Read Makhuwa-Shirima Yobi 17 Bible Online

Yobi 17 - Makhuwa-Shirima bible

Yobi 17

¹“Munepaaka woomalamala, mahukwaaka aakwituleleya, nihiye nnookiweherera.

²Ettiitthu ti weera anamatthebwa ankirukureera ni ontthuneya oweha wiittawaya.

³Ii! Muluku, mukhaleke Olipiheriwawaka. Khaawo anaakilipihere muhikhanle Nyuwo.

⁴Moowala muupuwelowaaya weera ehiiwexexe; hiiho khamwaahiya ewinaka.

⁵Mutthu amukhootta nthamwenaawe eerelaka ntthuvelo, maitho a anamwanaawe anoorweeleya eevaasi.

⁶Vano Muluku ookitatuxa maxiripulo eriyari ya atthu, ntoko mutthu onsenyeliwa owiitho.

⁷Maithwaaka ankhulumuwa ni olalamika, erutthwaaka enlakaseya ntoko munttuusi.

⁸Ookwanela ankhala ootikhina ni yeeyo, ni oohinthowa oniixuungurumihela ni atakhali.

⁹Vaheera oororomeleya anookhala oolipeene mphironimwaya, ni atthu ootteela matata animunnuwa moowerani.

¹⁰Wa soothesene, murwaase ootheene nyuwo, ni mweereretho! Nkimphwanyaru musuweli eriyaraanyu.

¹¹Mahukwaaka aamala, soovaanelasaka soolakaseya, mpakatho soohaawela sa murimaaka.

¹²Awosa antthuna otatuxa ohiyu othana; yaattamelaka epiphi, aneera: ‘Onniwa waara.’

¹³Vano waari weera etthoko emoharu kingwehereraaka ti nihiye, kareherera wookonawaka mpiphini,

¹⁴keerela yoohitteela: ‘Nyuwo ti tiithaaka,’ ni wa nyuungu: ‘Nyuwosa ti amayaka’ hoye hoye ‘axirokoraka,’

¹⁵vano ori woowi owehererawaka? Taani anaawere woona yakhalaru yoowehereraaka?

¹⁶Oweherera iwo onuukhuruwele mmilakoni wa okhwa? Hiyo nnoovithiwanowo?”