisaya; elapo ya vathi ni sootheene sirimo; iphareiya ni sootheene sirimo. Moovaha okumi wa itthu sootheene ni anakhotto a wiirimu annoolapani.

⁷“Nyuwo ti Yave Muluku aamuthanlale Abraamu amukhumihaka wUri wa oKaldeya, anamutteha Abrahaamu.

⁸Mwaahoona weera murimaawe waari woororomeleya wa Nyuwo, mwaakhaliha wiiraana ni yoowo muroromelihaka ovaha ekhapiraawe ilapo sa aKanaani, aHiti, awAmori, aPerizi, aYebusi ni aGirgasi. Vano mookwanihera yoororomelihaanyu, niwoko ti oororomeleya.

⁹Mwaahoona ohaawa wa asitithihu wExipitu ni mwaahiiwa okhuwelawaya mphareiyani Yooxeera.

¹⁰Mwaampakela ineneero ni sootikhiniha Farawu*, asitokweenaawe ootheene ni atthu ootheene a elapwaawe, niwoko mwaasuwela moota yaahasulaaya mulokwaanyu. Mwaawina epili etokotoko empwaherera mpaka olelo va.

¹¹Mwaakawanyiha ephareiya ohoolowaya weera elapuwe woowuumeene. Vaheera mwaahaavonyera anamattharattharaaya moowiixera, ntoko nluku mmaahini a niipili.

¹²Khula nihuku mwaaweettiha ni nrimbu na mahutte ni khula ohiyu ni nrimbu na mooro weera mwaamwaleele ephiro yaaviraaya.

¹³Mwaakhuruwela vamwaakoni Sinayi. Mwaawuulumano muri wiirimu. Mwaahaavaha miruku sooreera, malamulo a ekhaikhai, ikano ni soonyesereriwa sooreerela.

¹⁴Mwaahaasuweliha nihukunanyu nootteela na eSaabadu ni mwaahaavaha miruku, ikano ni malamulo mwa murumeiyaanyu Moisesi.

¹⁵Yaavoliwaaya etala, mwaahaavaha sooca saarweela wiirimu ni yaavoliwaaya ntthona mwaahaakhumihera maahi vamwala. Mwaahaalamulela ovolowa ni okuxa elapo mwaalipenlaanyu mwaaroromelihaka waavaha.

¹⁶Wa soothesene, asitithihu yaahiixoona ni yaahuumiha mirima ehiiwelelaka malamulowaanyu.

¹⁷Yaakhootta owiiwani ni yaattiwala sootikhiniha mwaapakenlaanyu. Yaahuumiha mirima moovaanyanimwaya, emuthanlaka mutokweene weera ehokoleele mpotthanimwaya. Wa soothesene, Nyuwo ti Muluku onlevelela; moosareya mahala ni ikharari; oopisa onyoonyiwa ni oosareya osivela. Tivawo mwahaahingyaanyu,

¹⁸yaarimwiipakelaru muluku oowootha mmukhaleloni wa mwaamombe, yeeraka: ‘Ola ti mulukwaanyu mwa yoowo ookhumihaleni wExipitu,’ hata yaapakaaya sooveiha soonanaraxa.

¹⁹Niwoko na ikhararisanyu sitokotoko khamwaahingye munikareni. Khula nihuku nrimbu na mahutte naaweettiha mphironi ni hiihotho khula ohiyu nrimbu na mooro naahaamwaleela ephiro yaatthuneya ovira.

²⁰Mwaahaavaha Munepaanyu Wooreera weera waalake. Mwaahaavaha emanaanyu* yaacaaya ni maahi yaawuraaya.

²¹Wookwana iyaakha miloko mixexe Nyuwo mwaahaaciha munikareni. Yaakhalano sootheene saatthuneya ni soowarasaya khasaathaalaru ni inawosaya khasiiparu.

²²Mwaahaavaha omwene ni miloko mwaakawanyeraka seiyo. Yaawina elapo ya Sihoni, mwene a oHexeboni, nitho elapo ya Ogi, mwene a oBaxani.

²³Mwaahaakhaliha anamwanaaya asilopwana oowaattaxa ntoko ithenyeeri sa wiirimu ni mwaahaavolonghasa mweelaponi, mwa yeeyo mwaaroromelinghaanyu asitithaya.

