Read Makhuwa-Shirima Okhuma 27 Bible Online

Okhuma 27 - Makhuwa-Shirima bible

Okhuma 27

¹Mwaapake altaari* a mwiri wa akaasiya* ekhaleke oolikanela ni miringo iya: imeetru* piili ni vakhaani, vamoha ni imeetru* piilitho ni vakhaani, vamoha ni emeetru* emoha ni vakhaani.

²Mwaapakele nnyakanene mmaloothoni oomaxexe sikhalaka iyo etthu emohamoharu ni altaari* eneera ehuruweliheke ebronze*.

³Mwapaketho ikaruma sootheene sa ebronze* — mookhupelamo ettuura, apoxoro, ibasiya soovuuvihera, igarfu* sa enama ni yootholelano makhala.

⁴Mwapakeletho nivali na ebronze* antoko ntthavi ni munela a ebronze* wa khula nlootho na nivali.

⁵Vano mwiikaathere vathi wa eriyari ya waathi wa altaari* eneera ekhale eriyari ya orakamela wa altaari*.

⁶Mwaapakele altaari* ikopo sa mwiri wa akaasiya* ni mwahuruwele ebronze*.

⁷Ikoposene seiyo sivolongheriweke mwaannelani mwa mipatta miili sa altaari*, awo yaateexiwaka.

⁸Mwaapake altaari* a nikhuku, a itthaabwa ntoko mooniheriwaanyu omwaako.

⁹Mwapakele etabernaakulu* nipuwa. Vano mpatta wa ohitto nikhalekeno imeetru* miloko mixexe niithannamosa mweerakameloni. Vahoolowaya mwapake iluttu sa omokoni sa eliinyu* sootthaviwa,

¹⁰ni amarimbu miloko miili vamoha ni nyettosaya miloko mili sa ebronze* nitho ivarelelo ni makumano a eparatha* mwaamarimbuni.

¹¹Mpatta wa ottuttuwanitho ekhalekeno imeetru* miloko mixexe niithannamosa mweerakameloni. Vano ekhalekenotho iluttu sa omokoni, amarimbu miloko miili, nyetto miloko miili sa ebronze*, ivarelelo ni makumano a eparatha* mwaamarimbuni.

¹²Mpatta wa ninkela nsuwa ni iluttusaya sa omokoni etabernaakulu* ekhalekeno imeetru* miloko miili ni piili ni eriyari ya emeetru* mweekhuveeloni ni amarimbu muloko ni nyettosaya muloko.

¹³Mpatta wa ninkhuma nsuwa ekhalaneketho imeetru* miloko miili ni piili ni eriyari ya emeetru* mweekhuveeloni.

¹⁴Vano nsikhale iluttu sa omokoni sa imeetru* ithannamosa ni eriyari ya emeetru* mweerakameloni wa mpatta wa mulako ni amarimbu araru ni nyettosaya miraru,

¹⁵ni iluttu sa omokoni sa imeetru* ithannamosa ni eriyari ya emeetru* mweerakameloni wa mpatta mukina wa mulako ni amarimbu araru ni nyettosaya miraru.

¹⁶Mulako wa nipuwa onuukhaleno eluttu ya imeetru* ithanniixexe mweerakameloni, ya eliinyu* yootthaveliwa ni ya kanka, yookankela ni yooxeera. Eniipakiwe ni namaxora ekhalanaka amarimbu axexe ni nyettosaya mixexe.

¹⁷Amarimbu ootheene arukureenre nipuwa ekhumanyihiweke ni ivarelelo sa eparatha* ni nyetto sa ebronze*.

¹⁸Nipuwa nno nnikhale ni miringo iya: imeetru* miloko mixexe niithannamosa, vamoha ni imeetru* miloko miili ni piili ni eriyari ya emeetru*. Nnikhalanetho iluttu sa eliinyu* soothaviwa ni imeetru* piili ni vakhaani orakamelawaya ni nyetto sa ebronze*.

¹⁹Ikaruma sootheene sa muteko wa etabernaakulu* mpakatho ikhomo sa eheema ni sa nipuwa sipakeliweke ebronze*.

²⁰Mwaalamule aYixrayeli weera yooruuheleni makhura ooreera a sooliveira* oowaamiwa yeereliwaka omwaleelela weera onyaari ovareleke woohihiyerera.

²¹Muheemani mwa muthukumano, omokoni wa eluttu yookawanya eri ohoolo wa Namoona*, Aharoni ni anamwanaawe epwahereraseke opattiha onyaari ohoolo wa Yave ekhumelo woosilo mpaka oxa. Nna nikhaleke nlamulo noohimala variyari wa aYixrayeli wa khula ekhapira.