Read Makhuwa-Shirima Okhuma 28 Bible Online

Okhuma 28 - Makhuwa-Shirima bible

Okhuma 28

¹Vano mmwiitthane munninyu Aharoni ni mummwalamwaxe ni aYixrayeli vamoha ni anamwanaawe asilopwana, Nadabi, Abiyu, Eleyazari ni Ithamari weera ekirumeele ntoko asaserdoti*.

²Mumpakele munninyu soowara sootteela sinoonihera ovuwa ni nttittimiho.

³Mwaalamulele asilopwana ootheene oowera mwa yaawo kaaweringhaaka weera ettotthe soowaara sootteela sa Aharoni weera akirumeele ntoko musaserdoti*.

⁴Soowara sineera sittotthiweke ti iya: Yoowara vakakasani, mooxikootti, evestidu, mukaandyo wooxoriwa, ecireemba ni laamba. Emuttottheleke munninyu Aharoni ni anamwanaawe asilopwana soowara sootteela iyo weera ekirumeele ntoko asaserdoti*.

⁵Evareleke muteko ikuwo sa nliinya nootteettheya, na ncano, na kanka, nookankela ni nooxeera.

⁶Empake mooxikootti a ncano, a kanka, ookankela, ooxeera ni nliinya nootteettheya — oottotthiwa ni aratti.

⁷Akhalanekeno miramba miili sootthukelano weera mipatta soomiili sikumanyihiweke nnene.

⁸Laamba a mooxikootti ontthukeliwaaweno akhaleke a ekuwo emoha. Vano laamba owo akhaleketho ootteettheya ootthaviwa ni maliinya a ncano, a kanka, ookankela ni ooxeera.

⁹Ekuxe maluku meeli a onikisi* ni elepemo masina a anamwane asilopwana a Yixrayeli.

¹⁰Elepe masinaaya ettharihaka oyariwawaya — masina mathannamosa vanlukuni nimoha ni mathannamosa makinaawo nikinanno.

¹¹Elepe masina a anamwane asilopwana a Yixrayeli mmalukuni meeli moota namalepa a maluku onlepaawe munnelani woottittelano. Vahoolowaya mutthukelele maluku muloko ni meeli vakaaxani ekhaanene muloko ni meeli a eyuuma yoorikaxa.

¹²Vano, mutthukelele mmakhatani mwa mooxikootti ntoko maluku oowuupuxera anamwane asilopwana a Yixrayeli. Aharoni akuxeke masina awo mmakhatanimwawe ntoko eyuupuxero ohoolo wa Yave.

¹³Epakele ikaaxa sikhaanene sa eyuuma yoorikaxa

¹⁴ni onyooro miili wa eyuuma yoorikaxa, woorithiwa ntoko mukhoyi ni mutthukeleleno ikaaxa.

¹⁵Aratti epake yoowara ya vakakasani yoolakelano. Epake antoko mooxikootti: Ootthaviwa ni maliinya ootteettheya, a ncano, a kanka, ookankela ni ooxeera.

¹⁶Ekhaleke yoolikanela ni miringo iya: isentimeetru* miloko miili ni piili, vamoha ni isentimeetru* miloko miili ni piilitho. Vano mupinde veeli.

¹⁷Woottharelana mutthukelelewo misera mixexe sa maluku oowaaraxa. Mmuserani woopacera akhaleke rubi*, topaziyo* ni berilo*.

¹⁸Mmuserani wanaaveeli yaspe*, safira* ni esmeralda*;

¹⁹mmuserani wanaararu yasinto*, agata* ni ametista*

²⁰ni mmuserani wanaaxexe krisolito*, onikisi* ni yaspe*. Maluku ootheene awo etthukeleliweke vakaaxaniwaya ni eyuuma yoorikaxa.

²¹Ekhaleke maluku muloko ni meeli — nimoha wa khula nsina na anamwane asilopwana a Yixrayeli; khula nluku noolempwa ntoko munnelani woottittelano, nikhalanaka nsina nimoha na khula epuumba.

²²Epakeletho yoowara ya vakakasani onyooro wa eyuuma yoorikaxa, woorithiwa ntoko mukhoyi.

²³Yaapaketho annela eeli a eyuuma yoorikaxa ni yaatthukelele okhwipi wa mipatta miili sa yoowara ya vakakasani.

²⁴Etthukeleletho onyooro miili wa eyuuma yoorikaxa ni annela ari okhwipi wa yoowara ya vakakasani.

