Read Makhuwa-Shirima Okhuma 33 Bible Online

Okhuma 33 - Makhuwa-Shirima bible

Okhuma 33

¹Vano Yave aamweerela Moisesi: “Muttimule nipuro nna ni muloko mukhuminghaanyu wExipitu ni murowe elapo kaamuroromelinghaaka ni nlipelo Abrahaamu, Isaki ni Yakobe keeraaka: ‘Kinoovaha wa ekhapiraanyu.’

²Miyo kinoomurumiha ndyelo ohoolowanyu, kiwoomolaka aKanaani, awAmori, aHiti, aPerizi, aHivi ni aYebusi.

³Murowe elapo yoosareya mukaka ni oravo. Vaheera Miyo nkinrowa ni nyuwosa weera kihoophwataseni, niwoko nyuwosa ti muloko woottiyamaaru.”

⁴Muloko wiiwaka masu ale oowoopiha, waapacera olalamika ni khaawo aawanre itthu sooreera soorikaxa.

⁵Waalalamika, niwoko Yave aamweerela Moisesi: “Mwaaleele aYixrayeli: ‘Nyuwosa ti muloko woottiyamaaru. Miyo kaarowa ni nyuwo hata wa ehuhu vakhaani, kaamphwata muloko owo. Vano, murule itthusanyu sooreera soorikaxa ni kinoolakela yoowoopakasani.”

⁶Tivawo okhuma omwaako Horebi mpaka ohoolo aYixrayeli khayaawararu itthusaya sooreera soorikaxa.

⁷Vano Moisesi aakhovelela okunga eheema okerekhere wa waakhoneliwa yiitthaniwaka eyo “Eheema ya Muthukumano*.” Akhalaru mutthu aatthuna omukoha Yave aarowa eHeemeene yeeyo okerekhere wa waakhoneliwa.

⁸Imaara sootheene Moisesi aarowaawewo, muloko wootheene wannavenya weemelaka vamulako wa iheemasaya, ongwehexexaka Moisesi mpaka ovolowamo.

⁹Moisesi aavolowaawemo, nrimbu na mahutte nannakhuruwa nikhuneelaka Mulako wa Eheema, Yave uulumaka ni Moisesi.

¹⁰Khula emaara muloko woonaaya nrimbu na mahutte nikhuneenleene mulako wa Eheema, ootheene yanneemela, enalapa — khula mutthu vamulako wa eheemaawe.

¹¹Yave uuluma ni Moisesi ttunda ttunda ntoko mutthu onuuluma ni nthamwenaawe. Vahoolowaya Moisesi annahokoleela waakhoneliwa, mene namakhaviheraawe Yoxuwa, mwaana a Nuni, khaavenyaru vaheemani.

¹²Moisesi aamweerela Yave: “Nyuwo mookeerela: ‘Muhoolele muloko ola,’ mene khamunkitthunihera omusuwela taani muneeraanyu mukirumihele. Mweenre: ‘Kohoosuwelani nnenesene ni wa nyuwo koosiveliwa.’

¹³Mwakoona ntoko oosiveleya, mukoonihere sootthunasanyu weera koosuweleni ni kipwaherereke waakhuleliwa ni Nyuwo. Muupuwelele weera muloko ola ti wawinyu.”

¹⁴Yave aamwaakhula: “Okhalawaka onimoohoolelani ni kinimoovahani wiitthuuwa.”

¹⁵Vano Moisesi aamweerela: “Okhalawanyu waahinihoola, muhinilamulele ottimula wenno.

¹⁶Ngwisuwanyeye hai weera miyo ni mulokwaanyu munnanihakalalela Nyuwo mwaahinihoola? Onuuhiyaneye hai hiyo ntoko mulokwaanyu ni miloko sikina sootheene sa elapo ya vathi?”

¹⁷Yave aamwaakhula Moisesi: “Kinoopaka etthweene yeeyo mukivekenlaanyu, niwoko mookisiveliha ni kohoosuwelani nnenesene.”

¹⁸Vanonto Moisesi aamweerela: “Mukoonihere ovuwawanyu.”

¹⁹Yave aaheera: “Kinoorumiha onnenaaka weera ovire ohoolowanyu ni kinoolaleiya Nsinanaka, Yave, muraanyuwo. Kinoommorela ikharari yoowo kintthunaaka ommorela ni kinoompixera murima yoowo kintthunaaka ompixera.

²⁰Wa soothesene, khoonghwereya woona ekhovaaka, niwoko khaawo ongwera okoona anapwaherera ni okumi.”

²¹Vano Yave aapwaherera: “Nookhala va nipuro vakhivuruwaka, mwa weiwo mungweraanyu weemela vamwala.

²²Waaviraka ovuwawaka, kinimoohelani munikhukuni nri vamwala ni kinimookhuneelani ni ntatanaka mpaka Miyo ovira.

²³Vahoolowaya kinoovenxa ntatanaka ni nyuwo munimoona ettulaaka, mene Koontthuniheriwa woona ekhovaaka.”