Read Makhuwa-Shirima Okhuma 11 Bible Online

Okhuma 11 - Makhuwa-Shirima bible

Okhuma 11

¹Vano Yave aamweerela Moisesi: “Kinoomurumihelatho Farawu* ni wExipitu nihooxo nookisera. Wa nenno, owo onimootthuniherani ovenya va. Mpaka onoowoomolani woohihela iperwa.

²Mwaaleele atthu — asilopwana ni asithiyana — weera yaavekele aximwaattamanaaya itthu sa iyuuma soorikaxa.”

³Yave aahaakhaliha awExipitu oosivela mulokwaawe. Ohiya toko yeeyo, Moisesi muneenaawe aakhalano epili etokotoko wExipitu ni anamalakaawe Farawu* ni muloko wa awExipitu.

⁴Vano Moisesi aamweerela Farawu*: “Yave eenre ha: ‘Ehuhu ya ohiyu eriyari kinooviravira mwExipitu moothemwene.

⁵Matthaara ootheene a awExipitu animookhwa — okhuma ntthaara na Farawu* namukalamba, mpaka ntthaara na epottha ethiyana enxila, mpakatho matthaara a mihuwosaya.

⁶Vano onuukhale okhuwela ni wiinla otokotoko mweelaponi yootheene ya wExipitu ohitonke okhumelela naari khoorwa okhumelelatho.

⁷Wa soothesene, variyari wa aYixrayeli kheewo yoonanara eneera yaakhumelele atthu hoye hoye axinama. Vano munoosuwela weera Yave onoohiyanyiha oYixrayeli ni wExipitu.

⁸Anamalakaanyu ootheene ala animoorwa wa miyo ekikokhorelaka, ekidyoonttelelaka: ‘Mpwahe nyuwo vamoha ni mulokwaanyu onoottharani!’ Vahoolowaya kinoopwaha.” Vano, anyoonyiweene vancipale, Moisesi aavenya wa Farawu*.

⁹Yave aamweerela Moisesi: “Farawu* kharwa awiiwaani weera sootikhinihasaka saandyeerereye wExipitu.”

¹⁰Moisesi ni Aharoni yaapaka sootikhiniha sootheene iye ohoolo wa Farawu*, mene Yave aahuumiha murimaawe ni khaatthunihera opwaha aYixrayeli mulaponi.