²⁵Mipatta sikina sa onyooro sitthukeleliweke ni ikaaxa piili. Vahoolowaya etthukeleleke sootheene iyo mmakhatani mwa mooxikootti mpatta wa ohoolo.

²⁶Yaapake annela eeli akina a eyuuma yoorikaxa ni yaatthukelele muxerexere wa mipatta miili sikina sa yoowara ya vakakasani; wa yooxoriwa ya mpuwa, vakhiviru wa mooxikootti.

²⁷Yaapake annela eeli akina a eyuuma yoorikaxa ni yaatthukelele mpatta wa vathi vathi wa sa mmakhatani, ohoolo wa mooxikootti, mukerekhere nttottho, ciireru osulu wa laamba a mooxikootti.

²⁸Annela a yoowara ya vakakasani etthukeleliweke ni mooxikootti ni muramba wa kanka, eluttiwaka ni laamba weera ehiinaineke.

²⁹Imaara sootheene Aharoni aneeraawe avolowe Nipuro Nootteela*, onookuxa masina a anamwane asilopwana a Yixrayeli vamurimaniwawe mpatta wa yoowara ya vakakasani yoolakelano, ntoko yoowuupuwelela yoohimala vamaithoni wa Yave.

³⁰Mwiikaathitho Urimi ni Tumimi* mpatta wa yoowara ya vakakasani yoolakelano weera sikhale vamurimani wa Aharoni imaara sootheene aneeraawe avolowe vamaithoni wa Yave. Hiiho, Aharoni onookuxa vamurimani moota woolakelano mwa aYixrayeli ohoolo wa Yave.

³¹Evestidu yootheene ya mooxikootti ettotthiwe ya kanka,

³²ni eriyari ehelewo nlaka weera ovirewo muru. Mukhwipi mwa nlaka nno ephitaanyeke mattotthelo ntoko ekolarinya, weera ehaahuwe.

³³Vano mooxoriwamwaya muheleke irooma* sa kanka, sookankela ni sooxeera ni evaxavaxaka ni ingilingili sa eyuuma yoorikaxa.

³⁴Ingilingili sa eyuuma yoorikaxa ni irooma* soovaxavaxiwa sirukureereke mooxoriwa mwa evestidu yootheene.

³⁵Aharoni awareke imaara sootheene aneeraawe arumeele. Oruma wa ingilingili nsiiwiweke owo aavolowaka Nipuro Nootteela* ohoolo wa Yave ni aakhumaka, weera ahikhwe.

³⁶Mpake etthu ya malootho mararu ya eyuuma yoorikaxa ni mulepemo ntoko namalepa onlepaawe munnelani woottittelano. Mulepe ha: YOOTTEELIHERIWA YAVE.

³⁷Mutthukelele eyo ohoolo wa ecireemba ni muramba wa kanka.

³⁸Etthweene yeeyo ekhaleke vayuucini wa Aharoni ni anaakuxe nthowa na yakhalaru yoottheka aYixrayeli eneeraaya epahule mwaha wa sooveleelela sootteela. Ekhaleke vayuucini wa Aharoni mahiku ootheene weera aYixrayeli ekhale oowaakhuleliwa ni Yave.

³⁹Evestiduweene yeeyo ni ecireemba sitthaviweke ni nliinya nootteettheya. Laamba apakiwe ni namaxora.

⁴⁰Mwaapakele anamwane asilopwana a Aharoni ivestidu, alaamba ni sootthukela mmuru sinoonihera ovuwa ni nttittimiho.

⁴¹Mungwaringheene munninyu Aharoni ni anamwanaawe asilopwana ni soowara iyo, mwaattikitthelase, mwaakhalihase ni mwaatteelihase weera ekirumeele ntoko asaserdoti*.

⁴²Mwaattotthelase akaputtula a mpuwa a nliinya nootteettheya okhuma muyuununi mpaka mutakhwini weera yiikuttelelase etiriyaaya.

⁴³Aharoni ni anamwanaawe asilopwana ewaraseke iyo imaara sootheene eneraaya evolowaseke Muheemani mwa Muthukumano, hoye hoye yaarowasaka wa altaari* weera erumeele vaNipuroni Nootteela*. Hiiho anoosemba nthowa ninruuhela okhwa. Nna nikhaleke nlamulo noohimala wa Aharoni ni ekhapiraawe.