Read Makhuwa-Shirima Okhuma 18 Bible Online

Okhuma 18 - Makhuwa-Shirima bible

Okhuma 18

¹Vano Yethero, musaserdoti* a oMidiyani ni atatawe oowaathelela Moisesi, aasuwela sootheene Muluku aapakaawe mwa Moisesi ni wa muloko wa aYixrayeli ni moota Yave aakhumihalaawe aYixrayeli wExipitu.

²Moisesi aamuruma mwaariye, Zipora, vaate wa atatawe oowaathelela, Yethero, aamwaakhelenle

³vamoha ni anamwanaawe asilopwana eeli. Mmoha a yaawosa iitthaniwa Gerxomo, niwoko Moisesi eenre: “Koothatuwa namarwa mweelaponi ekina.”

⁴Mukina iitthaniwa Eliyezeri, niwoko eenre: “Muluku a atithaka aari namakhaviheraaka; ookivuluxa wa ekatana ya Farawu*.”

⁵Yethero, atatawe oowaathelela Moisesi, vamoha ni anamwanaawe ni mwaariye Moisesi, yaahoowa omukumanano munikareni aakonenlaawe, vakhiviru wa mwaako wa Muluku.

⁶Yethero aarumiha oleeliwa Moisesi: “Ti miyo, atatinyu oowaathelela, kineera kirwaaka wookumananani vamoha ni mwaarinyu ni anamwanaawe asilopwana eeli.”

⁷Vano Moisesi aahaaciceera atatawe, anuurama, anaabeeca. Yaahuulumihana, enavolowasa muheemani.

⁸Moisesi aahaathalihera atatawe sootheene Yave aampakenlaawe Farawu* ni awExipitu ngwaasivelani aYixrayeli ni sa makacamiho ootheene yaaweereela mphironi ni moota Yave aavulunxaawe.

⁹Yethero aahakalala woowiiwa itthu sooreera sootheene Yave aapakenlaawe aYixrayeli aavulunxaawe mmatatani mwa awExipitu.

¹⁰Aaheera: “Atthapeliwe Yave, mwa Yoowo oovuluxanseni mmatatani mwa awExipitu ni Farawu* ni ovulunxe muloko mmatatani mwa awExipitu.

¹¹Vano koosuwela weera Yave ti mutokweene oopwaha miluku sootheene sikina, niwoko na yeeyo aapakenlaawe yaawo yaahasula aYixrayeli moota woowiixoona.”

¹²Yethero, atatawe Moisesi, yaampakela Muluku sooveleela soohisa ni sooveleela sikina. Vano Aharoni vamoha ni asitokweene ootheene a aYixrayeli yaahoorwa weera ece ni atatawe Moisesi vamaithoni wa Muluku.

¹³Oxaawaya Moisesi aakilaathi weera athalihe mikhalelo sa muloko ni atthu yaamurukureera okhuma oxeexelo mpaka oxekuwa.

¹⁴Atatawe Moisesi, yoonaka sootheene aapakelaawe muloko, yaamweerela: “Nyuwo mumpakani? Munkilaathela heeni weera muthalihe nyuwo paahi muloko wootheene ola woorukureerakani okhuma oxeexelo mpaka oxekuwa?”

¹⁵Moisesi aawaakhula: “Muloko onkeerela va kimukohe Muluku.

¹⁶Imaara sootheene mukina omvalavelaawe ti ankiruuhelaaya ni miyo kinoolakela variyari wa ooweeli, kaathaliheraka ikano ni malamulo a Muluku.”

¹⁷Atatawe Moisesi yaamwaakhula: “Yeeyo mumpakaanyu kheereenre.

¹⁸Nyuwo ni mulokwaanyu munoovelasa. Muteko ola ti woowoolemelaxani — khoongwereya okhalela meekhiinyu.

¹⁹Mukiiweke — kinimoolakani ni Muluku akhaleke ni nyuwo. Ontthuneya weera mukhale muhooleli a muloko vamaithoni wa Muluku muroihaka wa Muluku soovalavelihasaya.

²⁰Mwaaxuttihe mukanoni ni mmalamuloni ni ngwooniheraka moota wooweetta mookumuni ni mmutekoni.

²¹Mwaathanle variyari wa muloko wootheene asilopwana oowera, mwa yaawo ammoova Muluku, oororomeleya ni oothanya makhwankwa. Mwaakhalihase ntoko asitokweene a macira muloko, ncira, miloko mithanu ni muloko mmoha.

²²Awosa ekhaleke aphuki a muloko mahuku ootheene weera ethorihe soovalaveliha. Yooruuhelekeni nyuwo paahi seiyo soorikaxa, vaheera sookhweyakhweya elakeleke asineenaaya. Hiiho eyo enooveruwiha mutekwaanyu, niwoko aakawana ni nyuwo.

²³Mwapaka hiiho ni Muluku alamulela, munoowera ovilela olemela wa muteko ni atthu ootheene ala anoohokoleela owaani oohakalaleene.”

²⁴Moisesi aahaakhulela miruku sa atatawe ni aapaka sootheene awo yaamuleenlaaya.

²⁵Aahaathanla asilopwana oowera variyari wa aYixrayeli ootheene ni aahaakhaliha ntoko asitokweene a muloko; asitokweene a macira muloko, ncira, miloko mithanu ni muloko mmoha.

²⁶Awosa yaakhala anamathoriha a muloko wa mahuku ootheene. Soovalaveliha soorikaxa yaamuronghela Moisesi, mene seiye sookhweyakhweya yaalakela asineenaaya.

²⁷Vano Moisesi aahaalaxera atatawe ni Yethero aahokoleela elapwaawe.