Read Makhuwa-Shirima Yobi 13 Bible Online

Yobi 13 - Makhuwa-Shirima bible

Yobi 13

¹Maithwaaka ahoona sootheene iyo, maaruwaaka ahiiwa, eniiwexexa.

²Yeeyo musuwenlaanyu miyotho koosuwela; nkihiyono mukhaanaanyu.

³Vaheera kinghaawela wuuluma ni Muluku a ikuru sootheene, kaakihaka mulattwaaka ohoolo wa Muluku.

⁴Wa soothesene, nyuwosa munkiverula ni soowootha; ootheene nyuwo muri mameediku oohimuteko!

⁵Mwaasiye omaala paahi, mwaamoonihera miruku.

⁶Vano mwiiwe waakhuleleyawaka; ngwiriyane yeeyo kintthunaaka wuuluma.

⁷Nyuwosa munimuuluma soonanara mwa Nsina na Muluku? Munimuuluma moolokotthani mwa Yoowo?

⁸Munimoonihera nthalu mwa Yoowo? Munimwaakiha mulattu mwa Muluku?

⁹Waamookhalelani nnene Owo ooronghani onuulummwa milattu? Mwaangwera omulokottha ntoko onlokottheliwaawe mutthu?

¹⁰Woohihovela, Owo aamoohiihani mwakhalela onamoona ni nthalu wiiphiini.

¹¹Ovuwawawe khawaawoopihani? Ohoolowawe khaawootondolowihani?

¹²Mirukusanyu siri ntoko ettuura; wiixaakihawanyu ori ntoko oloko.

¹³Mmaale ni mukihiye kuulume ni vano ekeereele eniikeereele.

¹⁴Kiniihelela heeni ngwoopihani, kilevaka okumaaka?

¹⁵Naari Owo akiivaka, hata hiiho, kinooweherera mwa Yoowo; vekhaikhai kinimwaakiha iphirosaka ohoolowawe.

¹⁶Wu onookirongha wuutaphuwani, niwoko khawoworu mutakhali ongwera ophiya vamaithoniwawe.

¹⁷Vano mwiiwe nnenesene maswaaka; ngwiriyane yeeyo kinthalihaaka.

¹⁸Keenre kiirehererela mulattwaaka, koosuwela weera kinimwaakhuleliwa.

¹⁹Ookhala anaakoothere? Aakhanle, kinoomaala, kikhweeke.”

²⁰“Ii! Muluku, mukivahe paahi itthu piili iya, ni nkiwiipithani:

²¹Mususihere ottai wa miyo ntatananyu, ni muhikitutuxetho ni soowoopihasanyu.

²²Vano mukiitthane ni miyo kinimwaakhula, hoye hoye mukihiye kuulume, ni Nyuwo munimwaakhula.

²³Sootapanya ni soottheka ihai kipankaaka? Mukoonihere soohiyanyihasaka ni otthekawaka.

²⁴Munkirerelani ettuli munakoona okhala mwiittanaanyu?

²⁵Munimoopopiha nikukhu nimvavihiwa epheyo? Munoottharatthara makamba?

²⁶Vano, munookiwaawiherela, munapakiha weera kihalane soottheka sa emiravowaaka.

²⁷Muntthuka imettosaka munawehaweha iphirosaka sootheene, muhelelaka nyiinano malipaaka.

²⁸Okumaaka ompupuhuwa ntoko etthu yoowuntta, ntoko ekuwo enceyaaya ni oweexe.”