Read Makhuwa-Shirima Okhuma 23 Bible Online

Okhuma 23 - Makhuwa-Shirima bible

Okhuma 23

¹Ahikhale aneera amwaramwaxe ihaali soowootha. Muhimukhavihere namatakhala munkhalelaka namoona moota woowootha.

²Muhitthare yaatteliwe epakiwaka yoonanara. Nyuwo mwakhalela onamoona vantthekoni, muhivirikanyihe ekhaikhai mweerelaka osiveliha yaatteliwe.

³Muhimpakele nthalu mutthu oohaawa vantthekoni.

⁴Mwaphwanya emombe hoye hoye buuru a mwiittanaanyu ariheiyeene, munghokoloxere muneene.

⁵Nyuwo mwamoona buuru a mukina onoothanyani amoranaka murittaawe, muhimuhiyewo — mwamukhavihere.

⁶Muhaakhoottele oohaawa mmilattunimwaya othoriha nnene.

⁷Musembe milatthu soowoothera ni muhimwiive mutthu oororomeleya ni oohikhalano mulattu, niwoko nkinimulevelela nanthowa.

⁸Muhaakhulele makhwankwa, niwoko awo anaaphuta owiitho yaale anoona ni anghenyengeriha masu a oororomeleya.

⁹Muhaahasule anamarwa, niwoko nyeenyuweene moosuwela nnenesene onamarwa ti heeni mweenre mwakhalaka anamarwa wExipitu.

¹⁰Mwaale ni muhephe mmattamwanyu mwa iyaakha ithannamosa,

¹¹mene eyaakha yanaathannapiili muhiye yiitthuuwaka ehilimmwaka. Hiiho anamahaawa variyariwanyu eceeke seiyo simmorela ni seiyo singhalahala nsikhale sa axinama a ntuphini. Mpakeketho hiiho ni imattasanyu sa iwuuva* ni sooliveira*.

¹²Wa mahuku mathannamosa mvare mitekosanyu, mene nihuku nanaathannameeli muhivareru weera imombesanyu, abuurwaanyu, ipotthasanyu ni anamarwa yiitthuuwe ni saarweele ikuru.

¹³Mwiipasoope opaka sootheene seiyo koolamulenlaakani. Muhiitthane masina a miluku sikina; ehiiwiwe masinaaya mmwanomwanyu.

¹⁴Vano imaara tthaaru vayaakhani mukipakele efesta.

¹⁵Mpake efesta ya epaawu yoohikhalano eferementu. Muceeke epaawu yoohikhalano eferementu wa mahuku mathanameeli ntoko koolamulenlaakani. Mpake yeeyo mweehuhuni yoothanliwa mmweerini wa Abibi, niwoko mweereene yoowo mwaakhumihingwaanyu wExipitu. Ahikhale anaaphiye ohoolowaka matataru.

¹⁶Mpake efesta ya ohepha, eyo tiiyo sa soohepha soopacera sa mutekwaanyu woowaala. Mpake efesta ya emalihero ya ohepha ommaleloni wa eyaakha nyuwo mwaathokororaka soohepha.

¹⁷Asilopwana ootheene yiixoonihereke ohoolo wa Yave Muluku imaara tthaaru vayaakhani.

¹⁸Muhikiveleelele ephome ya sooveleela vamoha ni yakhalaru etthu enkhalano eferementu. Makhura a sooveleela a ifestasaka ehisungiweke mpaka waaxiiye.

¹⁹Muruuhe Empa ya Yave Mulukwaanyu mpatta woopacera wooreerelaxa wa soohephasanyu. Muhimwaapeye mwaaxaana a epuri mmukakani wa amayawe.

²⁰Vano, kinoorumihelani ndyelo ohoolowanyu weera ookosoopeni mukwaha wootheene ni weera oophiihaseni vanipuroni koorehererenlaakani.

²¹Nnene mwiiwelele yeeyo owo onghimaawe muhimvaanyeke, niwoko kharwa alevelela ovaanyawanyu neenre Nsinanaka nikhalaka mwa yoowo.

²²Mwiiwelela nnenesene yeeyo aneeraawe ahime ni mwapaka sootheene kinoolamulelaakani, nkikhale mwiittana a amwiittanaanyu ni ngwanani a awananaanyu.

²³Ndyelowaaka onimoohoolelani ni onimoophiihasani elapo ya awAmori, aHiti, aPerizi, aKanaani, aHivi ni aYebusi ni kinimwaaphwata.

²⁴Muhikokhorele ohoolo wa milukusaya, hata muhilape naari muhitakihe epakelowaaya. Mphwate miluku iyo ni mwaakankhaanyule amarimbwaaya ootteela.

²⁵Munlape Yave Mulukwaanyu ni onimooreelihasani oovahakani yooca ni maahi. Kinoovenxa iretta variyariwanyusa.

²⁶Mweelaponimwanyu khaawo muthiyana anaarupale anahokolowa hiiho. Hata khakhala mwali eekupa. Kinookwanihera waatta wa mahukwaanyu.

²⁷Kinoorumiha ohoolowanyu woopihawaka weera erukureereye nyuru maloko ootheene nyuwo muneeraanyu mphwanye. Nkaarerihe ettuli amwiittanaanyu ootheene etthawaka ohoolowanyu.

²⁸Kinootannyera mitteendehu weera siwoomole aHivi, aKanaani ni aHiti ohoolowanyu.

²⁹Nkirwa kiwoomola ootheene eyaakha emoha weera elapo ehiheleye mathala ni axinama a ntuphini ehaandyeerereye ewoopopihasakani.

³⁰Kinoowoomola vakhaani vakhaani mpaka nyuwosa muneeraanyu mwaandyeererane muxuwaattaka weera mukuxe elapo.

³¹Kinookhaliha nyiinanosanyu okhuma Ephareiya Yooxeera mpaka ephareiya ya aFilisti, ni okhuma onikareni mpaka mooloko Efratesi. Kinimoovahani mmatatanimwanyu miloko siri mweelaponi mmo, mwa seiyo muneeraanyu moomole ohoolowanyu.

³²Muhiwiiraaneno yaawo hata milukusaya.

³³Muhihiye miloko iyo simakaka mweelaponimwanyu weera sihootthekiheni wa Miyo, niwoko woolapa milukusaya, wa nyuwosa nnikhale ntapha.”