Read Makhuwa-Shirima Yobi 5 Bible Online

Yobi 5 - Makhuwa-Shirima bible

Yobi 5

¹“Mwatthuna, mukhuwele, vaheera taani anaawiiweeni? Wa taani a ootteela muneeraanyu munlipeno?

²Oximwela ommwiiva mulolo, ni nrima nnimphwata nsikini.

³Yoomeene, koomoona mulolo simweettelaka nnene, vaheera wootutuxereya, empaawe yoolamphwa.

⁴Anamwanaawe ari ottai okhala oolipeene, aahasuliwa sinuulummwaayawo milattu, ehikhalanaka oowaakiha.

⁵Anamavoliwa annyaanya yoohephaawe, eronghaka mpaka eriyari ya nyiiwa, ni anantthona anghaawela mihakhusawe.

⁶Vano ohaawa khoomphuwa vantthupini, ni makacamiho khaammela vathi.

⁷Vaheera mutthu ongyareliwa makacamiho hiihoweene ntoko malumi a mooro amvavelaaya osulu.

⁸Vaheera yaakeereenle miyo, kaamundyoonttelela Muluku; kaamunleela mulattwaaka.

⁹Owo ompaka sootikhiniha soohihimeya, aani sootikhiniha soohaalikeleya.

¹⁰Onrupihela epula etthaya, ni onrumihela maahi mmatta.

¹¹Ongwunnuwiha oowiiyeviha, ni onaarongha vanipuroni noolipa yaawo anlalamika.

¹²Owo omvirikanyiha soowuupuwela sa anamacendyera weera matataaya ehiwere etthu.

¹³Onaavara asuweli moolokotthanimwaya ni soovaanelasaya sootakhala sinkumburuliwa ntoko maahi oowuupa.

¹⁴Enaarweela epiphi othana; anaapapela nsuwa nri vamuru ntoko waari ohiyu.

¹⁵Owo onimvuluxa onghooxiwa mwa ekatana mmwaanomwaya; onimvuluxa mmatatani mwa aweri.

¹⁶Tivawo anamahaawa ankhalanaaya oweherera ni ohiroromeleya ommaaliha eyanowaaya.

¹⁷Ooreelihiwa yoole onookoleliwa ni Muluku; tivawo, muhinyoose olaka wa Muluku a ikuru sootheene.

¹⁸Vano Owo onnavulaliha, menetho onnapenuxa, onnamana, menetho ntatanawe ninnalamiha.

¹⁹Owo onimootapuxani mwa irisa ithannamosa; aani mwa ithannapiili sa seiyo, nyuwo khamuhaawaru.

²⁰Mutalani, Owo onimootapuxani mookhwaani, ni mukhottoni onimootapuxani mwa ikuru sa ekatana.

²¹Nyuwo munookhapeleliwa mwa ekwamba ya nlumi, ni khootthuneya woova waarwaaka ophwata.

²²Nyuwo munootheya mwaha wa ophwatiwa ni etala, ni khootthuneya owoova axinama ooluwa a elapo ya vathi.

²³Vano munimwiiraanano maluku a ntuphini, ni axinama a ntuphini anookhalano murettele ni nyuwo.

²⁴Nyuwo munoosuwela weera eheemaanyu yoolipa; munoowehaweha sooreelasanyu sootheene sa vaatewanyu ni kheewo eniyoothoweeni.

²⁵Munoosuwela weera anamwaniinyu animwaatta, ni weera ekhapiraanyu enookhala ntoko malaxi a mulaponi.

²⁶Nyuwo munoorowa woovithiwani oowuuluvaleene, ntoko ehupu ehemphwale mweehuhuni yootthuneya.

²⁷Nooweha yeeyo, nnoona weera ettiitthu. Tivawo, mwiiwe ni mweettele mookuminimwanyu.”