Read Makhuwa-Shirima Yobi 33 Bible Online

Yobi 33 - Makhuwa-Shirima bible

Yobi 33

¹“Vaheera vano Yobi, ngwiriyane maswaaka; mwiiwe nnenesene sootheene kineeraaka kihime.

²Kihanle vakhaani ohula eyano; maswaaka ari oolikaneene wuuluma.

³Maswaaka ankhumelela vamurimani wookwanela; iyanosaka sinuuluma ekhaikhai ya seiyo kisuwenlaaka.

⁴Munepa wa Muluku wookipaka; iphumu sa Muluku a ikuru sootheene sookivaha okumi.

⁵Vano mwawera, mukaakhule; mwiireherere weera mwiixaakihe.

⁶Vamaithoni wa Muluku miyo kinlikana ni nyuwo; miyotho kipakiwe ni oloko.

⁷Tivawo, khoontthuneya okoova, hata nkiwuumelaxani murima.

⁸Vaheera nyuwo muuluma kiiwaka; kohiiwa nnenesene masu ale:

⁹‘Kootteela, kihikhalanaka yoottheka; nkinono nthowa naari nkipankeru yootakhala.

¹⁰Wa soothesene, Muluku oophwanya soomutapanyasaka; Owo onkoona okhala mwiittanaawe.

¹¹Owo ontthuka inaawosaka ni onyooro; ongwehaweha mukhivirumwene iphirosaka.

¹²Vaheera miyo kinooleelani weera nyuwo mootapanya, niwoko Muluku ti Mutokweene ompwaha mutthu.

¹³Heeni nyuwo munimukhupanyaanyu Yoowo mweeraka khanaakhula masu a atthu?

¹⁴Vano ettiitthu ti weera Muluku onuuluma ni moota woohiyanahiyana, naari mutthu ahisuwelaka.

¹⁵Moolohani hoye hoye mmooneloni mweehuhuni ya ohiyu, atthu saattokoneenleene ikhove ni awosa ekonasaka vabeettiniwaya,

¹⁶Owo onoowera wuuluma owaaruwaya awoopopihaka ni soowooperera,

¹⁷weera mutthu asembe miteko soonanara ni Owo amutapuxe ngwiixoonani,

¹⁸nitho uurele okumaawe munlittini ni ahiiviwe ni ekatana.

¹⁹Hoye hoye ongwereya weera mutthu onttaruxiwa vabeettini wa ovoreiwa woohihiyerereya mmakhuvanimwawe

²⁰moota wooweera okhalawawe xaxaxa simmweettiha murima sooca hata sireene sooca soosivaxa.

²¹Vano ohoondaxa, ni makhuvaawe yaari oohooneya vano ari wusa.

²²Muneepaawe onaattamela nlitti, ni okumaawe onaakhuveela anamitthenga a wiiva.

²³Wa soothesene, akhala ndyelo mukhwipimwawe, namwiiraanyiha eriyari ya atthu macira muloko weera amuleele mutthu yeeyo eri yoowookoleleya wa yoowo,

²⁴ni Muluku amoonihera murima wooreera amweerelaka: ‘Mmuurele okhuruwela mulittini, niwoko koophwanya moota woomoopola,’

²⁵vano erutthwaawe enoohokoloxereya ekhalaka ntoko ya mwaana; owo onookhala mmiravoweene.

²⁶Owo onimvekela Muluku, ni onimwaakhuleliwa ni Yoowo; onoona ekhove ya Muluku, anakhuwela ni ohakalala, ni Muluku onoomuhokoloxera okhalawawe woororomeleya.

²⁷Vahoolowaya owo onrowa wa atthu, aneera: ‘Koottheka, kinapiritula yeeyo yaari yoowookoleleya, mene Owo khakivanghe yeeyo kaaphwanelaaka.

²⁸Owo ohoopola munepaaka ooceelihaka okhuruwela mulittini, ni vano okumaaka onoona waara.

²⁹Sootheene iyo Muluku onaapakela atthu imaara imaarasene,

³⁰weera aavenxe okumaaya ngwiixerani ni apakihe weera yoonetho waara.

³¹Yobi, mwiiwe ni mukiwiriyane; mmaale, ni nkuulume.

³²Mwaarino yoohima, mukaakhuleke; muulumeke niwoko kintthuna weera nyuwo mukhale oowookoleleya.

³³Mwaahikhalanne yoohima, mukiiwe ni mmaaleke, ni miyo kinimooxuttihani miruku.”