Read Makhuwa-Shirima Yobi 6 Bible Online

Yobi 6 - Makhuwa-Shirima bible

Yobi 6

¹Vano Yobi aahaakhula:

²“Mwaawera paahi ophima othananawaka ni ohela wamphimoni erisaaka,

³mwaamoona weera olemelawaya ti otokotoko opwaha ehaava ya mphareiya. Tivawo maswaaka araaya oowuupaxa.

⁴Nyuupa sa Muluku a ikuru sootheene sookilatha, ni munepaaka onnuula yoohapalaaya; soowoopiha sa Muluku sookirica.

⁵Weeraka buuru a ntuphini onimwiinla oonaka malaxi hoye hoye emombe vayoocaniwaya.

⁶Enooceya yooheeleeliwa evaheriwe weeleeliwa? Ni yootteela ya nooce yookhalano esivelowaaya?

⁷Kinkhootta otava yeeyo; moota wa yooca eyo wookihiiriha.

⁸Ii! Kaakhuleliwe paahi yoovekaaka, ni Muluku aakivanghe yoohaawelaaka!

⁹Muluku aakinyakantte, avenxaka ntatanawe noowaakiha ni aakimalamalinghe!

¹⁰Mwa yeeyo, miyo kaampepesiwa ni kaanghakalala naari kihaawaka ovoreiwa woohihiyerereya, keenre kihikhootta masu a Muluku Ootteela

¹¹Oweherera heeni kiraakano keenre kihikhalano ikuru? Nkivilele hai kihinono ya muhoolo?

¹²Weeraka kookhalano ikuru ntoko nluku? Weeraka erutthwaaka ti ya ebronze*?

¹³Wa miyo, nkinono yooweera; weetteleya nnene wookivira.

¹⁴Mutthu amoonihereke murima wooreera nthamwenaawe ohinoona yooweera, mene munkoothera muhimoovaka Muluku a ikuru sootheene.

¹⁵Axunnaka ahiixoonihera wa miyo ntoko maxaapwa oowaakuva owelela, aani ansara enapwekhuwa,

¹⁶niwoko na orumbula wa woopaana ni etthapwe.

¹⁷Vaheera maxaapwa awo anghiya opiluwa mweelimweni, ni moovihani anlakaseya antthimakaayamo.

¹⁸Mikuttula sa ikamelu* singhiya simviraayamo; sinkela mmapuroni oowuumelela, sinalakaseya.

¹⁹Mikuttula sa ikamelu* sa oTemani sinaasa maahi, ananakoso a oXeba anaaweha moowehererani.

²⁰Ankhala oothanana niwoko yaaroromela; yaaphiyaka wu anghala lakalaka.

²¹Vano nyuwosatho khamukivareleiye muteko; mohoona ovalavelawaka, munasareya woova.

²²Kaatoko woovekelani weera mukivahe etthu, hoye hoye weera mukoopolele mihakhusanyu,

²³naari weera mukitapuxe mmatatani mwa amwiittana, hata mukoopole mmatatani mwa yaawo ankihooxa?

²⁴Mukixuttihe ni miyo kinoomaala, mukoonihere kitapannyaakawo.

²⁵Moota heeni masu a ekhaikhai amvulalihaaya! Mene soowootherasanyu singwera hai?

²⁶Nyuwosa muntthuna wookolela kinghimaaka ni oreherera ntoko epheyo masu a mutthu ohinono yooweera

²⁷Nyuwosa munoowera ompakela macitta mukwaasuni ni omuthumiha nthamwenaanyu mwa etthu yoohooneleyamo.

²⁸Vaheera vano, mukiwehe moonneneni. Weeraka kinimootha ohoolowanyu?

²⁹Moonelemo mulattu, muhikhale oohiroromeleya; mutthokeleletho, niwoko okwanelawaka ori mwa yeeyo.

³⁰Yookhala yootakhala mmwaanomwaka? Weeraka eyanowaaka kheengwera othanla yoonanara?