Read Makhuwa-Shirima Yobi 37 Bible Online

Yobi 37 - Makhuwa-Shirima bible

Yobi 37

¹“Kuupuwelaka yeeyo onnakivavaxa murima, otuphatuphaka vanipuroniwaya.

²Mwiiwe! Ngwiriyane oruma wa nsunawe, ni okukutteya wa eyanowaawe.

³Owo ootaphula overinyawawe vathi wa erimu yootheene, anarumihela elapo yootheene.

⁴Vahoolowaya onrwa orumaxawawe otokotoko: Owo onkukutteya ni nsunawe ntokweene. Nsunawe naarumaka, khanghiiha etari.

⁵Nsu na Muluku ninkukutteya moota wootikhiniheya; Owo ompaka itthu sitokotoko nihingweraahu wiiwexexa.

⁶Owo oneerela etthapwe: ‘Mmorele vathi,’ ni epula: ‘Mukhale mirupi.’

⁷Muluku oneemexera muteko wa khula mutthu weera ootheene Owo aapattunxaawe esuwele mitekosawe.

⁸Axinama antthawela aniipithaayamo, enakhalasa munyattanimwaya.

⁹Ettheku enkhuma enuukaanaayawo, ni oriira onrweela mpheyoni etokotoko.

¹⁰Iphumu sa Muluku sinoopaaniha maahi, ni maahi mancipale annoopaana.

¹¹Owo onsariha maahi mmahutteni, ni ommwareela overinya eriyaraaya.

¹²Owo ompakiha weera eyo erukureere vasulu wa etthaya yootheene epakaka sootheene Owo aneeraawe alamulele.

¹³Muluku onruuha mahutte — vakina waattaruxa atthu — vakinatho ohelela etthayaawe ni owoonihera osivelawawe.

¹⁴Yobi, ngwiriyane nnenesene yeeyo; mweemele ni mutthokelele sootikhiniha sa Muluku.

¹⁵Weeraka nyuwo moosuwela moota Muluku onlamulelaawe mahutte ni omverinyihaawe?

¹⁶Nyuwo moosuwela moota mahutte amvavaaya — sootikhiniha iyo sa Yoole orino mwiiwexexo wookwanela?

¹⁷Nyuwo munxupeya ni oviha, ehoopaka epheyo ya mpatta wa ohitto,

¹⁸munoowera omukhavihera okunga irimu soolipaxa ntoko eloola ya ebronze*?

¹⁹Munileele yeeyo entthuneya omuleela Yoowo, khaningwera oreherera yoowiixaakiherano niwoko na epiphaahu.

²⁰Onootthuneya omuleela weera kintthuna wuuluma? Khaawo eera avekele weera amiriwe.

²¹Khaawo angwera oweha otutha wa nsuwa wiirimu, epheyo emwaranxeene mahutte.

²²Mpatta wa ottuttuwani Owo ongweela ngwaarani mwa ekoore ya eyuuma yoorikaxa; Muluku ongwa moovuwani otokotoko.

²³Mukuku a ikuru sootheene ori weiwo nihingweraahuwo omoona, avuwaka moowerani; vaheera, moororomeleyanimwawe ni ngwookoleleyanimwawe, khaawo onimuhooxaawe.

²⁴Tivawo atthu animuttittimihaaya, niwoko Owo khangweha ekhove ya yaale aniixeerela asuweli.”