Read Makhuwa-Shirima Okhuma 7 Bible Online

Okhuma 7 - Makhuwa-Shirima bible

Okhuma 7

¹Vano Yave aamweerela Moisesi: “Kinimoovahani ikuru ohoolo wa Farawu* ni munninyu, Aharoni, anuulume ntoko eyanowaanyu.

²Nyuwo mmuulume sootheene kineeraaka koolamuleleni ni munninyu Aharoni anaamuleele Farawu* weera aatthunihere aYixrayeli okhuma mulaponi.

³Miyotho kinimuumiha murima wa Farawu* ni naari saandyeerereyaka ineneerosaka ni sootikhiniha wExipitu,

⁴owo kharwa awiiwaani. Vano, kinimwiikaathera Ntatanaka wExipitu ni kinimwaakhumiha anakhottwaaka, mulokwaaka, aYixrayeli ni owera miteko sa nthoriho.

⁵Ni awExipitu eniisuwele weera Miyo ti Yave kookolelaka moonowaaka wExipitu ni kaavenxakawo aYixrayeli.”

⁶Moisesi ni Aharoni yaapaka ntoko Yave aalamulenlaawe.

⁷Moisesi aarino iyaakha miloko mithannamiraru ni Aharoni miloko mithannamiraru ni tthaaru yuulumasaaya ni Farawu*.

⁸Yave aamweerela Moisesi ni Aharoni:

⁹“Farawu* oovekelani: ‘Mpake yootikhiniha,’ vano mwamweerele Aharoni: ‘Mukuxeke ekopwaanyu ni mvonyere ohoolo wa Farawu*.’ Ni eyo enoothatuwa enowa.”

¹⁰Moisesi ni Aharoni yaarowa wa Farawu*, enapaka yeeyo Yave aalamulenlaawe. Aharoni aavonyera ekopwaawe ohoolo wa Farawu* ni anamalakaawe, enathatuwa enowa.

¹¹Vano Farawu*tho aawiitthana anamiruku ni akhwiri ni anamacitta a wExipitu ni ale yaapaka etthweene yeeyo ni olowawaya woowiipithiheya.

¹²Khula mutthu a yaale aavonyera vathi ekopwaawe ni ikoposaya sootheene saathatuwa inowa. Ekopotho ya Aharoni yaamira inowasaya sootheene.

¹³Wa soothesene, Farawu* aahuumiha murima ni owo khaawiiwelelanse Moisesi ni Aharoni, ntoko Yave eenraawe.

¹⁴Yave aamweerela Moisesi: “Farawu* ohuumihiwa murima ni owo khantthunihera muloko wa aYixrayeli orowa.

¹⁵Omaalo, oxeexelo, muroweke wa Farawu*, owo aarowaka oluusi. Mwangweherere mukerekhere mooloko Nilu weera mwamukumaneno. Mukuxeketho ekopo yaathatungwe enowa.

¹⁶Mwamuleele: ‘Yave, Muluku a aHeberi ookiruma wooleelani: ‘Muhiyeke mulokwaaka orowaka weera wakilape munikareni.’ Mene mpaka vano khamukiiwale.

¹⁷Masu a Yave ti ala: ‘Mwa yeeyo mmwisuwele weera Miyo ti Yave: nkimanele maahi a Nilu ni ekopo eri mmatatanimwaka ni awo eniithatuwe ephome.

¹⁸Ihopa sa muNilu nsikhwe, mooloko oniwunkhe woovirula, ni awExipitu kheewera owura maahi ale.’”

¹⁹Vano, Yave aamweerelatho Moisesi: “Munlamulele Aharoni: ‘Mukuxe ekopwaanyu ni mookolele moonowaanyu mmaahini a wExiptu — mmanyoolokoni, mmipopeni, mmarattani ni mmapuroni moothemwene araayamo maahi weera ethatuwe ephome. Eniikhale ephome mweelaponi yootheene ya wExipitu — mpaka mmikubuni sa itthaabwa ni sa maluku.

²⁰Moisesi ni Aharoni yaapaka ntoko Yave aalamulenlaawe: Aharoni aakuxa ekopo anamanela maahi a muNilu Farawu* ni anamalakaawe yoonaka, ni maahi ale yaathatuwa ephome.

²¹Ihopa saahookhwa ni mooloko waanunkha woovirula moota wooweera awExipitu khayaawera owura maahi ale. Mweelaponi yootheene ya wExipitu yaakhala ephome.

²²Vaheera anamacitta a wExipitu yaapaka etthweene yeeyo ni olowawaya woowiipithiheya. Farawu* aahuumiha murima ni khaamwiiwelenle Moisesi ni Aharoni, ntoko Yave aahimalaawe.

²³Ohiyanawaya, aahaarerasa ettuli, anahokoleela owannyawe ahiphwatthaka itthusene seiye.

²⁴awExipitu ootheene yaathipa ihime mukerekhere wa Nilu weera ephwanye maahi ooreera hapo maahi a Nilu khayaawureya.

²⁵Yaavinre mahuku mathanameeli Yave amanneene maahi a Nilu.