Read Makhuwa-Shirima Exteri 9 Bible Online

Exteri 9 - Makhuwa-Shirima bible

Exteri 9

¹Vanihukuni na naamuloko ni mararu na mweeri wanaamuloko ni miili oniitthaniwa Adari, ekano ya mwene yeeraaya ekwaniheriwe. Nihuku nne amwiittana a aYuda yaaweherera waawina, mene waavirikana aYuda yaahaawina yaawo yaasoonda.

²aYuda yaathukumana mmasidadenimwaya mweelaponi sootheene sa mwene Ahaxeveroxi weera yaawaneno yaale yaatthuna waaphwata. Khaawo yaawera waawina, niwoko miloko sootheene sannawoovasa.

³Maneethi a ilapo sootheene, mapwattapwattha, maguvernadori ni anamawehaweha a mwene yaahaakhavihera aYuda, niwoko woopiha wa Mordekai waahaatepelasa.

⁴Mordekai aari ooweraxa mpaani mwa mwene. Epilaawe yaamwareela mweelaponi sootheene ni otokweenaawe wannaandyeerereya.

⁵aYuda yaawiiva amwiittanaaya ootheene ni ikatana yaaphwataka, enaapakela yeeyo yaatthunaaya.

⁶Musidadeni yoolipihiwaxa ya oSusa aYuda yaawiiva asilopwana macira mathanu.

⁷Yaamwiivatho Parexanedata, Dalefoni, Asepata,

⁸Porata, Adaleya, Aridata,

⁹Paremaxeta, Arisai, Aridai ni Vayezata,

¹⁰anamwane asilopwana muloko a Hamani, mwaana mulopwana a Hamedata, mwiittana a aYuda. Wa soothesene, khayaakamenle sooreelasaya.

¹¹Nihuku nenenenne mwene aathaliheriwa waatta wa ootheene yiiveliwe musidadeni yoolipihiwa ya oSusa.

¹²Vano mwene aamweerela pwiyamwene Exter: “aYuda aawiiva yaaphwataka asilopwana macira mathanu musidadeni yoolipihiwaxa ya oSusa, nitho anamwane asilopwana muloko a Hamani. Ekhumelenle eheeni mweelaponimwaka sikina? Vano yoovekaanyu eheeni? Nyuwo munimwaakhuleliwa. Munghaawelatho eheeni? Eyo munoovahiwa.”

¹³Exteri aamwaakhula: “Woosivelani amwene, mwaatthunihere aYuda a oSusa weera epwaherere ekano ya olelo mpakatho omaalo weerela mittembo sa anamwane asilopwana muloko a Hamani sitthukeleliweke kuleele.”

¹⁴Mwene aalamula weera eyo epakiwe. Ekano yaalaleiwa oSusa ni mittembo sa anamwane asilopwana muloko a Hamani saatthukeleliwa kuleele.

¹⁵aYuda a oSusa yaathukumanasa nihuku nanaamuloko ni maxexe na mweeri Adari, enawiiva asilopwana macira mararu. Wa soothesene, khayaakamenle sooreelasaya.

¹⁶Eyo eri hiiho, aYuda a ilapo sikina sa mwene yaathukumanatho weera yiixaakihe ni yiitapuxe mwa amwiittananaaya. Yaawiiva asilopwana 75 000, mene khayaakamenle soorelasala.

¹⁷Eyo yeereiye vanihukuni na naamuloko ni mararu na mweeri Adari ni waaxiiye yaahiitthuuwa epakaka nihuku na efesta ni ohakalala.

¹⁸Wa soothesene, aYuda yaakhala oSusa yaathukumana nihuku nanaamuloko ni mararu ni waaxiiye ni munihukuni na naamuloko ni mathanu yaahiitthuuwa epakaka nihuku na efesta ni ohakalala.

¹⁹Tivawo aYuda a isidade sikhaani ni mittetthe anuupuwelelaaya nihuku na naamuloko ni maxexe na mweeri Adari ntoko nihuku na efesta ni na ohakalala ni ovahanana.

²⁰Mordekai aalepa sookhumelela iye aarumihelaka ikaratta aYuda a ilapo sootheene sookhuveela ni soorakamela sa mwene Ahaxevoroxi.

²¹Aalamula weera epake efesta khula eyaakha mmahukuni anaamuloko ni maxexe ni anaamuloko ni mathanu a mweeri wa Adari,

²²yuupuwelelaka ehuhu aYuda yiitapunxaaya mwa amwiittanaaya. Mweeri ole othananawaya waathatuwa ohakalala ni olalamikawaya waathatuwa efesta. Aahaalepela eerelaka weera yuupuwelele mahuku ale ntoko mahuku a efesta ni a ohakalala evahananaka ni yaavahaka oohaawa.

²³Hiiho aYuda yaakhaliha ntoko ekhovelelo eyuupuwelelo ele ettharihaka yeeyo Mordekai aalamulenlaawe mukarattani.

²⁴Hamani, mwaana mulopwana a Hamedata, mwiittana a aYuda ootheene aahaavaanelela aYuda weera aaphwate, aapaka macitta aniitthaniwa Puri weera ethanliweke ehuhu ya ophwatiwawaya ni okhwawaya.

²⁵Wa soothesene, mwene asuwelakaru yeeyo, aalamulela mukarattani weera yoovaanela yoonanara ele ya Hamani wa aYuda emuhokoleele muneenaawe ni weera owo vamoha ni anamwanaawe etthukelelasiwe kuleele.

²⁶Tivawo mahuku ale yiitthaniwaaya Purimi* niwoko na nsu “Puri”*. Niwoko na ekaratta ya Mordekai ni yeeyo yooningwe ni yaakhumelenle,

²⁷aYuda yaalakela okhaliha ekhovelelo ele elamulaka ekhapiraaya ni ootheene yaathatungwe aYuda weera yuupuwelele mahuku meeli ale khula eyaakha, ettharaka moota ni ehuhuwaaya yaalamuliwaaya.

²⁸Mahuku ale yuupuweleliwe ni epakiwe wa khula ekhapira, khula emusi ni mweelaponi sootheene sa khula esidade. Ehihiyereriweru wuupuweleliwa ni aYuda, ni ekhapiraaya ehittiwaleru mahukweene yaale.

²⁹Vano pwiyamwene Exteri, mwaana muthiyana a Abihaili, ni Mordekai, muYuda, yaalepasa ekaratta yanaaveeli ni ikuru sa mwene weera yaakhulele ekaratta ela yoopacera mwaha wa mahuku a Purimi*.

³⁰Mordekai aahaarumihela ikaratta aYuda ootheene a ilapo ncira ni miloko miili niithannapiili sa mwene Ahaxeveroxi, aweerelaka murettele ni ororomeleya.

³¹Aalamula weera mahuku ale a Purimi* yuupuweleliweke mweehuhunimwaya yootthuneya ntoko Mordekai, muYuda, ni pwiyamwene Exteri yaalamulelansaaya okhaliha ni ntoko aYuda yiikhalihenraaya ni wa ikhapirasaya. Yaahaandyeereratho malamulo mwaha wa otthuka ni olalamika.

³²Ekano ya Exteri yaahaakhulela ikano iye mwaha wa Purimi* ni iye saalempwa mulivuruni ya nyaha.