Read Makhuwa-Shirima Okhuma 2 Bible Online

Okhuma 2 - Makhuwa-Shirima bible

Okhuma 2

¹Vano mulopwana mmoha a epuumba ya Leevi aathelana ni muthiyana muLeevitho.

²Owo aarupala, anamuyara mwaana mulopwana. Oonaka weera aari ooreera, aamwiipithiha nyeeri miraru.

³Wahaawereyaaya omwiipithiha, aakuxa mpapara wootthaviwa ni etiili, anattikitthela ni nnyoma ni nkhora. Vano aamuhelamo mwaana ole ahiyaka mpapara eriyari ya ettheere mukerekhere wa Nilu.

⁴Amurokoriye mwaana ole yaaheemela okhwipi weera yoone yeera emukhumelele.

⁵Vano mwaana muthiyana a Farawu* aarowa omoolokoni Nilu weera arape ni arumeiyaawe yaavira mukerekhere mooloko. Mwa yeeyo aahoona mpapara muttheereni, anamuruma murumeiyaawe okuxa.

⁶Akhunulaka, aamoona mwaana iinlaka. Owo aammorela ikharari aneera: “Ola muHeberi.”

⁷Amurokoriye mwaana yaamwaattamela mwaana a Farawu*, enamukoha: “Muhano munootthuna weera kamwiitthane muthiyana muHeberi weera amwaamwihe ni amuhuwe mwaana ola?”

⁸Owo aamwaakhula: “Aani.” Vano mwaamwali aarowa anawiitthana amayawe mwaana.

⁹Vahoolowaya mwaana a Farawu* aamweerela muthiyana ole: “Omukuxe mwaana ola ni okaamwihere, ni miyo kinimooliva. Vano muthiyana aamukuxa, anamwaamwiha.

¹⁰Unnuwakaru mwaana, amayawe yaamurongha wa mwaana muthiyana a Farawu* ni aamwaakhela ntoko mwaniye. Aamutteha Moisesi eeraka: “Niwoko miyo kimuruuhale mmaahini.”

¹¹Nihuku nimoha, Moisesi unnuwaleene, aarowa nipuro yaaraaya atthwaawe ni aahoonelela moota waaviraaya muteko yaavaraaya. Weiwo aamoona ngwExipitu mmoha angwaxulaka muHeberi, mmoha a atthwaawe.

¹²Aatthiimaka awehaka mipatta sootheene ni ahimoonaka mutthu, aamwiiva ngwExipitu, anamvitha veehaavani.

¹³Waaxawaya, aarowa, anawoona aHeberi eeli ewanaka. Aamukoha namatannya:“Oningwaxulela heeni mukhwaawo?”

¹⁴Vano mulopwana aamwaakhula: “Taani oovanghe otokweene ni mphukaahu? Ontthuna okiivatho ntoko omwiivalaawo ngwExipitu?” Moisesi aahoova uupuwelaka: ‘vekhaikhai, sootheene sohooneleliwa!’

¹⁵Farawu* asuwelakaru yeeyo, aahaasaasa omwiiva Moisesi, mene owo aamutthawa Farawu*, anarowa omaka elapo ya oMidiyani. Iwe aakilaathi mukerekhere ehime.

¹⁶Vano musaserdoti* mukina a oMidiyani aakhalano anamwane asithiyana athanneeli ni awosa yaarowa orika maahi weera esarihe maahi moowurelamo ni ewurihe muhuwo wa atithaya.

¹⁷Akukhulitho akina yaaphiyawo, enapacera owoomolasawo. Wa soothesene, Moisesi aahoowa owaakiha, anawuriha muhuwaaya.

¹⁸Ephiyakaru asimwali wa atithaya, Rewuyeli, owo aahaakohasa: “Mwaakuvenlenisa ohokolowa olelo?”

¹⁹Awosa yaamwaakhula: “ngwExipitu mmoha oonaakiha wa akukhuli nitho oonirikela maahi veehimeni, anawuriha muhuwo.”

²⁰Vano aahaakoha: “Ori woowi mulopwana owo? Heeni munghiyenreniwo? Mwamwiitthane weera ace ni hiyo.”

²¹Moisesi aarowa oca ni aahaakhulela okhala vaate wa Rewuyeli ni owo aamvaha Moisesi mwanawe Zipora weera ethelane.

²²Zipora aamuyara mwaana mulopwana mwa yoowo Moisesi aamuttenghaawe Gerxomo, eeraka: “Kiri namarwa mulaponimu.”

²³Vahoolo wa ehuhu yincipale, aahookhwa mwene a wExipitu. aYixrayeli yanniixiinlela ekhuwelaka niwoko na opottha. Ni Muluku aahiiwa okhuwelawaya.

²⁴Vano Muluku aahiiwa wiikhupanyerawaya, anuupuwelela wiiraana aapankaawe ni Abrahamu, Isaki ni Yakobe.

²⁵Muluku aahaaweha aYixrayeli, anaatthukuruwela.