Read Makhuwa-Shirima Exteri 5 Bible Online

Exteri 5 - Makhuwa-Shirima bible

Exteri 5

¹Eviraleene mahuku mararu, Exteri aawarela sa epwiyamwene, aneemela vanipuwani na mpuwa wa empa ya mwene ohoolo wa esaala ya mwene. Mwene aari vahiceniwawe oluluwana wa mulako.

²Amoonakaru pwiyamwene Exteri vanipuwani vale aammorela ikharari, anamookolela ekopwaawe ya eyuuma yoorikaxa aavarenlaawe. Vano Exteri aamwaattamela, anatava okhwipi wa ekopo.

³Mwene aamukoha: “Pwiyamwene Exteri, muntthunani? Yoovekaanyu eheeni? Hata okhalaka eriyari ya omwenaaka, munoovahiwa.”

⁴Exteri aamwaakhula: “Woosivelani amwene, mungwaane Hamani ofestani kireherenraaka.”

⁵Mwene aaheera: Munruuheke woowaakuveya Hamani weera nipake yeeyo Exteri omvekelaawe.” Hiiho mwene ni Hamani yaarowa ofestani Exteri aareherenraawe.

⁶Ewuraka eviinyu hiihaale, mwene amukohatho Exteri: “Yoovekaanyu eheeni? Nyuwo munimwaakhuleliwa. Munghaawela eheeni? Hata okhalaka eriyari ya omwenaaka, munoovahiwa.”

⁷Owo aamwaakhula: “Yoovekaaka ni yoohaawelaaka ti ela:

⁸Amwene mwasivelihiwa ni miyo ni woosivelani wiiwa ni waakhulela yoovekaaka, nyuwo ni Hamani murwaase omaalo ofestani kineeraaka kooreherereleni. Vaavaawo kineeraaka kiwaakhuleni yookohaanyu.”

⁹Nihuku nne Hamani aavenya ootteeliweene ni ohakalala. Wa soothesene, amoonaka Mordekai vamulako wa mwene ahuuramaka naari ahimuttittimihaka, aamunyoonyeraxiwa.

¹⁰Waarookhalaru hiiho, Hamani kheewo aapankaawe, anarowa owaani. Awiitthanaka asinthamwenaawe ni mwaarawe Zerexi,

¹¹aahiivuwiha niwoko na mihakhusawe sincipale, anamwanaawe asilopwana ancipale ni moota aamuttittimihalaawe mwene amukhalihaka mutokweene a maneethi ni asitokweene akina.

¹²Owo aahaandyeerera: “Ohiya yeeyo, pwiyamwene Exteri okilattunle yoomiru weera kaahoole amwene ofestani owo aarehererenlaawe. Ookilattula orowawo omaalo ni amwene.

¹³Vaheera sootheene iyo khasinkihakalaliha miyo kimoonaka muYuda Mordekai akilaantheene vamulako wa mwene.”

¹⁴Mwaarawe Zerexi ni asinthamwenaawe ootheene yaamweerela: “Mulamulele weera otekiwe wootthukeleliwa kuleele, orakamawaya imeetru* miloko miili niithanu ni oxeexeleru mwaavekele amwene weera Mordekai atthukeleliwewo. Vahoolowaya mwaahooleke amwene ofestani mutteeliweene.” Miruku saamusiveliha Hamani, analamulela otekiwa wootthukeleliwa kuleele.