Read Makhuwa-Shirima Yobi 14 Bible Online

Yobi 14 - Makhuwa-Shirima bible

Yobi 14

¹“Mutthu oyariwe onkhala ehuhu vakhaani ni okumaawe woosareya mmakacamihoni.

²Onttuva ntoko ethutu, ananyaala. Onlakaseya ntoko erungu emvira; khanlekelaxa.

³Munoongwehexexa mutthu ntoko alasa? Munoomurongha wookhalawanyu onthoriheloni?

⁴Taani ongwera okhaliha etthu yootteeleene mwa yoohitteela? Khaawo!

⁵Mahuku a mutthu ari oowaalikeleyeene; Nyuwo moohima waatta wa nyeerisawe mukhalihaka nyiinano owo ohingweraawe otupha.

⁶Tivawo, munghuluwe ni munghiye mpaka aneeraawe akwanihere ehuhuwaawe ntoko namuteko onliviwa vamweerini.

⁷Naari mwiri wookhalano oweherera: Wuuhiwa, onoophuwatho, ni soophuwasaya khasinghaleela.

⁸Naari mikwankhwaarisaya suuluvalaka vathi ni nikottonaya nimoraka,

⁹hata hiiho, waanaanelaka, onoophuwa iphandi ntoko mwiri woophatteiwa.

¹⁰Vaheera mutthu onimookhwa ni ompwaherera ookhweene; onghihimera wookisera, acipheke.

¹¹Mooteene yoowo maahi a enyandya etokotoko angwelelaaya ni mooloko ongwelelaaya, onuuma,

¹²hiihotho mutthu oniixaatalelaawe, ahinavenya; mpaka erimu eneeraaya ehikhale, atthutho kheevenya, hata kheevenxiwa mookonani.

¹³Naari mano mwaakiipithihale mmahiyeni mukisungaka mpaka omala isarasanyu! Naari mano mwaakaalikelenle mahuku a okhalawaka, vahoolowaya mukuupuwelelaka!

¹⁴Mutthu akhwa, onookhalatho ni okumi? Mahukwaaka ootheene a soorumeelasaka kinoowehererela otapuxeyawaka.

¹⁵Munookiitthana ni kinoowaakhulani, munoohaawela woona ephattuwelo mpattunxaanyu.

¹⁶Vekhaikhai vano munimwaalikela malipaaka ootheene, mene khamunaalikelela sootthekasaka.

¹⁷Soohiyanyihasaka sinootthukiwa musaakhoni; Nyuwo munimwiipithiha yootakhalaaka.

¹⁸Vaheera mooteene yoowo mwaako onghaawaaya oceya, onamalamala, ni mwala onsusihiwaawe vanipuroniwawe,

¹⁹ni mooteene yoowo maahi anlalihaaya maluku, ni nyooloko sinkumburulaaya etthaya, hiihotho mumphwata oweherera wa mutthu.

²⁰Munoomphwata, analakaseya woomalela, munceendya ekhovaawe, munamoomola.

²¹Anamwanaawe yattittimihiwa hoye hoye yayevihiwa, owo khasuwelaru hata khoona.

²²Onoona ovoreya wa erutthwaawe paahi, iikhupanyeraka.”