Read Makhuwa-Shirima Yobi 28 Bible Online

Yobi 28 - Makhuwa-Shirima bible

Yobi 28

¹Nookhala nipuro nimphwanyiwa eparatha* ni mapuro enrehereriwaayawo eyuuma yoorikaxa.

²Eyuuma enthimpwa vathi, ni ebronze* entotoxiwa vayuumani.

³Mutthu ommaliha epiphi, anarowa waasaasatho iyuuma mmapuroni oowiipithiheyaxa, aani makhuku a mmunttuusini wooriipihanaxa.

⁴Owo onthipa ehime ottai wa moomakiwa, vanipuroni noottiwaliwa ahimviraayamo atthu; owo oniitthukelelawo ottai wa ootheene, anakhala kuleele.

⁵Etthaya, mwa weiwo enkhumaayawo yooca, ti empittikuxiwaayawo ntoko yaari mmooroni;

⁶mmwalamwaya ankhumelela maluku a safira*, ni ntthupinaya nookhalano eyuuma yoorikaxa.

⁷Khawoworu mwaapalame a wiirimu osuwenle ephiro yoowiipithiheya eyo hata khawoworu xaaka oonne yeeyo.

⁸Mwene a axinama khananyikaleworu; mwatto khanavirewo.

⁹Matata a atthu ampwexa mwala woolipa ni amphela mikwankhwaari sa nyaako.

¹⁰Ampaka iphiro vathivathi ni maithwaaya anoona mihakhu sootheene sa mwemmo.

¹¹Awosa anaamwamwanyula anaattuuttu a nyooloko ni anruuha ngwaarani itthu soowiipithiheya.

¹²Wa soothesene, nsiphwanyiwe woowi miruku? Wiiwexexa omanke woowi?

¹³Mutthu khaniiwexexa otthuneya wa miruku; iyo khasimphwanyaneya mulaponi mwa akumi.

¹⁴Moowiixera oneera: “Khasikhanle mwa miyo;” ephareiya eneera: “Khasikhanle mwa miyo.”

¹⁵Khasinthumeya, hata ni eyuuma yoorikaxa yooreerela, naari mutteengwaaya khoomphimeya ni eparatha*.

¹⁶Khasinthumeya hata ni eyuuma yoorikaxa ya wOfiri, naari ni onikisi* ootthuneyaxa hata ni maluku a safira*.

¹⁷Eyuuma yoorikaxa ni ekristalo* khasinlikanxereya ni yeeyo, ni ti woohiwereya waakakhanyiha ni maluku oowaaraxa a eyuuma yoorikaxa.

¹⁸Maluku a korali* ni yaspe* khasinghimeyaru; miruku ti sootthuneyaxa opwaha erubi*.

¹⁹Etopaziyo* ya oKuxe kheenlikanxereya ni seiyo; miruku khasinthumeya hata ni eyuuma yoorikaxa!

²⁰Vano, singweela woowi miruku? Wiiwexexa onkhala woowi?

²¹Ti soowiipithihiwa ottaiwene wa akumi ootheene, hata ipalame sa wiirimu sihingweraaya woonelela.

²²Ophwatiwa ni Okhwa oneera: “Nnimwaasa wiiwa suulummwaka sa seiyo;”

²³ti Muluku paahi osuwenle ephiro enrowawo; weiwo sinkhalaayawo miruku,

²⁴niwoko Owo ongweha ekotenlaayawo, anoona sootheene sa mulaponi.

²⁵Owo akhalingheene ikuru sa epheyo ni aphimmeene ni muringo wookwanela wa maahi;

²⁶Owo alamulenleene epula ni ephiro wa ettheku yookukutteya,

²⁷ehuhuweene yeeyo, Owo aahoona miruku anaweha; aahaakhulela, anoota murima.

²⁸Vano aamweerela mutthu: “Miruku ti omoova Yave, ni osemba yoonanara ti okhalano wiiwexexa.”