Read Makhuwa-Shirima Okhuma 12 Bible Online

Okhuma 12 - Makhuwa-Shirima bible

Okhuma 12

¹Yave aamweerela Moisesi ni Aharoni wExipitu:

²“Mweeri ola okhaleke mweeri woopacera wa eyaakhaanyu.

³Mulamule muloko wootheene wa aYixrayeli weera vanihukuni nanaamuloko na mweereene yoola khula mutthu a nyuwosa athanle eputtiputthi emoha hoye hoye epuri wa emusaawe; emoha wa khula etthoko.

⁴Emusi ekina yaahaatta atthu wa mwaamunama mpurukuma, ameelaneke ni mwaattamanaawe okhuveelananxaawe, attharihaka waatta wa atthu ni ongweraawe okhuura khula mutthu.

⁵Mwaamunama oothanliwa akhaleke mulopwana a eyaakha emoha oohirakala hata ekhalaka eputtiputthi naari epuri.

⁶Amuthokororeke mpaka nihuku na naamuloko ni maxexe na mweereene yoola ni aarooka oveleeliwa ni muloko wootheene wa aYixrayeli, nsuwa nineelaka.

⁷Vano atthu ekuxeke ephome vakhaani ya mwaamunama iiviwe, ettikittheleke musereemuni soorakama ni yookhuveya sa masele a impa mwemmo eneeraaya ekhuurelemo enama.

⁸Ohiyuweene yoowo ekhuureke enama eyo yoowooxiwa ni makukhu oonyuunya ni epaawu yoohikhalano eferementu.

⁹Muhikhuure enama ekithi hata yoowaapeiwa, mene yoowooxiwa — muru, nyetto ni marupo.

¹⁰Muhixeeleleru mpaka waaxiiye; yakhala enghala, muhise.

¹¹Mwaakhuuraka mukhale oolikaneene ovenya: Laamba muyuununi; ngwanreene ikwakwaatta, ni ekopo mmatatani. Mukhuureke mwaakuvihaka. Ola ti mPaska* a Yave.

¹²Ohiyuweene yoowo kinooviravira mweelaponi yootheene ya wExipitu ni kinimwiiva matthaara ootheene okhuma a atthu mpaka a axinama. Nkaanyoke ni nthorihelo mwa miluku sootheene sa wExipitu. Miyo ti Yave.

¹³Ephome eniikhale eneneero yoothoonyera impa muneeraanyu mukhale. Miyo koona ephome, kinoopwaherera. Nihooxo na onyoka khanirwa noophwanyaani Miyo kaawiinlihaka awExipitu.

¹⁴Nihuku nno nikhaleke noowuupuweleliwa nyuwosa ni ekhapiraanyu. Khula eyaakha vanihukuni nno mmuupuwelele mumpakelaka efesta Yave, ntoko nlamulo noohimala.

¹⁵Wa mahuku mathannameeli ontthuneya weera muceeke ipaawu soohikhalano eferementu. Munihukuni noopacera mukhumihere vaate eferementu, niwoko yoowo aneera ace yakhalaru etthu yooheliwa eferementu okhuma nihuku noopacera mpaka nanaathannameeli anoomoliwe mwa aYixrayeli.

¹⁶Mulattule muthukumano wootteela munihukuni noopacera ni mukina nihuku nanaathanameeli. Muhivareru muteko mahukweene yaawo erehereriweke paahi yooca ya atthu ootheene. Ti yeeyo paahi mutthuniheriwaanyu opaka.

¹⁷Muupuwelele efesta eyo ya epaawu yoohikhalano eferementu, niwoko naari nihuku nenenenno Miyo khaakhuminghaaka anakhottwaanyu wExipitu. Muupuwelele nihuku nno ntoko nlamulo noohimala wa ikhapirasanyu sootheene.

¹⁸Wa mweeri woopacera muceeke epaawu yoohikhalano eferementu okhuma wiila wa nihuku na naamuloko ni maxexe mpaka wiila wa nihuku na naamiloko miili ni nimoha.

¹⁹Wa mahuku mathannameeli nyuwosa muhikhalaneru eferementu owaani. Yoowo anaace yakhalaru etthu yooheliwa eferementu, hata akhalaka namarwa naari muYixrayeli, anoomoliwe munlokoni wa aYixrayeli.

²⁰Muhice yakhalaru etthu yooheliwa eferementu. Weiwo muneeraanyu mwamake, mwaceeke epaawu yoohikhalano eferementu.”

²¹Vano Moisesi aawiitthana asitokweene ootheene a aYixrayeli, anaweerela: “Muthanle eputtiputthi hoye hoye epuri wa khula emusi. Mpake yooveleela weera nimuupuwelele mPaska*.

²²Muruweye iphandi sa hisopo* mphomeni eneera ekhale mpasiyani, ni muttikitthele musereemuni sa masele. Ahikhale a nyuwo aneera akhume mpaani mpaka oxa.

²³Yave aaviraviraka mweelaponi weera awiive awExipitu, onimoona ephome musereemuni sa masele ni onoopwaha mulakweene yoowo. Mwa yeeyo, khamuntthunihera namanyoka ovolowa mmampaanimwanyu weera awiivaseni.

