Read Makhuwa-Shirima Yobi 4 Bible Online

Yobi 4 - Makhuwa-Shirima bible

Yobi 4

¹Vano Elifazi muTemani, aahaakhula:

²“Mukina atthuna wooleelani masu, nyuwo munoomwiiwa? Mene taani anaawere ohuuluma?

³Muupuwele nnenesene! Nyuwo mohaaxuttiha ancipale; moolipihera matata oolosowa.

⁴Maswaanyu yaalipihera yaawo yaakwattuliwa; nyuwo moolipihera makutha ootteenguwa.

⁵Vaheera vano anooneyaaya makacamiho, nyuwo munooporora; awo ahoomanani ni nyuwo moottenguwa.

⁶Omoovawanyu Yave khoonoolipihani nkoxo? Mweettelowaanyu woohihuluxeya khoonoovahani oweherera?

⁷Vano, mutthokelele: oohinthowa heeni omalenle mooriheyani? Ookwanela ahaawiye woowi ophwateya?

⁸Hiiho ntoko koonaaka, yoowo onlima yoonanara ni onaala sootakhala anaahephe seiyo.

⁹Amphwatiwa ni wiiseela wa Muluku; anriheya mpheyoni mwa isarasawe.

¹⁰Naari mwatto iipaka ni anyakulaka, mpaka maino a mwatto mutokotoko anookhuleya.

¹¹Mwatto onkhwa aahivara yoolupatthaawe, ni axaana a mwatto muthiyana anoomwareya.

¹²Aakileela masu muxiirini, mwa yaawo maaruwaaka yaakupunraaya orumawaya.

¹³Kilohaka sooloha soowoopiha, kikonanxeene,

¹⁴waakivara woova ni otteenguwa, onathukumeliha makhuvaaka ootheene.

¹⁵Yaakiviravira eduusiduusi ni kaasareya maririmela.

¹⁶Eyo yaaheemela, mene nkaawenre osuwela. Yaari ntoko ecaambulo ohoolowaka ni kiniiwa nsu vathi vathi neera:

¹⁷‘Kheewowo enkhwa engwera okhala yoororomeleya ompwaha Muluku. Khawoworu mutthu ongwera okhala ootteela ompwaha Mpattuxaawe.

¹⁸Muluku aahaaroromela arumeiyaawe ni aathoonya sootapanya sa andyelowaawe,

¹⁹wootepaxa yaawosa ankhala mpaani mwa oloko, mwa yaawo mathipelowaaya ari vathi! Ti ookhweyaxa onyakattiwa ompwaha tthumpwiha!

²⁰Awosa ankhala waaxekuwaka, mene enguungu anoonyaanyiwa; anriheya woomalela, woohisuwanyeyatho.

²¹Simpaseya mikhoyi sa iheemasaya ni awosa ankhwa woohikhalano miruku.’”