Read Makhuwa-Shirima Yobi 35 Bible Online

Yobi 35 - Makhuwa-Shirima bible

Yobi 35

¹Elihu aapwaherera wuuluma:

²“Nyuwo munuupuwela weera eyo ti yoororomeleya? Vano nyuwo muneera: ‘Miyo kinimwaakhuleliwa ni Muluku.’

³Wa soothesene, nyuwo munimukoha: ‘Mphurelo heeni kirinaaka, ni kaahittheka kingwinani?

⁴Kintthuna owaakhulani nyuwo ni asinthamwenaanyu ari ni nyuwo.’

⁵Ngwehe wiirimu ni moone; moone moota mahutte arakamenlaaya osuluwanyu.

⁶Mwattheka, kheewoworu yoonanara munimpakelaanyu Muluku; mwaandyeerera sootakhalasanyu, khamunimukacamiharu Yoowo.

⁷Nyuwo mwaroromeleya, khamunimpuhiha Yoowo, niwoko kheewo mungweraanyu omvaha.

⁸Otakhalawanyu onaavolowa atthu anlikana nyuwo paahi, ni ororomeleyawanyu onaavolowa paahi anamwane a atthu.

⁹Atthu aniikhupanyera elemeliweene ni mahooxo; andyoonttelela weera yaatapuxe mmatatani mwa aweri.

¹⁰Vaheera, khawowo onkoha: ‘Ori woowi Muluku Mpattuxaaka, mwa Yoowo omvaha icipo moohiyuni

¹¹ni onnixuttihaxa hiyo waapwaha axinama a mulaponi ni onnikhaliha asuwelixa opwaha ipalame sa wiirimu?’

¹²Yaakhuwelaka, Owo khanaakhula niwoko na wiixoona wa atakhali.

¹³Muluku khampwattha wiidyoonttelela woohimuteko ampakaaya; Muluku a ikuru sootheene khanaawiriyana.

¹⁴Owo khoowiriyananitho nyuwo mweeraka weera khamummoona ni weera mulattwaanyu ori ohoolowawe, nyuwo mungwehereraka Yoowo.

¹⁵Ohiya toko yeeyo, nyuwo muneera weera isarasawe khasinttaruxa ni Owo khampwattharu sootakhala.

¹⁶Ti hiiho Yobi onghulaawe eyanowaawe weera ahime masu oohimuteko; ahisuwelaka etthu owo onaandyeera masu.”