Read Makhuwa-Shirima Yobi 16 Bible Online

Yobi 16 - Makhuwa-Shirima bible

Yobi 16

¹Vano Yobi aahaakhula:

²“Kohiiwa masu mancipale ntoko yaala. Nyuwosa ootheene ti anamapembesa oohikhavihera!

³Maswaanyu oohivareleya muteko kheemala? Vano eheeni enoopwahererihani nyuwo waakhulana?

⁴Nyuwo mwaakhanle vanipuroniwaka, miyo kaangwera wuuluma ntoko nyuwosa; kaangwera woothorihani ni masu ooreera koopukunyerakani muru.

⁵Vaheera, eyanowaaka yaamwaasaasa woolipiherani; opembesa wa iyanosaka waamookurunuxani.

⁶Wa soothesene, kuuluma, ovoreyawaka khoonkhurunuwa; kamaala, ovoreya iwo khoommalamala.

⁷Ii! Muluku, woohihovela, Nyuwo moomaliha ikurusaka; moophwata emusaaka yootheene.

⁸Nyuwo mookivara ni ehasaraaka yoothatuwa namoona; woondawaka onookitepela okikhalela onamoona.

⁹Musaranimwawe Muluku onkiwanana, anakinyaanya, akikhuurihelaka maino; amwiittanaaka aakixeerela maitho.

¹⁰Atthu anookaathamela, ankimana owiitho, ekitthebwaka, ekithukumanenleene.

¹¹Muluku ookimoroxela mmatatani mwa atakhali, aani ookinnyerera mmatatani mwa oonanara murima.

¹²Miyo kaari emaalelo, mene Owo ookiwaawihera; ookivara vaxiko, anakittikittha. Ookipaka yoolupaawe;

¹³ananyuupaawe aakirica. Ahimorelaka ikharari, Owo oohoma misosaka, anamuyeehera vathi wamwaaka.

¹⁴Oniivonyera wa miyo imaara imaarasene; akiwananaka ntoko nakhotto.

¹⁵Kohiittotthela yoowarela olalamika, kinattukutthera eyuucaaka vantthupini.

¹⁶Maitho aakixeera mwaha woowiinlaxa, ni ewiriphi yookisara,

¹⁷nroohikhalaru nipuhero mmatatanimwaka ni nivekelonaka nreene noottela.

¹⁸Ii! Etthaya, ohikhuneele ephomaaka! Okhuwelawaka ohikhaleno nipuro noowiitthuuwa!

¹⁹Hata vaanaano va Namoonaaka ori wiirimu; Namwaakihaaka ori musulu.

²⁰Maithoraaka yaamorelaka ohoolo wa Yave, nthamwenaaka onkitthebwa.

²¹Owo onaakiha mulattu wa mutthu ohoolo wa Muluku ntoko mukina onaakihaawe mulattu wa nthamwenaawe.

²²Vano sihanle iyaakha vakhaani kipwaheke mukwaha woohihokolowa.”