Read Makhuwa-Shirima Okhuma 5 Bible Online

Okhuma 5 - Makhuwa-Shirima bible

Okhuma 5

¹Vahoolowaya Moisesi ni Aharoni yaarowa wuuluma ni Farawu*, enamweerela: “Yave, Muluku a aYixrayeli eenre ha: ‘Ohiyeke mulokwaaka orowe wakipakele efesta munikareni.’”

²Farawu* aahaakhula: “Yave Owo taani weera miyo kimwiiwelele ni kaahiye aYixrayeli erowaka? Nkimusuwenle Yave ni nkirwa kaahiya aYixrayeli epwahaka.”

³Awosa yaanyesera: “Muluku a aHeberi aahoorwa okumana ni hiyo. Vano, munitthunihere weetta mukwaha wa mahuku mararu munikareni weera nampakele sooveleela Yave, Mulukwaahu. Naaheera hiiho, Owo onooniruuhela mahooxo hoye hoye ekatana.”

⁴Mwenetho a wExipitu aawaakhula: “Moisesi ni Aharoni, muncerewihelasani muloko mitekosaya? Muhokoleele omutekoni!”

⁵Farawu* aaheeratho: “Atthu ala ahaattaxa, vano nyuwosa nlelo mungweemexiha muteko!”

⁶Nihuku nenenenne Farawu* aahaalamulela anamahasula ni alipa oohoolela muteko wa aYixrayeli:

⁷“Okhuma vaanaano va muhaavahetho malaxi weera epake indyerwa ntoko mwaakhovelenlaanyu. Eroweke weera ethukumanyihe malaxaaya asineenaaya.

⁸Mene mwaanyesererihe weera epwaherere opaka indyerwa waattawene weiwe; ehivukule waattawaya. Ti anooreesi, ni tivawo ankhuwelaaya: ‘Munihiyeke nirowe nampakele sooveleela Mulukwaahu!’

⁹Mwaandyeerere oviha wa muteko wa angwera ala weera ekwanihere mitekosaya ehiiwelelaka soowootha!”

¹⁰Vano anamahasula ni alipa oohoolela muteko wa aYixrayeli yaarowa oleela muloko: “Farawu* eenre ha: ‘Nkirwa koovahaanitho malaxi.’

¹¹Murowe mwaanyule muneeraanyu mwaphwanye, mene mutekwaanyu khoorwa ovukuliwa.’”

¹²Hiiho atthu yaamwaramwareela mweelaponi yootheene ya wExipitu weera yaanyule ihalahala sa malaxi vanipuroni na malaxi ooreera.

¹³Anamahasula yaawooperera yeeraka: “Mukwaniheraseke muteko wa mahuku ootheene mwaanyesereriwaanyu mvahiweene malaxi.

¹⁴Ahooleli a aYixrayeli a muteko yaathanliwe ni anamahasula a Farawu* yannaawaxula ekohakohiwaka: “Muhikwaniherenle heeni osilo ni olelo waattawene weiwe wa indyerwa wa mahuku a khalayi?”

¹⁵Vano ahooleli a aYixrayeli a muteko yaarowa wiikhupanyera wa Farawu* emweerelaka: “Mungweerihelani hiiha arumeiyaanyu?

¹⁶Hiyo arumeiyaanyu khanimvahiwa malaxi. Hata hiiho noolamuleliwa: ‘Mpakeke indyerwa!’ Arumeiyaanyu aawaxuliwa, mene nthowa ti na mulokwaanyu xaxaxa.”

¹⁷Farawu* aawaakhula: “Anooreesi ti nyuwosa! Anooreesi! Tivawo muneeraanyu: ‘Munihiyeke niroweke nampakele sooveleela Yave.’

¹⁸Vano muhokoleelase omutekoni! Nyuwosa khamurwa mwaakhelatho malaxi. Mpwaherere okwanihera waatta wa indyerwa.”

¹⁹Farawu* aweerelakaru: “Nkimvukula waatta wa indyerwa saanyesereriwa khula nihuku,” ahooleli a aYixrayeli a muteko yaasuwela weera vano noovolowa mmahooxoni.

²⁰Vano evinyakaru wa Farawu*, yaamukumanano Moisesi ni Aharoni, mwa yaawo yeera yaawehereraka.

²¹Ahooleli ale yaaweerela: “Yave oowehawehaseni ni oothorihaseni! Nyuwosa moonitothela manyaanya wa Farawu* ni arumeiyaawe mwa hiyo. Mohaavaha nthowa nooniivela.”

²²Moisesi aamwaattamelatho Yave, anamweerela: “Ii! Apwiya! Muhasulenleni muloko ola? Vano mukirumenleni?

²³Okhuma ehuhu kirwiiyaaka wuuluma ni Farawu* mwa Nsinananyu, owo oohasula muloko ola ni Nyuwo khamvulunxeru mulokwaanyu.”