Read Makhuwa-Shirima Exteri 3 Bible Online

Exteri 3 - Makhuwa-Shirima bible

Exteri 3

¹Vahoolo wa yookhumelela ele, Ahaxeveroxi aamuttittimiha Hamani, mwaana mulopwana a Hamedata, ngwAgagi, amvuwihaka ni amvahaka nipuro noottittimiheyaxa noowaapwaha maneethi ootheene akina.

²Arumeiyi ootheene a mwene yaari vamulako wa mwene yannuurama ekokhoraka emuttittimihaka Hamani, ntoko aalamulenlaawe mwene. Wa soothesene, Mordekai khuuramaru hata khaamukokhorelaru.

³Arumeiyi a mwene yaari vamulakwaawe yaamukoha Mordekai: “Munramburelani nlamulo na mwene?”

⁴Khula nihuku awosa yannamuleela, mene owo khaawiriyana eeraka muYuda. Tivawo yaamuthalihenraaya Hamani weera yoone owo aakhulela mweettelo wa Mordekai.

⁵Hamani oonaka weera Mordekai khuurama hata khaakokhora, aanyoonyaxiwa.

⁶Wa soothesene, asuwelaka muloko wa Mordekai, aalakela ohimwiiva Mordekai paahi. Ohiyanawaya, aasaasa moota woowiiva aYuda ootheene moomweneni wootheene mwa Ahaxeveroxi, eyo tiiyo muloko wootheene wa Mordekai!

⁷Mweeri woopacera wa eyaakha yanaamuloko ni piili ya olamula wa Ahaxeveroxi, mweeri wa Nisani, yaapaka macitta yiitthaniwa Puri ohoolo wa Hamani weera ethanle nihuku ni mweeri wa owiiva. Waareereliwe mweeri wanaamuloko ni miili wiitthaniwa Adari.

⁸Vanonto Hamani aamweerela Ahaxeveroxi: “Wookhala muloko woomwalamwaleya variyari wa miloko sikina mweelaponi sootheene sa omwenaanyu mwa yoowo ikhovelelosaya soovirikana ni sa miloko sootheene sikina. Atthu a muloko owo khaaniiwelela malamulo a mwene. Khoophwanenle waahiya epakaka seiyo.

⁹Woosivelani amwene, mulamulele ophwatiwawaya. Miyo nkihele italentu* macira macireene muloko sa eparatha* onsungiwa muhakhu wa mwene weera sivareliwe muteko ni yaawo eneera ekwanihere ophwatiwawaya.”

¹⁰Iiwakaru yeeyo, mwene aamurula munelaawe woottittano, anamvaha Hamani, mwaana mulopwana a Hamedata, ngwAgagi, mwiittana a aYuda,

¹¹amweerelaka: “Musurukhu ti wawinyu. Mpakele muloko owo yeeyo enooreerelani.”

¹²Hiiho, munihukuni nanaamuloko ni mararu na mweeri woopacera, anamalepa a mwene yaathukumanyihiwa. Hamani aalamulela weera silepiwe ikaratta munuulumoni ni elepelo ya khula muloko erumiheliwaka mapwattapwattha a mwene, wa maguvernadori a ilaposawe sootheene ni wa ahooleli a khula muloko. Sootheene saalempwe mwa nsina na mwene sittittiweene ni munelaawe.

¹³Ikaratta saarumiheliwe ilapo sootheene sa mwene ni anamitthenga silamulelaka waamaliha ni waahoonona woomalela aYuda ootheene — amiravo ni asitokweene; asithiyana ni anamwane. Eyo yaatthuneya opakeya nihuku nimoharu, nri nihuku nanaamuloko ni mararu na mweeri wanaamuloko ni miili, oniitthaniwa Adari. Saalamulelatho weera ehuhuleliwe sooreelasaya.

¹⁴Ekaratta yaalempwale siweheriwaka sikina sa ekano ya Hamani waatthuneya osuwelihiwa ntoko nlamulo wa khula elapo sisuwelihiwaka miloko sootheene weera sikhale soolikaneene nihuku nno.

¹⁵Munlamuloni na mwene anamitthenga yaavenyasa woowaakuveya ni ekano yaalaleiwa musidadeni yoolipihiwa ya oSusa. Mwene ni Hamani yaakilaathi weera ewure; vaheera esidade ele yaari ni minyakunyaku.