Read Makhuwa-Shirima Okhuma 21 Bible Online

Okhuma 21 - Makhuwa-Shirima bible

Okhuma 21

¹Mwaathalihere aYixrayeli ikano iya:

²‘Mwathuma epottha muHeberi, eyo yoovareleni muteko iyaakha ithannamosa. Vano eyaakha yanaathannapiili etapuxiweke, ohitthuneyaka oliva etthu.

³Yarwa moothupani, epwaheke yootapuxiweene moothupani. Vaheera yarwa yootheleene, mwaaraya erowekeno.

⁴Apwiyaaya yavaha muthiyana ni owo aayarano anamwane asilopwana hoye hoye asithiyana, muthiyana owo ni anamwanaawe eniikhale a apwiyaaya; epottha paahi eniipwahe yootaphuweene.

⁵Wa soothesene, epottha eyo yeera: ‘Miyo kinnaasivela apwiyaaka, amwaaraka ni anamwanaaka ni nkintthuna opwaha ootaphuweene,

⁶apwiyaaya eroiheke wa aphuki. Erongheke vamulako hoye hoye vaseremuni ni ethoroleke naarunaya. Hiiho epottha eyo eniikhale ya apwiyaaya wa mahuku ootheene.

⁷Mutthu amuthumiha mwaniye muthiyana ntoko epottha, owo kharwa atapuxiwa ntoko ipottha ilopwana.

⁸Epottha eyo ethiyana yaahimusiveliha pwiiyaaya, atthunihereke weera eyo yoopoliweke. Ehithumiheriweke anamarwa, niwoko ti pwiiya okattannye wiiwanana.

⁹Vano apwiyaaya yamuthanlela mwanaya epottha eyo, epwattheke ntoko mwanaya muthiyana.

¹⁰Mwaana a pwiiya owo amuthela muthiyana anaaveeli, ahimukhootteleke oopacera yooca, ikuwo ni sookwanela sa vatthokoni.

¹¹Mulopwana owo aahikwanihera soonyesererihiwa tthaaru iya, vano muthiyana oopacera owo apwaheke ootaphuweene ahilivaka etthu.

¹²Yoowo onimuvulaliha mukina mpaka okhwa, vekhaikhai, iiviweke.

¹³Wa soothesene, aahipaka mwayiini, yapakeya ni erisa, atthaweleke nipuro Miyo kineeraaka kimoonihere.

¹⁴Mukina uupuwela omwiiva mukhwaawe mwayiini, mumvenxe valtaariniwaka* weera iiviwe.

¹⁵Yoowo onaamana atithawe hoye hoye amayawe, vekhaikhai iiviweke.

¹⁶Yoowo ommwiiya mukina anamuthumiha hoye hoye anaphwanyaniwa, vekhaikhai iiviweke.

¹⁷Yoowo onaalapha atithawe hoye hoye amayawe vekhaikhai iiviweke.

¹⁸Asilopwana eeli yawana ni mmoha amvulaliha mukina ni nluku naari ecipakhira, mene oomaniwa aahikhwa anummaathi,

¹⁹vano yoowo ovulalinghe khathorihiwa oomaniwa avenya anapacera weetta ni muttontto. Wa soothesene, owo amuliveke ehuhu oyeleenlaawe wiixaasera ni amukhavihereke mpaka olama.

²⁰Mulopwana avulaliha epotthaawe elopwana hoye hoye ethiyana ni muruputtho enakhwa, attaruxiweke.

²¹Vaheera epottha yavira mahuku meeli hoye hoye mararu ehikhwiiye, ahittaruxiweke yeenre ekhalaka yawawe.

²²Akina yawana enamvulaliha muthiyana oorupala enamutathiha aahikhalano makacamiho, namapahula aliveke yeeyo aneeraawe anyeserere iyawe muthiyana ole attharaka olakela wa aphuki.

²³Yakhala makacamiho matokotoko, waakakhanyihiwe okumi ni okumi,

²⁴niitho nniitho; niino nniino; ntata ni ntata; nnaawo ni nnaawo;

²⁵ohisa ni ohisiwa; nikhwatta nnikhwatta, aani omana ni omaniwa.

²⁶Mulopwana apwexa niitho na epotthaawe elopwana hoye hoye ethiyana ehinoona, owo atapuxeke okaporwaaya niwoko na niithonaya.

²⁷Akhula niino na epottha elopwana hoye hoye ethiyana, owo atapuxeke okaporwaaya niwoko na niinonaya.

²⁸Emombe elopwana yamuhoma mulopwana hoye hoye muthiyana mpaka omwiiva, eyo evonyiweke maluku mpaka okhwa ni khoontthuniheriwa okhuura enamaaya. Wa soothesene, muneene a emombe eyo khakhalano mulattu.

²⁹Wa soothesene, emombe yaari yaakhovelenle ohoma ni mwaneene asuwenleene ahinatthuka, ni emombe eyo enamwiiva mulopwana hoye hoye muthiyana, vano emombe evonyiweke maluku ni muneenetho iiviweke.

³⁰Wa soothesene, muneene anyesereriwa oliva, oopoleke okumaawe alivaka yeeyo onnyesereriwaawe.

³¹Nthorihelo nna nivareliweketho muteko emombe yamuhoma mmiravo hoye hoye mwaamwali.

³²Emombe yahoma epottha elopwana hoye hoye ethiyana, vano muneene a emombe eyo amuliveke ixekeli* miloko miraru muneene a epottha ni emombe evonyiweke maluku.

³³Mukina athipa nlitti ahinakhuneela ni yamorelamo emombe elopwana hoye hoye buuru,

³⁴muneene a nlitti aliveke yoolamuliwa; amulivaka muneene a mwaamunama ni amuhalaneke mwaamunama ookhwa.

³⁵Emombe elopwana ya mukina yavulaliha emombe ya mukhwaawe ni yiiva, ethumihiweke emombe ekumi ni ekawaneke musurukhu eriyariru ni mooteene yoowo enama yookhwa.

³⁶Wa soothesene, emombe elopwana yaari yaakhovelenle ohoma ni muneene ahinatthukelela, owo aliveke emombe ekumi ahalaneke yookhwa.