Read Makhuwa-Shirima Yobi 2 Bible Online

Yobi 2 - Makhuwa-Shirima bible

Yobi 2

¹Nihuku nikina andyelo yaahoorwa wa Yave, ni Satanatho aahoorwa ni yaawosa.

²Yave aamukoha Satana: “Munrweela woowi?” Satana aamwaakhula Yave: “Orukureera mulaponi, kiviraviraka mwemmo.”

³Vano Yave aamukoha Satana: “Moomoona murumeiyaaka Yobi? Khawoworu mulaponimu ntoko yoowo, oohihuluxeya, ookwanela ni mulopwana ommoova Muluku, asembaka opaka yootakhala. Naari nyuwo mukinyesererihaka omuhela nthala woohinthowa, owo ompwaherera ookwaneleene.”

⁴Satana aamweerela Yave: “Mutthu onoowera ovaha sootheene orinaawe mpaka erutthwaaweene, weera oopole okumaawe.

⁵Mutheteye ntatananyu ni mvulalihe erutthwaawe ni makhuveene — woohihovela owo onimoolaphani vamaithoniwanyu.”

⁶Yave aamweerela Satana: “Paahi, owo ori mmatatanimwanyu, mene muurelaru okumaawe.”

⁷Vano Satana aavenya vamaithoni wa Yave anampiluwiha Yobi itthuku soowoopiha, okhuma waannaawo mpaka mmuru.

⁸Yobi aakuxa nivali aniisunelano akilaathiyeene vattuurani.

⁹Vano amwaariye yaamweerela: “Nlelo nyuwo mumpwaherera mookwanelanimwanyu? Munlaphe Muluku ni mukhwe!”

¹⁰Yobi aamwaakhula: “Nyuwo munuuluma ntoko mulolo. Naakheleleke paahi yooreera nivahiwaahu ni Muluku, woohaakhelatho yoonanara?” Waarookhalaru hiiho, Yobi khuulumaru naari nsu nimoha noomveiha Muluku.

¹¹Asinthamwene araru a Yobi yaahiiwa suulummwaka sa ehasara yaamukhumelenle Yobi. Awosa yaari: Elifazi muTemani, Bildade muXuhi ni Zofari muNaamati. Khula mutthu aavenya owannyawe eniiwanana orowa ottheene omukhavihera Yobi ni ompembesa.

¹²Emoonaka ottai ottai, khayaamusuwelaru ni yaapacerasa omwiinlela ekhuwelaka. Khula mutthu a yaawosa aahaahula mukaadyowaawe, aniihela etthaya mmuru.

¹³Hiiho awosa yaapwaherera okilaathi puruvuru ni yoowo, ahikhalaka oomuulumano othana mithannamiili ni ohiyu mithannamiilitho, niwoko yoona weera ohaawawawe waatepaxa.