Read Makhuwa-Shirima Yobi 29 Bible Online

Yobi 29 - Makhuwa-Shirima bible

Yobi 29

¹Yobi aapwaherera wuulumawawe:

²“Moota kunkheliwaaka nyeeri sivinre, mmahukuni aakikosoopaawe Muluku,

³aamwaleelaawe ni yoomwaleelaawe mmurumwaka, ni miyo kaangwera weetta mpiphini ngwaaraniwawe!

⁴Moota kunkheliwaaka mmahukuni a emiravowaaka, onthamwene wooreeraxa wa Muluku waareelihaaya empaaka,

⁵Muluku a ikuru sootheene aaraawe ni miyo ni anamwanaaka yaaraaya mukhwipimwaka,

⁶inaawosaka saarapihiwaaya ni mukaka ni nyooloko sa makhura saapiluwaaya mmwalani.

⁷Kaarowaaka vamulako wa esidade kikilaathiki mmapuwani oowaatteliwa a musidade,

⁸amiravo yaakoona, enakihapuwa, ni mamookwaaxa yaamweemela;

⁹ahooleli khayuuluma, ni yaaphuta iyano;

¹⁰maneethi yuuluma vathi vathi, ni malumaaya yaatthukana waahottokoroko.

¹¹Ootheene yaakiiwa yuuluma nnenesene sa miyo, ni yoowo aakoona aamukittapahera,

¹²niwoko miyo kaamukhavihera namahaawa aavekela ekhavihero, ni mukwaasuni ahaakhalanne oomukhavihera.

¹³Yoowo aahanle vakhaani okhwa aakireeliha, ni miyo kaahakalaliha murima wa naamukhweli.

¹⁴Wookoleleya waari yoowaraaka, ni ekhaikhai yaaphwaneliha erutthu ni muruwaaka.

¹⁵Miyo kaari maitho wa oohoona ni inaawo wa ootuthunya.

¹⁶Miyo kaari tiithi wa oothoiwa, ni kaapwatthela omwaakiha namarwa.

¹⁷Miyo kaapwexa mirondye sa atakhali weera yoovaraaya yoopowe mmwaanomwaya.

¹⁸Miyo kuupuwela: ‘Nkikhwele owaani, ni mahukwaka animwaattaxa ntoko muhaava.

¹⁹Mikwankhwaarisaka sinoophiya omaahini, ni ohiyu nikame nnimwiimela mphandinimwaka.

²⁰Khula imaara onookihokoleela ovuwa, ni kinoovarelatho muura munyowani.’

²¹Atthu yannakiwiriyana nnenesene, ewehereraka emaalelo olakawaka.

²²Kuulumaleene, awosa khayaahima etthu; maswaaka yannaavolowa nnenesene mmaarunimwaya.

²³Yaaweherera maswaaka ntoko engwehereriwaaya epula, ni yaawura maswaaka ntoko yoole ongwura epula mutthulo.

²⁴Kaatheyaaka, khayaakhulelaru; waara wa ekhovaaka waamwaareerela.

²⁵Ti miyo kaathanlela ephiro, ni kaakilaathi ntoko muhoolelaaya; kaakhala ntoko mwene eriyari ya anakhottwaawe. Kaari ntoko namapembesa a yaale aniinla.