Read Makhuwa-Shirima Yobi 3 Bible Online

Yobi 3 - Makhuwa-Shirima bible

Yobi 3

¹Vahoolowaya, Yobi aahula eyano, analapha nihuku na oyariwawawe,

³“Nilakaseye nihuku na oyariwawaka ni ohiyu weeriwaaya: ‘Ooyariwa mwaana mulopwana!’

⁴Nihuku nne nithatuwe epiphi; Muluku wiirimu iwo ahipwatthele; nihimwaleeleye.

⁵Epiphi yooriipihana esareele nenno; nihuruweleye ni nihutte nooriipihanaxa; epiphi yoopopihe nne.

⁶Ohiyu ole, epiphi etokotoko evarexexe! Ohaalikeleliwe eriyari ya mahuku a eyaakha, hata ohikhaleleno mpatta wa mahuku a wakhalaru mweeri.

⁷Ohiyu ole okhale weekupa, mwa yoole ohiiwanyeye okhuweliwa wa ohakalala.

⁸Elaphe nihuku nne yaawo anlapha mahuku ni angwera omvenxa Levitiyani*.

⁹Ithenyeerisaya sa oxeexelo sihaare, oweherere siiyo waara wa oxa ni ohiwere woona ekamaama ya oxa,

¹⁰niwoko nne khanaawanle kaakhumelaakawo mmirimani mwa amaayi weera nikisembihe woona soonanara.

¹¹Kahaavirelaaka weiwo, kinayariwa ookhweene?

¹²Yaakhalelani makutha weera ekaakhelele, ni mapele weera ekaamwihe?

¹³Hiiho, kaangwera wiixaatalela mmuretteleni ni ophwanya wiitthuuwa

¹⁴vamoha ni mamwene nitho anamalaka a mulaponi, yiitekenle mapuro oowiitthuuwa, vano eheleiyeene nthala,

¹⁵vamoha ni alamuli yaarino eyuuma yoorikaxa, yaasaringhe mpaanimwaya iparatha.

¹⁶Kahaariheliwani ntoko mwaana ooweera otatheya, aani ntoko mwaana ohoonneru nsuwa

¹⁷Mmo, atakhali khaanramarama, ni ookhulumuwa ampwaherera ngwiitthuuwani.

¹⁸Anamatthukiwatho ankhala ngwiitthuuwani, khaaniiwatho okhuwela wa anamakhaliha opottha.

¹⁹Atthu piswa ni aweri ari weiwo, ni epottha eri yootapuxeyeene wa pwiiyaaya.

²⁰Onaareliheriwani mutthu oohaawa; okumi wa oothanana;

²¹yaawosa anghaawela okhwa ehiphwanyaka, ni anaasaasaxa okhwa opwaha muhakhu woovitheya;

²²yaawosa anghakalala ni antthapa yaarowaka woovithiwani?

²³Omvaheriwani okumi yoole yiipithiheiye ephirowaawe, ni wa yoole Muluku ohimmooniheraawe makhumelo?

²⁴Vano, ohiya yooca, onkirweela ohihimera; wiipulelawaka onsareya ntoko maahi.

²⁵Yookirweela koovaaka; yaakoopopiha, yookeereela.

²⁶Nkinono murettele, hata mmaaleleyo, naari wiitthuuwa; kiri ootthukuruwa paahi.”