Read Makhuwa-Shirima Okhuma 39 Bible Online

Okhuma 39 - Makhuwa-Shirima bible

Okhuma 39

¹Yaattottha soowara sootthaviwa ni ikuwo sa kanka, sookankela, ni sooxeera weera asaserdoti* erumeeleke vaNipuroni Nootteela*. Yaamuttotthelatho Aharoni soowara sootteela, ntoko Yave aamulamulenlaawe Moisesi.

²Yaamuttottha mooxikootti ootteettheya, ootthaviwa ni nliinya na ekuwo ya ncano, ya kanka, yookankela ni yooxeera.

³Yaahana ezazaalihaka eyuuma yoorikaxa, enaleka awaayeene weera exoreliwekeno ikuwo sa nliinya nootteettheya na kanka, nookankela ni nooxeera — muteko wooreerela wa namaratta.

⁴Yaampakela mooxikootti miramba sa mmakhatani sitthukiweene okhwipi wa mipattasaya soomiili weera sitthukeliwekeno.

⁵Laamba aatthukeliwa ni mooxikootti yaari ekuwo emohamoharu. Laambatho aapakiwe ni nliinya nootteettheya nootthaviwa ni maliinya a ncano, a kanka, ookankela ni ooxeera, ntoko Yave aamulamulenlaawe Moisesi.

⁶Yaattotthelela maluku a onikisi* mukaaxani ekhaanene ya eyuuma yoorikaxa, enalepamo masina a anamwane asilopwana a Yixrayeli, ntoko namalepa onlepaawe munnelani woottittelano.

⁷Vahoolowaya yaattotthelela mmakhatani a mooxikootti ntoko maluku oowuupuwelelano anamwane asilopwana a Yixrayeli, ntoko Yave aamulamulenlaawe Moisesi.

⁸Yaapaka yoowara ya vakakasani, muteko wa namaratta. Yaapaka ntoko mooxikootti: Nliinya nootteettheya nootthaviwa na maliinya a ncano, a kanka, ookankela ni ooxeera.

⁹Yaari yoolikanela ni miringo iya: isentimeetru* miloko miili ni piili, vamoha ni isentimeetru* miloko miili ni piilitho ni yoopindiwa veeli.

¹⁰Vahoolowaya yaatthukelelamo misera mixexe sa maluku oowaaraxa. Mmuserani woopacera aakhala rubi*, topaziyo* ni berilo*.

¹¹Mmuserani wanaaveeli yaspe*, safira* ni esmeralda*;

¹²mmuserani wanaararu yasinto*, agata* ni ametista*

¹³ni mmuserani wanaaxexe krisolito*, onikisi* ni yaspe*. Ootheene yaatthukeleliwe vakaaxani sikhaanene sa eyuuma yoorikaxa.

¹⁴Yaakhala maluku muloko ni meeli — nimoha wa khula nsina na anamwane asilopwana a Yixrayeli; khula nluku noolempwa ntoko onlempwaaya munnelani woottittelano, nikhalanaka nsina nimoha na khula epuumba.

¹⁵Yaapakela yoowara ya vakakasani onyooro wootthaveliwa ni eyuuma yoorikaxa yooreera, ntoko mikhoyi.

¹⁶Vano yaapaka ikaaxa piili sikhaanene sa eyuuma yoorikaxa ni annela eeli a eyuuma yoorikaxa, mwa yaawo yaatthukelenlaaya mmaloothoni meeli a yoowara ya vakakasani.

¹⁷Yaatthukelela onyooro miili wa eyuuma yoorikaxa mwaannelani eeli a mmaloothoni a yoowara ya vakakasani.

¹⁸Vano mipatta sikina sa onyooro saatthukeleliwa ni ikaaxa sikhaanene piili etthukelelaka hiiho sootheene mmakhatani mpatta wa ohoolo wa mooxikootti.

¹⁹Yaahaapaka annela eeli akina a eyuuma yoorikaxa, enaatthukelela mmaloothoni meeli makina a yoowara ya vakakasani mpuwa waaxoriwe, vakhiviru wa mooxikootti.

²⁰Vahoolowaya yaahaapakatho annela eeli akina a eyuuma yoorikaxa, enaatthukelela vathi wa sa mmakhatani, ohoolo wa mooxikootti, vakhiviru wa nttottho, ciireru vasulu laamba a mooxikootti.

