Read Makhuwa-Shirima Yobi 27 Bible Online

Yobi 27 - Makhuwa-Shirima bible

Yobi 27

¹Yobi aapwaherera ni maswaawe:

²“Mwa Muluku Mukumi ohitthunne okipakela ekhaikhai, mwa Muluku a ikuru sootheene othananinghe okumaaka —

³nlelo kireene ni okumi ni ngwiya wa Muluku oreene mphulanimwaka —

⁴iyanosaka khasuulumaru yoonanara, ni nluminaka khanuulumaru yakhalaru yoowootha.

⁵Nkirwa kiwaakhulelani nyuwosa! Mpaka okhwawaka nkirwa kikhoottatho okwanelawaka.

⁶Kinoopwaherera ngwookoleleyanimwaka ni nkirwa kihiya wookoleleya wu; kireene nlelo ni okumi muupuwelowaaka khookihiiha.

⁷Amwiittanaaka ekhale ntoko atakhali, ni awananaaka ntoko oohiroromeleya!

⁸Mutakhali anaakhaleno ni oweherera heeni Muluku aammalamalihaka, aamwiivaka?

⁹Weeraka Muluku onimwiiwa okhuwelawawe mutakhali yaamurweelaka makacamiho?

¹⁰Owo onoomuhakalalela Muluku a ikuru sootheene? Khula ehuhu, anaamwiitthane Muluku?

¹¹Miyo nkooxuttihaseni sa owera wa Muluku; nkiwiipithihasani iphiro sa Muluku a ikuru sootheene.

¹²Vano, ettiitthu ti weera ootheene nyuwo mohoona yeeyo. Vanonto muntthekulelani hiiho vasiiyoniwene?

¹³Ommaleloni ovahiwaawe mutakhali, yoohiyeriwa onaakhelaawe oonanara murima wa Muluku a ikuru sootheene ti wu:

¹⁴Naari atakhali ekhalanaka anamwane, ommaleloniwayasa ti wiiviwa ni ekatana; awosa kheekhalanotho yooca yoowaatta.

¹⁵Ikwerere sinoowiiva yaawo eniyaahalahalele, ni asinaamukhwelaaya kheewiinlelasa.

¹⁶Naari owo athukumanyaka eparatha* ntoko ntthupi ni uukelaka soowara ntoko naapapattheene,

¹⁷yeeyo owo aneeraawe athokorore eniikhale ya oororomeleya, ni oohinthowa anookawana eparathaawe*.

¹⁸Empa owo otenkaawe eri ntoko epuuru ya nikuruthu, aani ntoko mukottha wootekiwa ni namalipelela.

¹⁹Oniixaatalela oopuheene, mene khakhalatho namapuha! Aakhunulaka maitho, omphwanya sootheene sihiwowo.

²⁰Onimurweela otteenguwa ntoko mirupi; ohiyu ettheku enimukuxakuxa.

²¹Epheyo ya mpatta ninkhuma nsuwa enimukuxakuxa ni owo onlakaseya; enimphela vanipuroniwawe.

²²Enimukakha woohimmorela ikharari owo atthawaka moohiwehererani.

²³Emmwiipela makuphi, ni yaamwiipelaka muturi, emmoomola vanipuroniwawe.”