Read Makhuwa-Shirima Yobi 19 Bible Online

Yobi 19 - Makhuwa-Shirima bible

Yobi 19

¹Vano Yobi aahaakhula:

²“Mpaka yaakhani nyuwosa mpwahereraka okihooxa ni okittikittha ni masu?

³Nyuwosa mookihiiha imaara muloko; mookikarawela ohiwuulihakani muru!

⁴Kaahapungweene ni ettiitthu, ohiyanyiha iwo ti wawaka.

⁵Nyuwo mohiivuwiha okipwaha miyo muvarelaka muteko oyevihiwawaka ntoko eneneero weera koottheka.

⁶Vaheera musuwele weera ti Muluku okeerihihale hiiha, akipharihaka mutthavinimwawe.

⁷Kakhuwela: “Nipuhero!,” nkinaakhuliwa; naari kivekelaka ekhavihero, khoowowo ororomeleya.

⁸Owo ookikuttelela ephiro, nkingwera ovira; onkihiya kaapapelaka mpiphini.

⁹Ookirula ottittimiheyawaka vamoha ni ecireembaakeene.

¹⁰Owo onkikurumula mipatta sootheene mpaka oriheya; omphela owehererawaka ntoko ompheleliwaaya mwiri.

¹¹Isarasawe sookipattela; owo onkoona ntoko mwiittanaawe.

¹²Anakhottwaawe anrwa mukuruni; anteka ekaaro yookurumulela exiri, enakikonelela mukhwipi wa eheemaaka.

¹³Owo ookirakameliha axunnaka, mpaka kaasuwelannaaka aakirakamela.

¹⁴Amusaaka aakihiya ni asinthamwenaaka aakittiwala.

¹⁵Alettwaaka ni arumeiyaaka asithiyana ankoona ntoko namarwa; aani ankoona ntoko oohisuwanyeya.

¹⁶Kaamwiitthanaka murumeiyaaka, khankaakhula, naari kimudyoonttelelaka muneenaaka.

¹⁷Amwaaraka anoona ohiira iphumusaka, ni axunnaka xaxaxa khaankitthuna.

¹⁸Mpaka amiravo ankitthebwa ni ankitheya kaarwaaka.

¹⁹Asinthamwenaaka xaxaxa ankithanya; yaale kinaasivelaaka aakirukunuwela.

²⁰Miyo kihanle makhuvaru, kihokolongwe mulittini.

²¹Ikharari asinthamwenaaka! Ikharari! Niwoko ntata na Muluku nookivulaliha.

²²Munkittharattharela heeni ntoko opakihalaawe Muluku? Khamumvonaru erutthwaaka?

²³Ii! Maswaaka yaalempwe woolempwa aani yaalempwe mukarattani,

²⁴yaalempwe ni eyuuma vanlukuni, hoye hoye yaakheriwe vamwala wa mahuku ootheene!

²⁵Miyo koosuwela weera Mvuluxaaka ti Mukumi, ni weera ommaleloni onoovenyera elapo.

²⁶Ephwatiweene erutthwaaka, hata hiiho kinoomoona Muluku.

²⁷Miyo kinoomoona ni maithwaaka; yoomeene, ahikhanle mukina! Ii! Moota onghaawelaaya murimaaka!

²⁸Nyuwosa mweera: ‘Moota nneeraahu nimutthare, neenre nthowa nikhala nawawe,’

²⁹vano fataari nyuwosa asineenaanyu moove ekatana, niwoko mwa yeeyo isara sinimoottaruxani. Ni vano munoosuwela weera nookhala nthorihelo.”