Read Makhuwa-Shirima Yobi 42 Bible Online

Yobi 42 - Makhuwa-Shirima bible

Yobi 42

¹Vano Yobi aamwaakhula Yave:

²“Koosuwela weera munoowera opaka itthu sootheene; khasiwoworu soovaanelasanyu sineera sooceeliheye.

³Nyuwo mookoha: ‘Taani yoola onghela ewukawuka mirukusaka ni masu oohikhalano esuwelo?’ Ettiitthu ti weera miyo kohuuluma itthu kahiiwexexaaka, aani itthu sootikhiniheya kahaaweraaka osuwela.

⁴Nyuwo mweenre: ‘Vano ngwiriyane ni Miyo kinimuuluma, kinimookohakohani, ni nyuwo mukaakhuleke.’

⁵Maaruwaaka yaahiiwa sa Nyuwo; vaheera vano maithwaaka aawoonani.

⁶Tivawo kiniinyoosaaka muneenaaka, kinarukunxa murima vantthupini ni vattuurani.”

⁷Yave amuulumenleene masu ale Yobi, aamweerelatho Elifazi muTemani: “Kohoonyoonyeriwani nyuwo ni asinthamwenaanyu eeli, niwoko nyuwosa khamuulumme yeeyo eri ya ekhaikhai mwaha wa Miyo; ntoko opankaawe murumeiyaaka Yobi.

⁸Vano murowase mpaka wa murumeiyaaka Yobi, mwaakuxe aximombe athanneeli, ni anapunci a ikhondoolo athanneeli, ni mwaapakele sooveleela soohisa mwiixeerelaka asineenaanyu. Murumeiyaaka Yobi onimoovekelelasani ni Miyo kinimwaakhulela nivekelonawe ni nkinoopakelasani yeeyo mumphwanelaanyu moololoni mpankaanyu. Nyuwosa khamuulumme yeeyo eri ya ekhaikhai mwaha wa Miyo, ntoko opankaawe murumeiyaaka Yobi.”

⁹Vano Elifazi muTemani, Bilidade, muXuhi, ni Zofari muNaamati, yaapakasa yeeyo yaalamuleliwaaya ni Yave; ni Yave aahaakhulela nivekelo na Yobi.

¹⁰Yobi aavekelenleene asinthamwenaawe, Yave aamweettiherelatho nnenesene, anamvaha iphura sa seiye aarinaawe khalayi.

¹¹Axunneiye ni axirokoriye ootheene ni yaale yaamusuwenle khalayi yaarowa oca ni yoowo owannyawe. Awosa yaampembesa, enamulipiha murima mwa makacamiho ootheene aamuruuhenlaawe Yave, ni khula mutthu aamvaha mpatta wa eparatha* ni munela a eyuuma yoorikaxa.

¹²Yave aareeliha mpatta wookisera wa okumaawe opwaha woopacera. Owo aakhalano ikhondoolo 14 000, ikamelu* macira miloko mithannamosa, imombe soolimano macira muloko ni abuuru macira muloko.

¹³Aakhalanotho anamwane asilopwana athanneeli ni anamwane asithiyana araru.

¹⁴Mwaana muthiyana oopacera iitthaniwa Yemima, anaaveeli Keziya ni anaararu Kerene-Hapuki.

¹⁵Khoowoworu mpatta wa elapweene yeela yaariworu asithiyana ooreera ntoko anamwane asithiyana a Yobi, ni atithayasa yaahaavahasa yoohiyeriwa vamoha ni axirokoraya.

¹⁶Vahoolowaya Yobi aakhala ni okumi iyaakha ncira ni miloko mixexe; aawoona anamwanaawe, osuulwaawe ni mpakatho ekhapira yanaaxexe.

¹⁷Hiiho Yobi aakhwiiye uuluvalanxeene.