Read Makhuwa-Shirima Yobi 22 Bible Online

Yobi 22 - Makhuwa-Shirima bible

Yobi 22

¹Vano Elifazi muTemani, aahaakhula:

²“Weeraka mutthu oolipa naari musuweli onoowera omukhavihera Muluku?

³Yooreera heeni mweeraanyu mumvahe Muluku a ikuru sootheene mwaari oororomeleya? Eheeni eeraawe awine iphirosawe saari sookwanela?

⁴Weeraka Owo onoohiihani ni ongwootherani niwoko na nroromelonanyu?

⁵Yoonanaraanyu khayunnungwe? Sootthekasanyu khasimmala?

⁶Ohitthuneyaka nyuwo mwaanyesereriha nyeemexero sa axunninyu; nyuwo mwaahuhula soowara sa yaale yahaarinoru.

⁷Nyuwo khamwaamvaha maahi oovoliwa ntthona ni mwaakamela yooca ya oovoliwa etala,

⁸nyuwo mureene ooweraxa, muneene a ilapo ni mwemmo mukhalaka, muttittimihiwaka ohoolo wa ootheene.

⁹Nyuwo moowoomola, enarowa matataru asinaamukhweli, ni mohaalosoiha akwaasuni.

¹⁰Tivawo murukureeriwaanyu ni itapha ni woopiha wootutuxereya woovanraayani.

¹¹Tivawo epiphi yoosanraayani moota wooweera muhooneru, ni osara wa maahi anoomireihaayani.

¹²Muluku ori osuluxa wa erimu. Moone moota sikhanlaayawo ithenyeeri soorakamelaxa!

¹³Wa soothesene, nyuwo muneera: ‘Muluku osuwenleni?’ Onoowera othoriha mpiphini ntoko ela?

¹⁴Mahutte anoomukuttelela ni khangwera onoona hiyo, Owo eetteettaka musulusulu erimu.

¹⁵Muntthuna okuxera ephiro ya epiphi, mwa yeeyo yaaviraayamo atthu oonanara murima?

¹⁶Awosa yaakuxiwa ehinaaye ehuhuwaaya; mathipelowaaya aakumburuliwa ni mirupi.

¹⁷Awosa ammweerela Muluku: ‘Munihiye mmuretteleni! Anaanipake eheeni Muluku a ikuru sootheene?

¹⁸Wa soothesene, ti Yoowo aasaringhe mihakhu impasaya; tivawo kinkhalaaka ottaiwene wa ikano sa atakhali.

¹⁹Oororomeleya anoona oheleyawaya nthala, ni antthapa; oohinthowa anaatthebwa, yeeraka:

²⁰‘Vekhaikhai amwiittanaahu aaphwatiwa, ni mooro woolaliha mihakhusaya.’

²¹Munkhalele Muluku, mukhale mmuretteleni ni Yoowo, vahoolowaya sinooweettelani nnene.

²²Mwaakhulele oxuttiha onrweela mmwaanomwawe, ni muthokorore maswaawe vamurimani.

²³Nyuwo mwamuhokoleela Muluku a ikuru sootheene, munoorehereriwatho. Mwasusa ohiroromeleya vaheemaniwanyu,

²⁴ni mwarihela vantthupini eyuuma yoorika, eyuumaanyu yoorikaxa ya wOfiri, vanyala sa mureyareyani,

²⁵vano Muluku a ikuru sootheene, onookhala eyuumaanyu yoorikaxa, onimookhalelani eparatha* yoowaattaxa.

²⁶Hiiho, munoomuhakalalela Muluku ni munoottukhulela ekhove wa Muluku.

²⁷Munoomvekela Yoowo ni Owo onoowiiwani, ni munookwanihera soolipelasanyu.

²⁸Yeeyo muneeraanyu mulakele enimweereya ni waara onoomwaleela mphironimwanyu.

²⁹Asilopwana yaayevihiwaka ni mweera: ‘Ngweemexe,’ Muluku onimwaakhavihera yaawosa.

³⁰Owo onimwaatapuxa mpakatho yaawo arino nthowa; aani anootapuxiwa niwoko na matataanyu ootteela.”