Read Makhuwa-Shirima Okhuma 30 Bible Online

Okhuma 30 - Makhuwa-Shirima bible

Okhuma 30

¹Mwaapake altaari* a mwiri wa akaasiya* weera ehisiwe erubani*.

²Ekhaleke oolikanela ni miringo iya: eriyari ya emeetru* emoha, vamoha ni eriyari ya emeetru*, vamoha ni wookwanaka emeetru* emoha. Manyakaaya ekhaleke etthu emohamoharu ni altaari*.

³Muttikitthele mpatta wa osulu, mipatta sikina sootheene nitho manyaka ni eyuuma yoorikaxa. Mvirihele mukhwipimwaya ni eyuuma yoorikaxa.

⁴Mwaapakele annela eeli a eyuuma yoorikaxa wa khula mpatta wa altaari* vathi wa yooviriheliwa simvolongheriwaayamo ikopo sinteexeriwa.

⁵Mpake ikopo sa mwiri wa akaasiya* ni muttikitthele ni eyuuma yoorikaxa.

⁶Ngwiikaathi altaari* ohoolo wa eluttu eri ohoolo wa Arka* a Namoona; ohoolo wa yookhuneelano ya Wiiraana enimukhuneela Namoona, mwa weiwo kineeraaka kaphwanyaneye ni nyuwo.

⁷Khula oxeexelo Aharoni aarehereraka onyaari, ahiseketho erubani* valtaarini*.

⁸Ahiseketho erubani* apattihaka onyaari wiilaka weera ehisiwe erubani* woohihiyerera ohoolo wa Yave wa khula ekhapira.

⁹Muhiveleele valtaareene yaala wakhalaru moota mukina wa erubani*, hoye hoye sooveleela soohisa, naari sooveleela sa etrigu ni muhimiinelewo sooveleela sa soowura.

¹⁰Emaara emoha vayaakhani Aharoni apakeke wiiraana vamanyakaniwaya. Wiiraanawene weiwo wa khula eyaakha opakiweke ni ephome ya yooveleela mwaha wa yoottheka weera siiraane ikhapira sootheene sa muhoolo. Altaari* awo ti ootteelaxa wa Yave.”

¹¹Vano Yave aamweerela Moisesi:

¹²“Nyuwo mwaampakaka namalepela a aYixrayeli, khula mutthu, aalikeliwaka, amulive Yave nlivo noowiixoopolela. Hiiho khanaarweela nakhalaru nihooxo nyuwo mwaawaalikelaka.

¹³Khula mutthu aalepeliwaka, amuliveke Yave eriyari ya exekeli, eyo tiiyo igrama* ithannamosa, ettharaka exekeli* ya Nipuro Nootteela*, mwa yeeyo enlemela igrama* muloko ni piili. Eriyari ya exekeli* eyo ti yoomveleelela Yave.

¹⁴Atthu ootheene alepeliwe a iyaakha miloko miili wookela muhoolo empakele Yave yooveleela.

¹⁵Vano atthu yaampakelaka Yave yooveleela yoowiixoopolela, anamapuha ehiliveke woopwaha eriyari ya exekeli* naari oohaawa ehiliveke vakhaani.

¹⁶Musurukhu wa woopola waakheliwe wa aYixrayeli yiinnyerereke omutekoni wa Eheema ya Muthukumano*. Eniikhale yoowuupuwelela wa aYixrayeli ohoolo wa Yave weera yoopolele ikumisanyu.”

¹⁷Vano Yave aamweerela Moisesi:

¹⁸“Mpake ebasiya yoowiivululelano ya ebronze* ni mweettwaaya wa ebronze*. Mwiikaathi eriyari ya Eheema ya Muthukumano* ni altaari* ni mulamulele osarihiwamo maahi.

¹⁹Aharoni ni anamwanaawe asilopwana yiivululeke matataaya ni inaawosaya ni maahi a mbasiyani.

²⁰Imaara sootheene eneeraaya evolowaseke Muheemani ya Muthukumano*, yiivululaseke weera ehikhwaase. Vano awo yaawaattamelaka altaari* weera emurumeele Yave, eveleelaka yooveleela vamooroni,

²¹yiivululeke weera ehikhwaase. Nna ti nlamulo noohimala wa Aharoni ni ekhapiraawe yootheene wa mahuku ootheene.”

²²Vano Yave aamweerela Moisesi:

²³“Muthukumanye sooreerela sooreeraxa sinttharelana: ikiilu* ithannamosa sa emiira* ya maaheene, ikiilu* tthaaru sa kanela* oosiva, ikiilu* tthaaru sa mihali* soowunkhela,

²⁴ikiilu* ithannamosa sa kasiya*, sittharaka mphimo wa exekeli* ya Nipuro Nootteela*, ni mwaandyeereretho iliitru* ixexe ni eriyaraaya sa makhura a sooliveira*.

²⁵Mutakansere seiyo weera ekhale makhura ootteela amvareliwa muteko woottikitthelano; ootakansiwa soowunkhela, oopakiwa ni namweeka. Eniikhale makhura ootteela amvareliwa muteko woottikitthelano.

²⁶Vahoolowaya muvareleke muteko makhura awo weera muttikitthele Eheema ya Muthukumano*, Arka* a Namoona,

²⁷meesa ni ikarumasaya sootheene, onyaari ni ikarumasaya, altaari* a erubani*,

²⁸altaari* a sooveleela soohisa ni ikarumasaya ni ebasiya ni mweettwaaya.

²⁹Ontthuneya weera nyuwo mutteelihe itthu iya weera sikhale sootteelaxa ni eniyaataveru eniikhale yootteela.

³⁰Munttikitthele Aharoni ni anamwanaawe asilopwana ni mwaatteelihe weera ekirumeele ntoko asaserdoti*.

³¹Mwaaleele aYixrayeli: ‘Awo ekhaleke makhura ootteela oottikitthelano wa ikhapira sa mahuku ootheene.

³²Muhimmiineleru mukina naari muheeke makhura makina ntoko yaala. Ti ootteela ni hiiho nyuwosa muttittimihereke.

³³Akhalaru mutthu aneera eeke makhura ntoko yaala hoye hoye anaammiinele mukina ahikhanle musaserdoti*, oomoliweke munlokonimwawe.’”

³⁴Vahoolowaya Yave aamweerela Moisesi: “Muthukumanye itthu sooreerela soowunkhelaxa sinttharelana: mattonyo a otothowa wa nnyoma, onika*, nnyoma na niphuwa niitthaniwa galabano, ni erubani* yooreeraxa — sootheene silikaneleke waattawaya.

³⁵Mweeke erubani* yootakansiwa ni soowunkhelaxa, yoopakiwa ni namweeka. Eyo yeeleeliweke, yooreeraxa ni yootteelihiwa.

³⁶Axileke mpatta mukina mpaka oxileya ni iikaathiki ohoolo wa Namoona Muheemani ya Muthukumano*, mwa weiwo kineeraaka kaphwanyaneyewo ni nyuwo. Eyo eniikhale yootteelaxa wa nyuwo.

³⁷Muheekeru erubani* ekina mulikanxaka yeela weera mvarele muteko; muttittimihereke weera yootteela, ekhalaka ya Yave.

³⁸Akhalaru mutthu aneera eeke erubani* ntoko yeela weera emusivele wunkhelawaya oomoliweke munlokonimwawe.”