Read Makhuwa-Shirima Okhuma 10 Bible Online

Okhuma 10 - Makhuwa-Shirima bible

Okhuma 10

¹Vano Yave aamweerela Moisesi: “Murowe wa Farawu*, niwoko Kohuumiha murimaawe ni mirima sa anamalakaawe weera kikwanihere sootikhiniha variyariwaya.

²Kinoopaka seiyo weera nyuwo ngwere waathalihera anamwaniinyu ni axisulwiinyu moota kaatheiyaaka awExipitu ni moota kaapakenlaaka sootikhiniha. Hiiho mmwisuwele weera Miyo ti Yave.”

³Moisesi ni Aharoni yaarowa wa Farawu* emweerelaka: “Yave, Muluku a aHeberi eenre ha: ‘Mpaka yaakhani mukhoottaka wiiyeviha ohoolowaka? Muhiyeke mulokwaaka weera wakilape!

⁴Mwaahitthunihera orowa, omaalo kinoorumihela misoope mweelaponimwanyu.

⁵Iyo osareyawaya sinookumanela mweelaponi mpaka oohooneya etthaya. Sinoowenya yeeyo ehanle vakhaani ya nihooxo na maralala nitho nyiri sootheene simphuwa ntuphini.

⁶Sinoosareya mmampaanimwanyu ni impa sa anamalakaanyu ni awExipitu ootheene; etthu ahitonkwaaya woona asitithinyu naari makholowaanyu okhuma nihuku yaaphiyalaaya mweelaponimu mpaka olelo.” Vano Moisesi aarukunuwa, anavenya wa Farawu*.

⁷Anamalakaawe Farawu* yaamweerela: “Mpaka yaakhani mulopwana ole aneeraawe akhale yoowoopopihaahu? Mwaatthunihere orowa weera yamulape Yave Mulukwaaya. Khamusuwenle weera elapo ya wExipitu ennaheleya mathala?”

⁸Hiiho Moisesi ni Aharoni yaaronghiwa wa Farawu* ni aaweerela: “Murowe mwamulape Yave Mulukwaanyu. Mene mukileelase: Taani anaarowe?”

⁹Moisesi aamwaakhula: “Ontthuneya waakuxa ootheene: asimiravo ni asitokweene, anamwaniihu asilopwana ni asithiyana, ikhondoolosahu ni imombesahu, niwoko ninkela ompakela efesta Yave.”

¹⁰Farawu* aamweerela: “Nyuwosa munoohaawela ekhavihero ya Yave miyo khootthuniherani orowa nyuwo ni anamwaniinyu! Wohooneya weera nyuwosa soowuupuwelasanyu siri moota mukina.

¹¹Hata vakhaani! Eroweke asilopwana paahi weera yamulapeke Yave ntoko nyuwosa mvekenlaanyu.” Vano Moisesi ni Aharoni yaahoomolasiwa vamaithoni wa Farawu*.

¹²Mene Yave aamweerela Moisesi: “Mookoolele moono wExipitu weera misoope siwe mweelaponi yootheene ni weera siwenye mapoonda ootheene ni sootheene sihanle vahoolo wa maralala.”

¹³Moisesi aahookolela ekopwaawe wExipitu ni Yave aahoopiha epheyo mweelaponi eweelaka ninkhuma nsuwa nihuku nne ni ohiyu wootheene. Vano oxaawaya, epheyo ele yaaruuha misoope.

¹⁴Misoope saakwanela wExipitu wootheene ni aari nasope mwincipale aakwanenle mipatta sootheene. Khanakhale nasope, hata kharwa akhala.

¹⁵Saakwanela vathi wootheene moota wooweera elapo yaari wukaa. Saawenya sootheene saahanle vahoolo wa maralala — mapoonda ootheene ni soowiima sootheene sa nyiri. Khayaahanleru ekithi mmirini naari ntuphini mweelaponi yootheene ya wExipitu.

¹⁶Wowaakuveya Farawu* aarumiha wiitthaniwa Moisesi ni Aharoni aweerelaka: “Koomutthekela Yave, Mulukwaanyu ni kohootthekelani nyuwosa.

¹⁷Vano, mukileveleletho yootthekaaka ni mumvekele Yave Mulukwaanyu weera aronghe ottaiwaka nihooxo nna noowiiva.”

¹⁸Moisesi aavenya wa Farawu* ni aamvekela Yave.

¹⁹Yave aahoopiha epheyo etokotoko yaakhuma ninkela nsuwa ni eyo yaakuxakuxa misoope enavonyera mphareiyani yooxeera. Khawaahanleru musoope naari mmoha mweelaponi yootheene ya wExipitu.

²⁰Yavetho aahuumiha murima wa Farawu* ni owo khaatthunihera aYixrayeli orowa.

²¹Yave aamweerela Moisesi: “Mweemexere matata osulu ni epiphi enoosareya elapo ya wExipitu; epiphi yoohoonaniwa.”

²²Moisesi aaheemexera matata osulu ni wa mahuku mararu yaakhala epiphi etokotoko mweelaponi yootheene ya wExipitu.

²³Khaawo aawera woona etthu hata ovenya vanipuroniwawe wookwana mahuku mararu. Wa soothesene, aYixrayeli ootheene yaakhalano waara mmapuroni yaamankaaya.

²⁴Vano Farawu* aalamula wiitthaniwa Moisesi amweerelaka: “Murowe, mwamulape Yave — mpaka asithiyana ni anamwane eroweke. Paahi ikhondoolosanyu ni imombesanyu sihaleke wenno.”

²⁵Moisesitho aakhootta: “Nyuwo muneenaanyu munoonivaha axinama a sooveleela ni a soohisera weera hiyo namveleelele Yave.

²⁶Ohiya toko hiiho, mihuwosahutho nnoorowano — hata mwaamunama mmoha khanghala! Ontthuneya waathanla akina a yaawo weera namulape Yave, Mulukwaahu, ni nihinaaye ophiya vanipuroni, khanaasuwela axinama heeni antthuneya waapaka sooveleela.”

²⁷Yavetho aahuumiha murimaawe Farawu* ni khaatthunihera aYixrayeli orowa.

²⁸Farawu* aamweerela Moisesi: “Mukivenyerewo va! Mwiipasoope weera muhihokoleele ovira va. Nihuku muneeraanyu mphiye varaaka, munimookhwa.”

²⁹Moisesi aamwaakhula: “Onuukhale ntoko mweenraanyu: nkoonatho ekhovaanyu.”