Read Makhuwa-Shirima Exteri 4 Bible Online

Exteri 4 - Makhuwa-Shirima bible

Exteri 4

¹Mordekai asuwelaka sootheene saakhumelenle, aahaahula soowarasawe, anawara esaakho, aniihela ettuura, anakhuma musidade iinlaka ni alalamikaka vancipale.

²Aarowa mpaka vamulako wa mwene, mene khaavolongwe, niwoko khaatthuniheriwa ovolowa mutthu oowara esaakho.

³Khula elapo yaaphiyalaayawo ekano ele ni nlamulo na mwene waakhala wiikhupanyera otokotoko variyari wa aYuda, enatthuka, eniinla, enalalamika. Ancipale yiixaatalela vasaakhoni yiihenleene ettuura.

⁴Arumeiyi asithiyana ni inoko saawehaweha asithiyanaawe mwene emuthaliherakaru Exteri yaamweerela Mordekai, owo aathananaxa. Aamurumihela soowara weera aware ni arule esaakho, mene owo khaakhelenle.

⁵Vano Exteri aamwiitthana Hataki, enoko* emoha ya mwene aathanliwe weera amurumeele Exteri, anamulamulela weera asuwele enimukacamiha Mordekai ni heeni ompakaawe hiiho.

⁶Hataki aarowa wuuluma ni Mordekai vanipuwani na esidade, ohoolo wa mulako wa mwene.

⁷Mordekai aamuthalihera sootheene saamukhumelenle ni moota wa musurukhu Hamani aaroromelinghaawe ohela onsungiwa muhakhu wa mwene weera ephwatiwe aYuda.

⁸Aamvahatho ekaratta yaalempwale siweheriwaka sikina ya ekano yuuluma sa ophwatiwa wa aYuda ni yaasuwelihiwe oSusa weera owo amoonihere Exteri. Mordekai aamuleela enoko* omunyesereriha Exteri weera aphiye vamaithoni wa mwene amudyoonttelelaka ni ikharari mwaha wa mulokwaawe.

⁹Hataki aahokolowa, anamuthalihera Exteri sootheene Mordekai aamuleenlaawe.

¹⁰Vanonto, Exteri aamulamula Hataki omweerela Mordekai ha:

¹¹“Asitokweene ni atthu ootheene a ilapo sa mwene aasuwela weera eri ekano emoha paahi wa akhalaru mulopwana hoye hoye muthiyana anaamwaattamele mwene vanipuwani na mpuwa ahiitthaniwe ni yoowo — onimwiiviwa, mwene aahimookolela ekopwaawe ya eyuuma yoorikaxa amuurelaka okumi. Aavira mahuku miloko miraru kihiitthaniwaka vamaithoni wa mwene.”

¹²Mordekai aakhelelakaru yoowaakhula ya Exteri

¹³aalamulela oleeliwa: “Muhuupuwele weera, mweenre mukhala mpaani mwa mwene, mmoopowe nyuwo paahi eriyari ya aYuda ootheene.

¹⁴Nyuwo mwaahuuluma mweehuhuni ntoko ela, ekhavihero ni otapuxeya wa aYuda onuurweele mpatta mukina, mene nyuwo ni emusi ya atithinyu munimookhwa. Onoowereya weera mvarelingwe opwiyamwene niwoko na ehuhu ntoko ela.”

¹⁵Vano Exteri aamurumihela Mordekai yoowaakhula ela:

¹⁶“Murowe mwaathukumanyihe aYuda ootheene ari oSusa ni mwatthuke mukeerelaka miyo. Muhice naari muhiwure othana ni ohiyu miraru. Miyo vamoha ni arumeiyaaka asithiyana ninootthuka ntoko nyuwosa. Vahoolowaya kinoowaattamela amwene onoohitthunihereyaru munlamuloni. Wakhala okhwa, nkikhweeke!”

¹⁷Hiiho Mordekai aavenya anapaka sootheene Exteri aamulamulenlaawe.