²¹Yaahaatthukelela annela a yoowara ya vakakasani ni yaawo a mooxikootti ni muramba wa kanka okumanyihiweene ni laamba weera yoowara ya vakakasani ehiinaine vamooxikoottini. Yaapaka ntoko Yave aamulamulenlaawe Moisesi.

²²Yaattottha evestidu ya mooxikootti yootheene eyo ya nliinya na kanka, muteko wa namatthava.

²³Yaakhalano nlaka eriyari, ni mukhwipimwaya nlaka nno waapindeliwa ntoko ekolariinya weera ehaahuwe.

²⁴Yaattotthela irooma* sa nliinya nootteettheya nootthaviwa ni ekuwo ya kanka, yookankela ni yooxeera mooxoriwa wa evestidu.

²⁵Yaapakela ingilingili ikhaanene sa eyuuma yoorikaxa yooreera etthukelelaka mwaaxoriwe evaxaka ni irooma*.

²⁶Ingilingili ni irooma* saavaxana mooxoriwa moothemwene wa evestidu, sootheene saapakeliwe weera siwareliweke woorumeela, ntoko Yave aamulamulenlaawe Moisesi.

²⁷Yaamuttotthela Aharoni ni anamwanaawe asilopwana mikaandyo sa nliinya nootteettheya, soopakiwa ni namatthava.

²⁸Yaapakatho icireemba, sootthukano mmuru ni akaputtula a mpuwa ootthaviwa ni nliinya nootteettheya.

²⁹Laambatho aari a nliinya nootteettheya nootthaviwa ni ekuwo ya kanka, yookankela ni yooxeera, oopakiwa ni namaxora, ntoko Yave aamulamulenlaawe Moisesi.

³⁰Yaapaka ediyadema* ya eyuuma yoorikaxa, enalepamo ntoko namalepa onlepaawe munnelani woottittelano. Yaalepa ha: YOOTTEELIHERIWA YAVE.”

³¹Vahoolowaya yaatthukela yeeyo ni muramba wa kanka mpatta wa osulu wa ecireemba, ntoko Yave aamulamulenlaawe Moisesi.

³²Hiiho miteko sootheene sa etabernaakulu*, Eheema ya Muthukumano*, saamalihiwa. aYixrayeli yaapaka sootheene ntoko Yave aamulamulenlaawe Moisesi.

³³Vahoolowaya yaamuruuhela Moisesi etabernaakulu: Eheema ni ikarumasaya sootheene, ivarelelosaya, acikhaaya, mikoombasaya, amarimbwaaya ni nyettosaya,

³⁴yookhuneelano ya ixapala sa amaankhoro sooningiwa yooxeera, ni yookhuneelano ya ixapala soohukhiwa, eluttu yookuttelelano,

³⁵Arka* a Wiiraana ni ikoposaya, yookhuneelano,

³⁶meesa ni ikarumasaya sootheene, epaawu ya Okhala*,

³⁷onyaari wa eyuuma yoorikaxa yooreera ni misera sa soomwaleela vamoha ni ikarumasaya sootheene nitho makhura oomwaleelela,

³⁸altaari* a eyuuma yoorikaxa, makhura oottikitthelano, erubani* yoowunkhelaxa, eluttu ya mulako wa eheema,

³⁹altaari* a ebronze* ni nivalinaya, ikoposaya ni ikarumasaya sootheene, ebasiya ni mweettwaaya,

⁴⁰iluttu sa nipuwa ni amarimbwaaya ni nyettosaya, eluttu ya mulako wa nipuwa, mikhoyi ni mikuro sa eheema ya nipuwa, ikaruma sootheene sa etabernaakulu*, Eheema ya Muthukumano*,

⁴¹soowara soorumeelano vaNipuroni Nootteela* — soowara sootteela sa Aharoni, musaserdoti* mpaka sa anamwanaawe asilopwana yaarumeelaka ntoko asaserdoti*.

⁴²aYixrayeli yaapaka miteko sootheene ntoko Yave aamulamulenlaawe Moisesi.

⁴³Moisesi woowoona muteko, aahaattapahera weera soopakeya sootheene ntoko Yave aalamulenlaawe. Vano Moisesi aahaareeliha.