Read Makhuwa-Shirima Exteri 8 Bible Online

Exteri 8 - Makhuwa-Shirima bible

Exteri 8

¹Nihuku nenenenne mwene aamvaha pwiyamwene Exteri sooreela sootheene sa Hamani, mwiittana a aYuda. Mordekai aaronghiwa vamaithoni wa mwene, niwoko Exteri aamuthalihera weera aari mmusaawe.

²Mwene aamurula munelaawe woottittano aamurunlaawe Hamani, anamvaha Mordekai. Vano Exteri aamukhaliha namawehaweha a vaate wa Hamani.

³Vanonto Exteri aamudyoonttelelatho mwene iinlaka mmettonimwawe weera ahiihe yoovaanela yoonanara ya Hamani, muGagi, aavaanelenlaawe aYuda.

⁴Mwene aamookolela ekopo ya eyuuma yoorikaxa ni owo aaheemela ohoolowawe eeraka:

⁵“Woosivelakani amwene, kaphwanya mahala vamaithoniwanyu ni muupuwela weera ti etthu ya ekhaikhai, mulepe nlamulo nikina nimalihaka nne muGagi Hamani, mwaana mulopwana a Hamedata, aalempaawe weera aYuda emalihiwe mweelaponi sootheene sa mwene.

⁶Nkingwera ovilela woowoona mulokwaaka omoreliwaka mahooxo. Nkingwera ovilela woowoona ophwatiwa wa emusaaka!”

⁷Mwene Ahaxeveroxi aamwaakhula pwiyamwene Exteri ni Mordekai muYuda: “Eenre Hamani aawananaka aYuda, koomvaha vaatewawe Exteri ni koolamula weera owo atthukeleliwe kuleele.

⁸Vano mulepe ekano ekina mwa nsina na mwene ngweerelaka aYuda moota oneeraaya wooreereleni. Muttiittele munela woottittano wa mwene, niwoko ekaratta elempwale mwa nsina na mwene ni ettittiweene ni munelaawe ti yoohiceendyeya.”

⁹Iye seereiye vanihukuni nanaamiloko miili ni mararu na mweeri wanaararu oniitthaniwa Sivani. Anamalepa a mwene yaathukumanyihiwa woowaakuveya. Yaahaalepela ikano sootheene sa Mordekai aYuda ootheene ni mapwattapwattha, maguvernadori ni maneethi ootheene a ilapo ncira ni miloko miili niithannapiili okhuma wIndiya mpaka oKuxe. Ikano iye saalempwale ettharihiwaka muulumo ni elepelo ya khula muloko mweelaponi sootheene nitho wa aYuda ni elepelowaaya ni nuulumonaya.

¹⁰Mordekai aalepa mwa nsina na mwene Ahaxeveroxi, anattitta ikaratta ni munela woottittano wa mwene, anarumiha mwa anamitthenga ewenleene ikavalu* soowaaluwaxa saakuxiwe munikhoolani na mwene.

¹¹Ekano ya mwene yaawaakhulela aYuda wa khula esidade weera ethukumane vamoha ni weera yiixaakihe. Yaalamulatho weera ephwate, yiive ni ehonone wakhalaru muloko hoye hoye yakhalaru elapo yeera yaawanane naari ewoopopihe awosa, axaaraya ni anamwanaaya ni weera ehuhule sooreela sa amwiittanaaya.

¹²Nihuku naathanliwe weera aYuda epake yeeyo mweelaponi sootheene sa mwene Ahaxeveroxi naari nihuku na naamuloko ni mararu na mweeri wanaamuloko ni miili oniitthaniwa Adari.

¹³Ekaratta emoha ya ekano yaalempwale eweheriwaka sikina yaathalihiwa ntoko nlamulo wa khula elapo esuwelihiwaka miloko sootheene weera nihuku nno aYuda ekhale oolikaneene wiixaakiha ni amwiittanaaya.

¹⁴Anamitthenga ewenleene ikavalu* saakuxiwe munikhoolani na mwene yaattimula woowaakuveya mwaha wa nlamulo na mwene. Ekano ele yaasuwelihiwatho musidadeni yoolipihiwaxa ya oSusa.

¹⁵Mordekai aavenya vamaithoni wa mwene awarenleene sa emwene sa kanka ni sootteela, ecireemba etokotoko ya eyuuma yoorikaxa ni mukaandyo wookankela wa nliinya nootteettheya. Esidade ya oSusa yaatthapa ni ohakalala.

¹⁶Wa aYuda yaari ehuhu ya mpuha, ohakalalaxa, otthapa ni nttittimiho.

¹⁷Waakhala ohakalala variyari wa aYuda mweelaponi sootheene ni mmasidadeni sootheene mwemmo yaaphiyalaayamo ekano ya mwene. Atthu ancipale a miloko sikina sa moomweneni yaathatuwa aYuda, niwoko woopiha wa aYuda waahaatepelasa.