Read Makhuwa-Shirima Okhuma 36 Bible Online

Okhuma 36 - Makhuwa-Shirima bible

Okhuma 36

¹Bezaleli ni Oholiyabi ni asilopwana ootheene oowera, mwa yaawo Yave aavanghaawe oowera ni akhili okwanihera miteko sootheene sa oteka wa Nipuro Nootteela*, evareke muteko ntoko Yave aalamulenlaawe.”

²Vano Moisesi aamwiitthana Bezaleli ni Oholiyabi ni asilopwana ootheene oowera, mwa yaawo Yave aaweringhaawe ni yaari oolikaneene orwa ovara muteko.

³Yaahaakhela wa Moisesi sooveleela sootheene aYixrayeli yaaruuhalaaya weera sitekeliweno Nipuro Nootteela*. Khula ooxeexelo atthu yannapwaherera oruuha sooveleela ni otthunawaya.

⁴Tivawo aratti ootheene yaavara muteko vaNipuroni Nootteela* yooceelinghaaya mitekosaya,

⁵enamweerela Moisesi: “Atthu anniruuha vanceene opwaha onkwanelaaya weera nivarele muteko Yave olamulenlaawe.”

⁶Vano Moisesi aahaalamulela weera wahimmwe okonelingwe mutthenga ola: ‘Ahikhaleru mulopwana naari muthiyana aneera apaketho sooveleela sikina wa Nipuro Nootteela*.’ Hiiho atthu yaahiihiwa oruuhatho,

⁷niwoko yeeyo yaaruuhiwe yaahaattaxa mpaka okwanela muteko wootheene.

⁸Asilopwana ootheene yaawera variyari wa anamiteko yaateka etabernaakulu* ni iluttu muloko sa mpuwa sa nliinya nootteettheya sitthaviweene ni ikuwo sa kanka, sookankela ni sooxeera, ni akerubini* exoreliweenemo.

⁹Iluttu sootheene sa mpuwa saamulikanela: imeetru* muloko ni piili ni eriyari ya emeetru*, vamoha ni emeetru* emoha ni wookwanaka imeetru* piili.

¹⁰Yaaluttanya iluttu ithanu ekina ni ekhwaaya ni yaapaka hiiho ni ithanu sikina iye.

¹¹Vahoolowaya yaattotthelela miramba sa ikuwo sa kanka mukhwipi wa eluttu yookisera ya ithanu soopacera ni hiihotho eluttu yookisera sa ithanu sikina.

¹²Yaattotthela miramba miloko mithanu muluttuni yookisera ya ithanu soopacera, nitho miramba miloko mithanu muluttuni yookisera ya ithanu sikina moota wooweera miramba siwehaneke.

¹³Yaapaka ivarelelo miloko mithanu sa eyuuma yoorikaxa evarelaka muteko iye wootthukelelano iluttu ekina ni ekhwaaya weera etabernaakulu* ekhaleke emohamoharu.

¹⁴Yaahoopopanya iluttu muloko niimoha sa mapururu a ipuri enapakasa eheema yookhuneelano etabernaakulu*.

¹⁵Iluttu muloko niimoha saamulikanela: imeetru* muloko ni tthaaru ni eriyari ya emeetru*, vamoha ni emeetru* emoha ni wookwanaka imeetru* piili.

¹⁶Yaaluttanya mpatta mmoha iluttu ithanu nitho ithannamosa sikina mpatta mukina.

¹⁷Vahoolowaya yaattotthelela miramba miloko mithanu mukhwipi waaxoriwe wa eluttu yookisera ya ithanu soopacera ni miramba miloko mithanu mukhwipi waaxoriwe wa yookisera ya ithannamosa sikina.

¹⁸Yaapaka ivarelelo miloko mithanu sa ebronze* weera ekumanyihe eheema ekhalihaka emohamoharu.

¹⁹Yaapakelatho eheema yookhuneelano ya ixapala sa amaankhoro sooningiwa yooxeera, ni vasuluwaya ixapala soohukhiwa.

²⁰Yaapakela etabernaakulu* acikhi a mwiri wa akaasiya*.

²¹Khula cikhi aakhalano miringo iya: imeetru* ixexe ni eriyari ya emeetru*, vamoha ni wookwanaka emeetru* emoha,

²²alubaanyihiwaka veeli weera akumane ni mukhwaawe. Ti hiiho yaapankaaya acikhi ootheene a etabernaakulu*.

²³Yaahaapaka acikhi miloko miili mpatta wa ohitto wa etabernaakulu*

²⁴ni vathiwaya nyettosaya miloko mixexe sa eparatha* — nyetto miili wa khula cikhi; mmoha vathi wa khula makumano.

²⁵Vano, wa mpatta mukina ori ottuttuwani wa etabernaakulu*, yaahaapaka acikhi miloko miili,

²⁶ni vathiwaya nyettosaya miloko mixexe sa eparatha* — nyetto miili wa khula cikhi.

²⁷Yaahaapakatho acikhi athannamosa opithela wa etabernaakulu*, eyo tiiyo mpatta ninkela nsuwa,

²⁸ni acikhi eeli yaahiikaathiwa opithela mmaloothoni a etabernaakulu*.

²⁹Acikhi a mmaloothoni meeli awo yaaphitaanyiwa okhuma vathi mpaka osulu, etthukiweene ni munela mmoha. Ooweeli yaapakiwa moota mmoha.

³⁰Vano yaakhala acikhi athannaararu ni nyetto muloko ni mithannamosa sa eparatha*; miili vathi wa khula cikhi.

³¹Yaapakatho mikoomba mithanu sa mwiri wa akaasiya* wa acikhi a mpatta mmoha wa etabernaakulu*,

³²mithanu wa acikhi a mpatta mukina, nitho mithanu wa yaawo a mpatta ninkela nsuwa, opithela wa etabernaakulu*.

³³Yaapaka mukoomba wa eriyari weera okhume okhwipi mpaka okhwipi variyari wa acikhi.

³⁴Yaahaahuruwela acikhi ni eyuuma yoorikaxa yooreera ni yaahaapaka annela a eyuumeene yeeyo oolipiherano mikoomba. Vano mikoomba iyo saahuruweliwatho ni eyuumeene yeeyo.

³⁵Yaapaka eluttu ya nliinya nootteettheya etthaveliweene ni ikuwo sa kanka, sookankela ni sooxeera. Vano akerubini* yaaxoriwamo ni anamaxora ooweraxa.

³⁶Yaapakela amarimbu axexe a mwiri wa akaasiya*, enaahuruwela ni eyuuma yoorikaxa. Yaapakelatho ivarelelo sa eyuuma yoorikaxa ni yaatotoxera mikoomba sa eparatha*.

³⁷Vano yaapakela eluttu wa mulako wa eheema ya nliinya nootteettheya yootthaveliwa ni ikuwo sa kanka, sookankela ni sooxeera, yoopakiwa ni namaxora.

³⁸Yaapakela eluttu ivarelelo ithanu ni amarimbu athanu a mwiri wa akaasiya*, enahuruwela ni eyuuma yoorikaxa. Yaahanelatho nyettosaya mithanu sa ebronze*.