²⁴Anamwanaaya asilopwana yaavolowamo, enawina elapo. Mwaahaawina ohoolowaya aKanaani mwa yaawo yaamankemo. Mwaawinnyerera aKanaani vamoha ni mamwenaaya ni atthu a elapweene yeele weera aYixrayeli yaapake yaatthunaaya.

²⁵Yaawina isidade soolipaxa ni ilapo sa ethaadyira; yaakuxa impa soosareya sooreela; ihime soothimpwa; imatta sa iwuuva* ni sooliveira* ni nyiri soowiima sincipale. Yaahooca mpaka yaavona, enacihiwa, nnenesene epuhasaka wa onnenaanyu otokotoko.

²⁶Wa soothesene, yaari oohiiwelela yoovaanyakani. Yaarera ettuli Nlamulonanyu. Yaawiiva maprofeetaanyu, mwa yaawo yaawooperera weera yoohokoleeleni Nyuwo. Yaapaka sootakhala sitokotoko.

²⁷Tivawo mwaawinnyerenraanyu mmatatani mwa amwiittanaaya weera ehooxiwe. Vano ehooxiwakaru, yaahookhuwelelani Nyuwo. Mwaawiiwa muri wiirimu ni ikhararisanyu sitokotoko munaavahasa anamatapuxa, mwa yaawo yaatapunxe mmatatani mwa amwiittanaaya.

²⁸Ephwanyakaru murettele, yaapakatho yeeyo mwahaatthunaanyu. Vano mwaawinnyerera mmatatani mwa amwiittanaaya weera elamuliwe ni yaawo. Vanonto yookhuwelelaayanitho, mwaangwiiwa muri wiirimu ni ikhararisanyu, mwaatapuxaka emaara ti emaara.

²⁹Nyuwo mwaawooperera weera ehokoleele Nlamulonanyu, mene awosa yaahiixoona ehiiwelelaka malamulowaanyu. Yaatthekela ikanosanyu, mwa seiyo sintthuneya wiiwelela weera ekhale ni okumi. Ni murima woowuuma yaahoorerani ettuli, ekhalaka attiyamaaru, ehitthunaka owiiwani.

³⁰Wa iyaakha sincipale mwaahaavilela. Mwannawooperera mwa Munepaanyu ni mwa maprofeeti. Hata hiiho, khayaawiiwelelani moota wooweera mwaawinnyerera mmatatani mwa miloko soowaattamana.

³¹Wa soothesene, mukhararinimwanyu sitokotoko khamwaaphwante naari khamwaahingye, niwoko Nyuwo ti Muluku oosareya mahala ni ikharari.

³²Vano, Mulukwaahu ori Muluku Mutokweene, a ikuru ni oovuwaxa, mwa Yoowo onttittimiha wiiraanawawe wa osivela ni oosareya ikharari, mukhaleke oopwatthela othanana wootheene wu onirweenle hiyo, mamwenaahu, asitokweenaahu, asaserdotaahu, maprofeetaahu, asitithihu ni mulokwaanyu wootheene, okhuma mahuku a mamwene a wAsiriya mpaka olelo.

³³Mwaari oororomeleya mwa sootheene saanikhumelela. Mweettenle moota woororomeleya naaroohiroromeleyaru.

³⁴Mamwenaahu, asitokweenaahu, asaserdotaahu ni asitithihu khayaattharinghe Nlamulonanyu; khayiiwelenle soolamulelasanyu naari owoopererawanyu.

³⁵Yaarookhalaru moomwenenimwaya epuhaka oreerawanyu otokotoko, mweelaponi yoothanuwa ni yooruwereya mwaavanghaanyu, awosa khayoorumeenleni hata khayaahiya iphirosaya sootakhala.

³⁶Moone, hiyo olelo nri ipottha, aani ipottha mweelaponi mwaavanghaanyu asitithihu weera eceeke soowiimasaya ni sooreela sikina siniimamo.

³⁷Soohepha soowaattaxa siri sa mamwene annilamula niwoko na sootthekasahu. Annilamula hiyo ni mihuwosahu ntoko antthunaaya. Othananawahu ti otokotoko.”

³⁸“Vano niwoko na sootheene seiya, nimpaka wiiwanana woolipaxa — mpakatho nilepaka. Asitokweenaahu, aLeevi ni asaserdotaahu animwaakhulela ni olepa.”