Read Makhuwa-Shirima Okhuma 22 Bible Online

Okhuma 22 - Makhuwa-Shirima bible

Okhuma 22

¹Mukina iiya emombe elopwana hoye hoye ekhondoolo, aniiva naari athumiha, aliveke imombe ithanu wa emombe eyo ni ikhondoolo ixexe wa ekhondoolo eyo.

²Namwiiya avariwa iiyaka ni avulalihiwa, anakhwa, yoowo omvulalinghe khankhalano nthowa na onyala.

³Vaheera yakhumelela oxeexeloweene, anaakhaleno nthowa na onyala. Namwiiya aliveke iiyalaawe, mene aahikhalano yoolivano, athumihiweke weera alive iiyalaawe.

⁴Axinama oowiiyiwa aphwanyaniwa ereene ni okumi — ekhalaka emombe, buuru naari ekhondoolo, namwiiya aliveke iphura.

⁵Mukina arongha ociha muhuwaawe mmatta hoye hoye mmatta ya iwuuva* ni ahiya ocaaka ematta ya mukina, aliveke ni sooreerela sa mmattamwawe hoye hoye mmattamwawe ya iwuuva*.

⁶Mukina apattiha mooro, onatuphela moothakoni, onahisa etrigu eri mmatta hoye hoye ihara naari ematta yootheene ya mukina, vano yoole opattinghe aliveke itthu soothesene seiye sisiiye.

⁷Mukina amwinnyerera mukhwaawe eyuuma yoorikaxa hoye hoye sooreela weera amuthokororele ni iyo siiyiwa mpaani mwa mukhwaawe ole, vano namwiiya, avariwa, aliveke iphura.

⁸Namwiiya aahiphwanyiwa, muneene a vaate owo iixoonihere ohoolo wa aphuki weera yooneye owo aahiiyale sooreela sa mukhwaawe.

⁹Yakhala eneereya atthu eeli enyakulihanaka weera emombe elopwana, buuru, ekhondoolo, ekuwo hoye hoye yooreela yooriheya ti yawaya, ooweeli yiixoonihere ohoolo wa aphuki. Yoowo anaathoonyiwe ni aphuki ntoko nanthowa, amuliveke mukhwaawe iphura.

¹⁰Mutthu amwinnyerera mukhwaawe weera amusungere buuru, emombe, ekhondoolo naari enama ekina ni eyo yakhwa, yavulalihiwa naari yiiyiwa ahimoonaka mutthu,

¹¹mulattwaayasa wuulummweke olipeliwaka vamaithoni wa Yave weera miyo nkikunxe ya muneene. Vano ontthuneya weera muneene aakhuleleke yeeyo; mukhwaawe khoontthuneya oliva etthu.

¹²Vaheera mwaamunama iiyiwa a mukhwaawe, amuliveke muneene.

¹³Mwaamunama owo anyaanyiwa ni axinama a ntuphini, amurongheleke yoowoonihera ehanle ni kharwa aliva etthu.

¹⁴Mukina amooliha mwaamunama a mukhwaawe ni owo avulalihiwa hoye hoye akhwa ahikhanle muneene, yoole oolinghe aliveke.

¹⁵Muneene akhalawo, khoontthuneya oliviwa. Muneene aliviwa oolihihaka, yooliviwaawe enooliveleya ni yeeyo yeereiye ni mwaamunama.

¹⁶Mulopwana amunyeenga mwaamwali oowiikosoopa ohitthomeriwe, anamukonano, vano aliveke nlivo nintheleliwa ni anaakhale mwaariye.

¹⁷Atithawe mwaamwali ole yaahitthuna omutheliha mulopwana, nlelo aliveke mulopwana owo nlivo na mwaamwali oowiikosoopa.

¹⁸Muhimuhiye mukhwiri ni okumi.

¹⁹Akhalaru mutthu onimukonano mwaamunama, iiviweke.

²⁰Akhalaru mutthu aneera apakele sooveleela wakhalaru muluku mukina omuhiya Yave, aphwatiweke.

²¹Muhaahasule naari muhaahooxe anamarwa, niwoko nyuwo mwaaritho anamarwa wExipitu.

²²Muhaahaawihe asinaamukhweli naari ikwaasuni.

²³Mwaahaawiha ni awo yakikhuwelela, vekhaikhai kinoowaakhulela makhupanyowaaya.

²⁴Onyoonyiwawaka onuukhale otokotoko ni kinoowiivasani ni ekatana. Axaarinyu eniithatuwe asinaamukhweli ni anamwaniinyu ikwaasuni.

²⁵Vano mwamoolihiha musurukhu mutthu mmoha a atthwaaka ori oohaawa, muhikhale ntoko namakopiha; muhimunyeserere oliva musurukhu woopwahaxa.

²⁶Mwaakhela mukaandyo wa mukhwiinyu ni ororomeliha, munghokoloxere ohinaanye wiila,

²⁷niwoko mukaandyowaawe ti yoowiikhuneelaawe emoharu oraaweno. Aniikhuneele eheeni? Owo akikhuwelela, kinimwiiwa, niwoko Miyo ti a ikharari.

²⁸Muhimveihe Muluku naari muhimulaphe muhooleli a mulokwaanyu.

²⁹Muhikiimane sooveleela sa matathaanyu naari nipuronanyu noowaama iwuuva*. Mukitteelihere mwaanaanyu a ntthaara,

³⁰ni matthaara a mihuwo sa imombe, ikhondoolo ni ipuri. Axaana mwaahiyeke ni amayaya wa mahuku mathanameeli, mene nihuku nanaathannaararu mukivaheke Miyo.

³¹Nyuwosa ti mulokwaaka wootteela. Muhikhuureru enama yoonyaanyiwa ni axinama a ntuphini; mwaavonyereke alapwa.