Read Makhuwa-Shirima Yobi 31 Bible Online

Yobi 31 - Makhuwa-Shirima bible

Yobi 31

¹Kohiiwananano maithwaaka ohaaweha kaahaawelaka asimwali.

²Vano, ettima heeni onaakhelaawe mutthu wa Muluku Musulu, yoohiyera heeni ya Muluku a ikuru sootheene onkhala musulusulu?

³Ti oheleya nthala wa atakhali, erisa wa yaawo ampaka yoonanara.

⁴Owo onnoona iphirosaka, anoonelamo khula malipaaka.

⁵Keentte ni ololo, hoye hoye inaawosaka saakuveiyeene olokottha —

⁶Muluku akiphime munringoni woororomeleya ni Owo onoosuwela weera nkinono nthowa —

⁷malipaaka yaahapungweene, murimaaka weettihingweene ni maithwaaka, hoye hoye matataaka yaavalihingweene,

⁸vano atthu akina ece yeeyo kaanlaaka, ni seiyo kiphatteiyaaka sipheliwe woomalela.

⁹Murimaaka waakuxeiyeene ni muthiyana mukina, hoye hoye kaathurumenleene mulako wa mukhwaaka,

¹⁰vano mwaaraka axile etrigu ya mulopwana mukina ni asilopwana akina emukoneno yoowo.

¹¹Vano, kaapanke, kaamuulihiheya muru, aani yoottheka yoophwanela othoriheliwa.

¹²Eyo ti mooro onghisa mpaka ophwatiwa ni yaamulaliha soohephasaka sootheene.

¹³Kaakhoottiyeene waapakela ekhaikhai arumeiyaaka alopwana ni athiyana awosa yiittaandawulenlaaya wa miyo,

¹⁴nkipakeni miyo Muluku aakithorihaka? Nkaakhuleni kaakohakohiwaka?

¹⁵Yoowo okipattunxe miyo, ohaapattuxatho yaawosa: Muluku mmoharu ti onipattunxe hiyo mmirimani mwa asimayihu.

¹⁶Nkaakhoontteru yoovekela ya oohaawa, hoye hoye nkaamuhiyale naamukhweli aasaka wiinla.

¹⁷Nkaaciiye meekhaaka yoocaaka, kihaavahaka akwaasuni.

¹⁸Okhuma emiravowaaka kohaahuwa akwaasuni ntoko tiithi, ni okhuma enamwanaaya ti miyo kaahoolela asinaamukhweli.

¹⁹Imaara sootheene kaamoonaaka mukina ahaawaka ni osiwa, hoye hoye athoiwaka yoowiikhuneela,

²⁰owo aamukireeliha niwoko na omvaha yoowiikhuneela ya nttukuttha yoopakiwa ni mapururu a muhuwaaka.

²¹Kaapanke itthu iyo hoye hoye kaamvirikanyihenleene mukwaasuni, kisuwelaka weera aphuki ari a mpattaaka,

²²vano moonowaaka okivasuwe, ni winteye okumannaayawo.

²³Vano miyo koova ophwatiwa ni Muluku, ni koovaka waarawawe, nkaawera opaka itthu iyo.

²⁴Nkaaroromenle eyuuma yoorikaxa naari nkoonenlemo okhala yoolipaaka eyuuma yoorikaxa yooreerelaxa.

²⁵Nkiikuxerenreno mihakhusaka, sooreela sootheene seiyo matataaka yaawinnaaya.

²⁶Nkaakokhorenle nsuwa ngwaaraniwaya naari mweeri ngweettanimwaya otokweene,

²⁷moota wooweera murimaaka waatannyereya muxiirini, kaarumihelaaka ebeecu ni ntata.

²⁸Vano iyotho saamukhala soottheka simphwanela othoriheliwa, niwoko kaamunkhootta Muluku ori osulusulu.

²⁹Nkihakalalenle erisa ya mwiittanaaka, naari milattu aarinaawe.

³⁰Hoye! Miyo nkaahingyeru eyanowaaka etthekaka niwoko na omulapha mukina.

³¹Yaawo ankhala vaatewaka khaatonke weera: ‘Khanaakhela ni Yobi enama.’

³²Khawoworu namarwa aakona munseweni, niwoko mulakwaaka waari ehuleliwo eereliwaka namavira.

³³Nkiipithihaleru yootthekaaka, ntoko ampakaaya akina, kikuttelelaka vamurimani nthowanaka.

³⁴Nkimoovaru nakupa hoye hoye onyoosa wa amusi moota wooweera kaahiimaaliha, kihirowaka onuulummwa milattu.

³⁵Ii! Mukina aakiiwale! Vano kinttitta wiixaakihawaka. Muluku a ikuru sootheene akaakhule; Namootheraaka akihimahime mukarattani.

³⁶Vekhaikhai miyo kaamukuxa yeeyo veetthuuri ni kaangwara ntoko ecireemba.

³⁷Miyo kaamunleela sa weettawaka wootheene; kaammwaattamela ntoko mwaana mulopwana a mwene.

³⁸Etthayaaka yakoothera ni mikhutu sootheene siinla,

³⁹kaaciiyeene itthusaya woohilivaru hoye hoye kaawiivaleene amakaaya,

⁴⁰vano sikikhumelele nyiiwa vanipuroni na etrigu ni nakhwali, ohiya esevada*.” Mpaka va masu a Yobi.