²⁴Mwiiwelele ikano iya ntoko nlamulo noohimala wa nyuwo ni ikhapirasanyu sootheene.

²⁵Mwaavolowaka mweelaponi Yave ororomelinghaawe woovahani, muupuwelele efesta ela.

²⁶Vano anamwaniinyu yookohasani: ‘Efesta ela entaphulela eheeni?’

²⁷Mwaathalihere: ‘Ti yooveleela ya mPaska* wa Yave, mwa Yoowo aaviravinre mmampaani sa aYixrayeli wExipitu ni uurenle impasahu Owo awiivaka awExipitu.’” Vano muloko waahuurama omulapaka.

²⁸aYixrayeli yaarowa enapaka yeeyo Yave aamulamunlenlaawe Moisesi ni Aharoni.

²⁹Vano, ohiyu eriyari Yave aahiiva matthaara ootheene a wExipitu, okhuma ntthaara na Farawu*, namukalampa, mpaka ntthaara na namatthukiwa aari mukaliposo, nitho a mihuwo sootheene.

³⁰Ohiyu eriyari, Farawu* vamoha ni anamalakaawe ni awExipitu ootheene yaaheemela. Yaakhala ekuttho etokotoko wExipitu, niwoko khayaariwo empa ahaakhanlaawewo nookhwa.

³¹Ohiyuweene yoole Farawu* aalamulela wiitthaniwa Moisesi ni Aharoni, anaweerela: “Mukivenyere woowaakuveya wa mulokwaaka nyuwosa ni aYixrayeli. Muroweke mwamulape Yave ntoko mumvekelaanyu.

³²Mukuxe mihuwosanyu ntoko mwaahimalaanyu ni mukireelihe miyotho.”

³³awExipitu yaahaanyesereriha aYixrayeli weera evenye woowaakuveya mulaponi yeeraka: “Ootheene hiyo nnikhweeke!”

³⁴Vano muloko waakuxa ephepa yooweetheiwa yahaaheliwe eferementu ni waathatela yeetheliwaayamo ehuruwenleene mukuwonimwaya.

³⁵aYixrayeli yaahaakhulela nlamulo na Moisesi ni yaahaavekela awExipitu itthu sa iyuuma soorikaxa ni ikuwotho.

³⁶Yave aatava mirima sa awExipitu weera ewoonihere onnene aYixrayeli, moota wooweera yaahaavaha yeeyo aYixrayeli yaavekenlaaya. Hiiho awosa yaahaahuhula awExipitu.

³⁷aYixrayeli yaavenya oRamesese erowaka oSukota. Yaari wookwanaka asilopwana 600 000 ooweetta waahiya asithiyana ni anamwane.

³⁸Nakupa mutokotoko a moota wootheene wa anamarwa aarongwe ni yaawosa, ohiya waatta wa mihuwo sa imombe, ikhondoolo ni ipuri.

³⁹Vano, yaapaka ipaawu soohikhalano eferementu evarelaka muteko ephepa yaawaannaaya wExipitu. Ephepa yaari yoohikhalano eferementu, niwoko noowoomolasiwa wExipitu ehikhalanaka ehuhu yooreherera yooca.

⁴⁰Vano ehuhu aYixrayeli yaakhalaaya wExipitu, yaari ya iyaakha macira maxexe ni miloko miraru.

⁴¹Nihuku yaakwaniheraaya iyaakha macira maxexe ni miloko miraru, anakhotto ootheene a Yave yaavenya wExipitu.

⁴²Woonaka weera Yave aahaawehaweha aYixrayeli ohiyuweene yoole weera aakhumihe wExipitu, vano ontthuneya weera aYixrayelitho ewehaweheke mwa ikhapirasaya sootheene ohiyuweene yoola weera emuttittimihase Yave.

⁴³Yave aamweerela Moisesi ni Aharoni: “Ikano sa mPaska* ti iya: Khoontthuniheriwa weera namarwa amuceno.

⁴⁴Epottha yoothummwa emuceeke mPaska* yiineliwaru.

⁴⁵Vaheera namarwa hoye hoye namuteko ahikhanle muYixrayeli ahimuce.

⁴⁶Munceeke ntthoko nimoha paahi. Muhikhumihere vaate naari entthuri emoha hata muhipwexeru nikhuva.

⁴⁷Muloko wootheene wa aYixrayeli ompakeke mPaska*.

⁴⁸Akhalaru namarwa omanke variyariwanyu ontthuna ompaka mPaska* a Yave, awiineleke asilopwana a emusaawe yootheene. Vahoolowaya amuceekeno ntoko neethi a mulaponi. Ahikhale oohiineliwa aneera amuceno.

⁴⁹Ikanosene seiya seetteliweke wa muYixrayeli ni namarwa omankemo.”

⁵⁰Vano aYixrayeli ootheene yaapaka yeeyo Yave aamulamulenlaawe Moisesi ni Aharoni.

⁵¹Nihuku nenenenne Yave aahaakhumiha aYixrayeli wExipitu attharihaka mipatta soohiyanahiyana sa anakhottwaaya.