Read Makhuwa-Shirima Okhuma 1 Bible Online

Okhuma 1 - Makhuwa-Shirima bible

Okhuma 1

¹Masina a anamwane a Yixrayeli yaavolongwe ni yoowo wExipitu, khula mutthu ni emusaawe xaxaxa ti ala:

²Rubeni, Simeyoni, Leevi, Yuda,

³Isakari, Zebuloni, Benyamini,

⁴Dani, Nafitali, Gadi ni Axeri.

⁵Wa ootheene ekhapira ya Yakobe yaaphiyera atthu miloko mithannamiili, Yoseefe areene wExipitu.

⁶Vano Yoseefe, axunneiye ni ootheene a ekhapira ele yaahookhwaasa.

⁷Wa soothesene, aYixrayeli yaayarana enaandyeererana vancipalexa mpaka osareya mweelaponi.

⁸Vano aalamula wExipitu aari mwene munyowani ahaasuwenleru sa Yoseefe.

⁹Owo aaweerela atthwaawe: “Moone! Muloko wa aYixrayeli wohaatta ni ti woolipaxa onipwaha hiyo.

¹⁰Nrowe naavaanelele weera ehaandyeereranase ni, yakhala enkhumelela ekhotto, ehiiraane ni amwiittanahu ewanaka ni hiyo ni weera ehipwahe mweelaponimu.

¹¹Vano yaahaathanla asitokweene weera yaavariheke miteko sa maviho ni yaahooxase ni miteko soolipa. Ni hiiho aYixrayeli yaamutekela Farawu* isidade soothokorora sooca siniitthaniwa Pitomo ni Ramesese.

¹²Wa soothesene, yaahasulaxiwaaya, yaatepaaya waandyeererana ni omwaramwareya. Tivawo awExipitu yaawoovaaya aYixrayeli,

¹³ni yaakhalihaaya opottha moota woonanara.

¹⁴Awo yaahaawaawiherasa okumaaya, yaavahasaka muteko woovihaxa weetheya ittoko ni opaka indyerwa ni khula muteko woolima yaamvara. Mmitekoni sootheene awExipitu yannaakhalela oxilili mpotthani.

¹⁵Mwene a wExipitu aahaalamulela anamayariha eeli aHeberi, yiitthaniwa Xifera ni Puwa:

¹⁶“Mwaakhaviheraka aHeberi oyara, mungweheke aari mulopwana. Akhala, mmwiive; akhala muthiyana munghiyeke ni okumi.”

¹⁷Wa soothesene, anamayariha yaamoova Muluku ni khayiiwelenle malamulo a mwene a wExipitu. Yaahaahiya ni okumi anamwane asilopwana.

¹⁸Mwene a wExipitu aawiitthana anamayariha, anaakoha: “Mpakelanse heeni hiiho? Heeni mwaahiyalaanyu ni okumi anamwane asilopwana?”

¹⁹Awo yaamwaakhula Farawu*: “Asithiyana aHeberi khaanlikana ni awExipitu. Khaanghaawano oyara ni angyara ahinaaye orwa namayariha.”

²⁰Vano Muluku aahoonihera murima wooreera wa anamayariha ni muloko wannatepa waandyerereya ni waalipa vancipalexa.

²¹Yeenre anamayariha yaamoovaka Muluku, aahaavahera oyara weera ekhalaneke emusaaya.

²²Farawu* aahaalamulela atthwaawe ootheene moota ola: “Mwaavonyere mmoolokoni Nilu asilopwana ootheene eneera eyariweke, mene anamwane asithiyana, mwaahiyeke.”